‎ئاغایەك لە ئایندا بۆ ڕەوایەتی دەگەڕێت

ئه‌بوبه‌كر جاف – ”تێبگە! كە تێگەیشتیت گەردنت ئازاد بێت بە ئارەزووی خۆت جنێو بدە.”

كۆچكردوو (نه‌وشیروان موسته‌فا) له‌ مزگه‌وتی گه‌وره‌ - وه‌ك سكرتێری پێسووی كۆمه‌ڵه‌ی ماركسی - لینینی كوردستان (ڕه‌نجده‌ران) له‌خودا ده‌پاڕێته‌وه‌!
1,520

١

‎لە ژیانمدا یەكجار  به‌ڕێز كاك نەوشیروان موسته‌فام بینیووە: لە ساڵی ٢٠٠٣ لە پاش ئەوەی لەگەڵ چەندین هاوڕێه‌كی  ئازیزدا ڕابەرایەتی خۆپیشاندانی زانكۆی سلێمانیمان كرد و ئاڵای توركیامان سووتاند. ئێمه‌ گیراین و له‌ زیندانی ئاسایشی سلێمانی بووین. كاك نەوشیروانی ڕەحمەتی پێی خۆش بوو بمانبینێت، گووتی؛ چیتان دەوێت؟ پاش قسە و باس لەسەر خۆپیشاندانەكە، گووتم: ”بۆ كۆمۆنیستەكانت كوشت؟  پاشان بۆ  ناسیۆنالیزمی كوردی بەم فۆرمە گەیشتە بنبەست و بۆگەنیكرد؟!…

‎ئەو پیاوە دەیویست تێبگات لە ڕ(ۆحی سەردەمێك)  گە خواست و مانیڤێستبوونی جیاوازی هەبوو لە گەڵ شاخاوییەكان، كاك نەوشیروانیش لەو شاخاوییانە بوو كە پێچەوانەی زۆرێكێ تر لە سیاسییەكان خۆی ڕاكێشابووە ناو نەوەو ڕۆحێكی نوێوە و دڵسۆزو ڕاستگۆش بوو.

 

٢

‎هەمیشە لەو بڕوایەدام كە جەماوەرو كۆمەڵگە و مێگەل تەنیا بت و بتی دەوێت، خەڵك لە پێناوی ئازادیدا تێناكۆشن، بەڵكو لە پێناو كۆیلەیەتی و خزمەتكارییدا تێدەكۆشن. و ئارەزوویدەكەن وەك ئەوەی ئەم هەوڵ و كۆششە خەبات بێت لە پێناوی ئازادیدا. بتێك تەلیسم و سیحری بەتاڵبۆتەوەو ناتوانێت چیتر جادوو بكات لە جەماوەری بەشەرەف و گەل و كۆمەڵگە، نهێنی و پانتاییە نەبینراوەكانی كەشف و ڕووت و قوتن. جەماوەرو كۆمەڵانی خەڵكیش نایانەوێت ئاغا و سەروەرو سەردارەكەیان ڕووت و قوت بێت، دەبێت تەنرا بێت بە خورافەو ئه‌فسانه‌ وەهم و پاڵەوانێتی و قودرەتێكی لە ڕادەبەدەری ڕزگاكردن و ڕابەرایەتیكردن. دەبێت ئاغا پۆشتەو تەلیسماویی و پڕ نهێنی بێت. بەمشێوەیە كاتێك جەماوەر دەسبەرداری ئاغایەك دەبێت بەرهەمی وشیاریی و وشیاربوونەوەو ئاگاییەك نییە، بەڵكو بەرهەمی كەشفبوونی وەهم و خورافەی چیرۆك و حیكایەتەكانی ئاغایە.

 

٣

‎ئاغایایەكی نوێ دێت، خۆی نایەت بەڵكو دادەتاشرێت و بە زۆری زۆرداری دەڵێن؛ ئاغاو ڕزگاركەر و پێغەمبەریت، تۆ فریادڕەس و نوێنەری خوایت، تۆ ئەو زەرورەتەیت كە خودا نەیویستووە بە تەنیایی و هەتیویی بە جێمان بهێڵێت…جەماوەر و مێگه‌لی جه‌ماوه‌ریی وەهمی بۆ دادەتاشێت، چیرۆك و حیكایەتی سەیرو سەمەرەی بۆ دروستدەكات، وەك بكەرێكی سەرو مێژوو و پاڵەوانی ناو چیرۆكە ئوستورەییەكان وێنای دەكات و بەرهەمیدێنێتەوە. جەماوەر نایەوێت وەك ئاغای یەكەم لە دەستیان بچێت و بڕوات، لێرەوە دەستكاری مێژووی بۆ دەكات، دەستكاری جوگرافیا، دەستكاری ڕۆحی بۆدەكات، دەستكاری زمان…

ئەم ئاغایە لە ناو پێرسپێكتیڤ و دیدگایەكی میتافیزیكی و تیۆلۆژیدا مەقام و شان و شەوكەتی گەورە دەكرێت، پیرۆز ڕادەگیرێت، تەفسیرو ڕاڤەو تەئویل بۆ قسەكانی دەكرێت، قسە هەڵەكانی ئەم ئاغایە، لەو شوێنەی كە نەیپێكاوە جەماوەر خۆی تاوانبار دەكات، كە لە ئاغاو حیكمەتەكانی تێنەگەیشتووە و هەڵە لێكیداوەتەوە، دەبێت لە ناو پرۆسە تائویلیی و ڕاڤەكارییەكاندا مانای نوێ و تێگەیشتنی نوێ بۆ حیكمەتە نەبینراوەكانی ئەم ئاغایە بگەڕێت. تەفسیر لە دوای تەفسیر….ئاغایەك لە ناو تاوان و كوشتن و بڕینیشدا مافی هەبووەو لە سەردەمی شاخدا، لە شاردا… تاوانی ئەنجام نەداوە بەڵكو هەلومەرجی شۆڕشگێڕیی و كۆنتێكستی ئەو كاتە هەق و شەرعییەتی دەداتێ. ترس لە درزكەوتنە ناو ڕیزەكانی شۆڕش ئەم پاڵەوانە شۆڕشگێڕەی ناچار كردووە ئاگاداری شۆڕش و بەرژەوەندییە باڵاكانی شۆڕش بێت و تەسفییە بكات….هتد

٤

‎سەردانەكەی كاك نەوشیروان بۆ مزگەوتی گەورە، فاتیحا و قسەو باسێك بۆ مامۆستایانی ئاینی و داوایان لێدەكات ئەوان سەرقاڵی (ئەركی مۆراڵی) و (ڕیفۆرمیستی)  خۆیان بن، خودی كاك نەوشیروانیش لە سیاسەتدا سەرقاڵی ئەم ئەركەیەو، ئەم. ئەركەش هەر عیبادەتە! …لە ئێستاو لێرەدا وەك ڕیكلامێك بۆ بانگەشەو دەنگ كۆكردنەوە دادەبەزێت.

 

٥

‎ئاین لە خۆیدا مانای نییە، بەڵكو ئاین ئەو مانایانەیە كە لە ناو ململانێی هێزەكان و ستراتیژی ناونان و ناولێنان و ستراتیژی پۆلێنكردن و دەستبەسەراكردندا هێزەكان مانای لێی بەرهەمدێنن. كەواتە مانای زاڵ و باڵا دەستی ئاین و تێگەیشتنێك لە ئاین، مانای ویستراوی ئەو هێزەیە كە زاڵ و باڵا دەستە.

 

٦

‎ئاین خودی خۆی قوربانی دەستی مەلاو شێخە، كەواتە لە پێناو كۆمەڵگەیەكی ڕۆشنگەرو ئازادو عەدالەتدا دەبێت تێگەیشتن و تەفسیری ئاین سەر لەنوێبكرێتەوە، ئەمە لە كاتێكدا ئاین هیچ نییە جگە لە تەفسیرەكان.

 

٧

‎ئاین وەك چۆن بەشێك بووە لە ڕەوایەتی و شەرعییەتدان بە ستەم و ستەمكارو ستەمكاریی، لە دەیان و سەدان شوێنیشدا، بە دەر لە پێویستیه‌  ئه‌نتۆلۆژییەكەی، بەدەر لەوەی لە ئاستە میتافیزیكییەكەیدا ئارامی و ئاسودەگی  ئاشتییە لە زۆر شوێندا،  لە ناو ئەكتی كۆمەڵایەتی و دەستە جەمعیشدا بەشێك بووە لە بەرگریی و بەرەنگاری دژ بە ستەم و ستەمكاری و ستەمكاری و لە ناو ئەكتی بەرەنگاریی و بەرگریی و بەرگرییكردن بووە لە ئازادی و دادپەروەری و لە بەرەی بەشمەینەت و چەوساوەكان بووە.

 

٨

‎كاك نەوشیروان تا ئەو جێگەیە كارێكی دروستدەكات كە ئاین و. ڕەمزو سیمبۆلە ئاینییەكان بەشێك بن لە بەرگریی لە عەدالەت ئیسڵاح و ڕیفۆرم و دەسكاریكردنی ئاستێك كە ئاین. دەتوانێت ئەنجامی بدات.

 

٩

‎هەزاران كەس كە بڕوایان بە خوداو ئیسلام نەبوو هۆگەربوون بە كاك نەوشیروانە و لە شاخ و لە شاریش، ئەمانە چەپگەلێك بوون كە ( ئاینیان بە تلیاكی گەلان و داردەستی ستەمی سەرمایەداری و بۆرژوا دەبینی) لە گردی زەرگەتەش، قۆناغی گردی زەرگەتە تا ئەم چركەساتەیش هەزاران كەس لەم جۆرە هەیە.

 

١٠

‎بۆ هێندە كۆیلە بین بڕوا نەكەین ئاغایەك لە هەندێك جێگەدا نایپێكێت و دەبێت خراپ لێی حاڵیی نەبین؟ بۆچی ئەوەی فەهم و تەفسیری خراپی ئێمە بێت كە لە حیكمەتەكانی ئاغا تێناگات و نەك ئاغا نەیپێكاو هەڵەی فەرموو ؟ بۆ؟
‎ئەمە ئەو دۆخە كەینونەیه‌یە  كه‌ تەنراو و پۆشراوە بە ئایدیۆلۆژیاو دۆگما و پیرۆزكردن و پەرستن، كە نابێت ئاغا هەڵە بكات! ئەوەی ئێمەین لووتمان بۆنی حیكمەتەكانی ئاغا ناكەوێت نەك ئاغا نەیپیكا بێت. لێرەوە ئائیست و مولحیدو بێباوەڕەكانی دوێنێ، لە ناو كردەی پەرستن و پیرۆزكردن و تەقدیسكردندا دێن و بەرگریی لەوە دەكەن  كه‌ (كاك نەوشیروان باشتر لە ئێمە دەزانێت)  و ئەو زاهیدو موتەقی و موفەسیر ڕاڤەكارێكی گەورەیە.

‎بەدبەختی و ماڵوێرانی گۆڕان لەوێدا بوو كە وەك هەر (بزوتنەوەیەكی پۆپۆلیستی)  دیكەی ناو دونیای ئێمە بیابانێك بوو لە نەخوێنەواریی و جەهل و دەسكارینەكردنێكی ڕادیكاڵییانەو ڕیشەیی هەلومەرجێكی بەرپرس لەوەی كە هەیەو بەردەوام خۆی بەرهەمدێنێتەوە.

 

 

تایبه‌ت به‌ كولتور مه‌گه‌زین
ته‌نها دانانی لینكی بابه‌ت ڕێگه‌پێدراوه‌.

You might also like More from author

Comments are closed.

error: Content is protected !!