لێھات سەلاح: ڤەپەشین ژ جەمسەرێ دی

Loading

ژ بۆ وێ پێنگاڤا تە ل دویڤ من را ھنارتی و جادێ ڤەخواری

14287598_602627169911975_1055710995_n
لێھات سەلاح

ل ڤێرێ..
ل بەرامبەر من، تو ل چ دگەڕی؟
ئەز نە دەستڤەدایێ چ بژکینێن گیانێ تە مە و
نە ژی بێھنڤەدایێ ھشکە رێ ئەڤرازییا ڤێدانا گاڤێن تە مە.

ل ڤێرێ..
عەور دەستڤالا بەر ب من ڤە دھێن
ئەز د ناڤ خوە دا چرکەکم و
ل گاڤێن سەمایا دەمێ دیتنا تە دھەلنگڤم

تێدگەھم، ئێدی رۆناھی دەستمالا شەڤە پەیڤێن تەی
تێدگەھم، پار ل ڤێرێ و ل ڤی دەمی بەفر دھات و
نوکە تو دھێی،
لێ نزانم بوچی ئەز ھەر مام بیابان؟
تێدگەھم، تو دوبارەترین رحی د من دا و
نھا ل بەرامبەر تە ژ تە خەریبم
بێژە من، ئێدی چاوا بەر ب تە ڤە بھێم و
چاوا ببھوژم؟

ل ڤێرێ ل بەرامبەر تە
دزانم وەک نالینا دلۆپێن بارانا دوھی دباری …
یێ ل گۆمانێن خوە بەرزەبوویم
نە یا سەیرە ئەز ڕەڤدێن خیچکا بەر ب خوە ڤە نەبینم
لێ سەیرە ئەز خوە نە بینم تاڕی!
چاوا بچم؟
چاوا خوە دادەمە پشت دیوارێ ڤێ دیدارێ؟
کی دێ من بینیت؟
کی دێ مەیخانێن ڤی وەلاتی تژی کەت ژ خەونان،
ژ خەونێن بووینە خازخازوک ل بەر دەرازینکێن سیبەرێن خوە؟
کی دێ خوە کەتە کاغەز و
د دەستێن تەمەنی دا دەرگەھان ل سەر خوە وێنەکەت؟

من دڤێت بکەڤم،
لێ ئەڤ دیوارێ د من دا دەرگەھێ ل خوە کلیلدای!
گیانێ من دەلنگێن خوە ڤەچراندن،
دڤێت برەڤیت،
لێ چیروکەک یا کەروپرتێن وی دکەتە کەڤر و
ل ھەموو لاییێن من یێ لاپەر وەردکەت.

کویڤە بچم؟
ھەموو رێک د من دا ب سەرێ خوە ناکەڤن
ھەموو جادەیان شوستەیێن خوە یێن خوارین
ئێدی نە ئەڤ وەلاتە تێرا من یێ ڤالا دکەت و
نە ئەزێ ڤالا تێرا ژێیێن موزیکا جادەیێن وی یێن سەرخوەش دکەم.
کیژ پەنجەر ھەیە ئەز د ناڤ خوە دا نە نڤاندیم؟
کیژ قێری ھەیە سەرێ خوە ب من نە شەکری؟
کیژ بیزاری ھەیە رامانا خوە ل سەر ئەنیا من نە نڤیسای؟

ئەزێ د ناڤ تۆفانا بوھژینێ دا نقوم،
یێ ل لاپەرێن زاروکێن خوە یێن بەرزە دگەڕم
و تو ل ڤێرێ، ل بەرامبەر من ل چ دگەڕی؟

ئەز دزانم…
ھەر دیدارەکا تە

ھ
ژ
ی
ا
ن
ە
ک
ە

کا پیچەک ھەرە وێڤە
دا تەرمێ خوە ل بەر پێن تە ب ھەلینم
گورستانەک یا ھەی
ب تەنێ ئەزێن من لێ د ڤەشێرن
دێ ڤی ئەزی ژی ھاڤێژمە وێرێ.
٣/٧/٢٠١٣

تایبه‌ت به‌ كولتور مه‌گه‌زین ڕێنوس و خاڵبه‌ندی تایبه‌ته‌ به‌نوسه‌ر خۆی - مافی بڵاوكردنه‌وه‌ بۆ نوسه‌ر و كولتور مه‌گه‌زین پارێزراوه‌
تایبه‌ت به‌ كولتور مه‌گه‌زین
ڕێنوس و خاڵبه‌ندی تایبه‌ته‌ به‌نوسه‌ر خۆی – مافی بڵاوكردنه‌وه‌ بۆ نوسه‌ر و كولتور مه‌گه‌زین پارێزراوه‌