لە قووڵایی ئایدیالیستەوە هێڵنج
دەقی شیعریی
* ڕێدار فەریق شێخانی*
ژیان هێندە قورس نییە
بیرکردنەوە لێی
سەر گرانکا و لەش داهێزرێ
لە دەلاقەکی بچوکەوە
تەماشای ئەو هەموو زۆرانە-
ئەو هەموو باڵەکوتێ و
ملهوڕیی و خوێنڕژانە!
سەرەنجام سەوزایی بەهار
دەبێتە پەپولەیەکی وشکی پاییز
هەموو رەنگەکان تیایدا دەمرێ ،
ژیان سیس ئەبێ و
بەسەر پرچتەوە دەنیشێ
ئەی چی ئەبێ
هینری لوتریك تولوزه
گەر ئا ئەو درزەش بگیرێ؟
ئەوە تەنیاییە
سەفەرو خەم و گریان
دژوار دەکا
کەچی هەموو سەرکێشی و
یاخیبوون و هەڵهاتنەکان
تەنیایی بوون.
ئیدی بەسە!
لەو درزە شکاوە کپەوە-
سەیری ئەو هەموو قەرەباڵغییە درۆزنە
زیاتر دووریی،
زیاتر نامۆیی،
زیاتر تەنیایی..
لەبەرانبەریشدا
پردێ نابێ بۆ جەمسەریی هامنشینی،
دووڕوویی!
دیوێکی دراوە
ئەو هەموو بەندو داوە
دیوەکەی تری مەرگەموشە
ئەم بەرگە کۆن و دڕاوە.
