یوسف بۆ براكانت خستە بیر و وتت گورگ خواردنی؟

با،

دوور لە ئومێد

پەپكەی خواردبوو  ..

لە دەنگی خرینگە زیاتر نەدەبیسترا  ..

بە قووڵایی بیر ،

له‌ بەر سێبەری بێدادیدا

دەدرەوشایەوە ..

لە ژێر چ سرووتێكی هەڵوەدادا بووی ؟

لە تافی چ شادییەكی بەلەنجە ؟

بیرت لەوە كردەوە ،

براكانت بخەیتە بیر یوسف!

*

یوسف!

تۆ لە هەموویان جوانتر بووی ..

لە هەموویان خۆشەویستتر ..

خۆر و مانگ و ئەستێرەی ئاسمانان

بۆ باڵات دەنووشتانەوە..

ئیرەییت بە چییان برد ؟

یوسف

براكانت بۆ خستە بیر و

وتت گورگ خواردنی ؟!

*

ئێمە كۆمەڵێك مردوو بووین ،

ماندوو

لە زەماوەندی ستەم گەڕابووینەوە

پاڵمان بە دیوارێكی ڕووخاو دا بوو ،

تۆمان دی لە بێدەنگیی سپێدەیەكی ئارایشتكراودا

كراسە بەخوێن كراوەكانیانت بە دەستەوە بوو

لە دوور ڕا ،

بە چەند ئاڵایەكی تەسلیمبوون دەچوون

بە ڕیتمی هاواریان پێدەكەنی ..

یوسف

براكانت بۆ خستە بیر و

وتت گورگ خواردنی ؟!

*

نەخشەی تەمەنت هەمووی

بە قوربانی ،

تاخچەیەكی پەمۆیی

كۆشكی عەزیزی میسرێ‌ كرد ..

ئەشكەوتێكی چۆل بوو ،

تەنیا دەنگی خۆتت لێ‌ دەبیست ..

بە تەنیا خۆت تیا دەدی ..

(زولەیخا ) ئەو تریفە بە خەرمانە نەبوو یوسف !

مەوداكان ،

لە ساتێكی هێدمەگرتوودا ببینێ ..‌

بۆ براكانت خستە بیرەوە و

وتت گورگ خواردنی ؟!

*

زامی بەفر

تارمایی شكۆفە

كوانووی سارد ..

لە كۆبوونەوەیەكی سێ قۆڵیدا

تاوتوێی هاوارە دوایی نەهاتووەكانی

بن بیریان دەكرد ..

با ،

نهێنی بۆ دیوان لێ‌ دەدزین  ..

ئاڵۆز بوو ،

لەخۆنووسانێكی ئاڵۆز

ژوانی ناوەختی

یوسف و بیر ..

*

هەتاوی كوژاوە،

نم نم

بەسەر جەستەی برایاندا

دەڕژایە خوار ..

“زولەیخا خەونێكە

لە ئەندێشەی مناڵانەمدا ..“

وەهای گوت یوسف .

*

كۆمەڵی مردووان،

هێشتا بە پاڵ دیوارەوەن ..

جەستەی كەڵەكە بووی براكان

لە ( بیر ) ی بێ‌ هاوار … بێ‌ بانگ

شێتایەتی سرووشت ..

خەوی ئەبەدی ..

یوسف لە كۆشك ،

درەختێكە بە تاریكی تەرز داوێ‌ .

                                      

   كانوونی یەكەمی- 2016