عادل عەبدولمەجید؛ خەلوەتگەهـ

Loading

بایێ سوبێ هناڤێن وى تەزاندن، دەریێ شکەفتێ بۆ دەریایەک شین و خوە د چاڤێن وى وەراند، سروشت تژى بەندەمان و زەراتیە، هەرتشت نەوەک خوەیە، هەرتشت دبێ هوشیێ دایە، وى ب خوە ژى نە دخواست زویکا شەڤ دەرباز ببت و ببت سپێدە، نە دخواست چاڤ و گوهێن وى چ دیمەنان ببینن و گوه لێ بن، ژ عشقا وى بو شکەفتێ و سروشتى هەرتم کەرب ژ وێ هزرێ ڤەدبوون دەما دزانى رۆژەک دێ هێت و دێ پەناگەها خوە بجه هێلت، ئەوێ بەرزە، ئەوێ مرى، ئەوێ کەسێ نەزانى چ لێ هات؟ بوچى وەها لێ هات؟ چاوان وەها لێ هات؟ ل کیرێ وەها لێ هات؟ چەند ئەڤ پرسە د چێکرینە، د دوبارەنە، ژ خوە تەمەنێ ڤان پرسان ژ حەفتیەکێ نابورت، چونکى باژێرە و د باژێرى دا هەرتشت زوى دەنگ ڤەدت و زوى ژبیر ژى دچت، ئەڤە حەفت سال بوورین، نها دەمێ ڤەگەرێیە، تەمام بونا خەلوێ یە،هێشتا نەڤێت باوەر بکت رۆژ یا دەرکەڤتى، هێدى هێدى و بێ دلێ خوە رابوو، خوە نێزیکى دیوارێ شکەفتێ کر، چاڤێن وى تژى ئاڤبوون ئەو چاڤێن رەش دێ بێژى بەرکێ رەشێ بنێ کانیانە وەسان د لەرزین، تبلێن خوە ئێخستن دیوارى و نەرم ڤێدا ئینانە خوار، رویێ خوە ب دیوارى ڤەنا، بێهن کر، ماچى کر، کرێن ژ دلێ وى هات، د خریقێن چوو.

ـ وایى، پا من تو یا ڤیایى، چەند عاشقێ بێ دەنگیا تەمە، من تو ژ مرۆڤان پتر دڤێى، ژ بەرکو تەمەت خوە دئاخڤى، تەمەت من دئاخڤى، ئەى ئەوا بێ پێش و پاش، تە چ دەنگ نەبوون سەرێ من پێ هێر بکى، چەندێ بێ دەنگ بام تو یا بێ دەنگتر بووى، ژ تە فێرى کەراتى و بێ دەنگیێ بووم، تە ب بێ دەنگیا خوە وانەیەک دا من یا کو چ جار خوەدى دەنگان نە دایە من. خوە ژ باوەشا دیوارى ڤەکر، بەرێ خوە دا دەرگەهێ شکەفتێ پرس ببونە لیلاق پێڤە، هاتە هزرا وى دەما دگوتن ( جهێن تارى، هزرێن رۆن چێ دکن )، لێ ئەو گەهشتبوو بەروڤاژیا وێ باوەرێ ژى کو ( جهێن رۆن، هزرێن تارى چێ دکن )، گەهشتە د دەریێ شکەفتێ دا و راوەستیا، دەرگەه بو تابلو مینا نیگار کێشەک مرۆڤەکى ب کەتە سیتافکەک رەش دناڤا رۆناهیەک گەش دا، کویر بێهنا خوە هەلکێشا و ژ دەرگە هێ شکەفتێ دەرکەفت، ئەو تابلو تەنێ ما رۆناهیەک بێ سیتافک، چەند پێگاڤەکان چوو، راوەستیا و ل سەر ملێ خوە زڤرى و تەماشەى شکەفتێ و وى سروشتى کر، بلبل، چویچک، پەلاتینک، ئاسک، پەز کویڤى، یێ هەست پێ دکت هەموو دخوازن وى هەمبێز بکن، ب کەلە گریکڤە گرنژى. ل سەر پێ خوە زڤرى و سەرێ خوە چەماند و کەفتە رێ. ئەو پرسێن بوینە لیلاق ب دەرێ شکەفتێ ڤە، بوونە هەلم، بوونە هەور، بوونە باران، و نها هەر دلوپەک پرسەکە، دێ ڤەگەرت باژێرى، کیش باژێرى؟ ئەوێ بویە ئەگەرێ یاخیبوونا وى؟ ئەو باژێرێ تژى مرۆڤ و هەر مرۆڤەک ل جەم وى بوویە پرسەک؟ باژیرەک هەبوون و نەبوونا وى وەک ئێک؟ نها دێ ڤەگەرت ناڤ هەمان باژێر و هەمان مرۆڤ، جارنا دبەر ڤان پرسان دا یێ دگرنژت، ژبەرکو دزانت دێ هەموو خوە مەندەهوش کن، دێ هێن خوە بو ئێشینن و دەڤێ وان دێ زێت ژ پرسان، دێ گرین و هزار ماسکا د ئێک چرکەدا گوهەرن، دزانت ژى ئەگەر بێژیتێ ئەز چوو بوومە گەشتەکێ رەنگە هەبن بێژنێ کانێ دیاریێن مە؟!

ڕەنگە گەرمەکان / تابلۆی سۆلۆ گیۆڤانی (دڵشاد کوێستانی)
ڕەنگە گەرمەکان / تابلۆی سۆلۆ گیۆڤانی (دڵشاد کوێستانی)

لێ ئەو ل گەشتەک هزرى بوو، نەک غەریزى! دەما هاتى چ چانتە دگەل خوە نە ئینا بوون، مێشکێ وى چانتێ وى بوو، بەرى بگەهت پەناگەهێ ئەو چانتە ڤالا کربوو، و نها مێشکێ خوە تژى کریە. تژى ژ پرسێن ئەزەلى، ژ گومانێن میتافیزیکى، ژ گرێ و پەنگێن دەرونى، ژ لڤین و پێکهاتێن کەونى، ژ هەبوونێ و نەبوونێ، ژ مروڤان و مروڤاتیێ، مرۆڤ چیە؟ ئەرکێ وى د ژیانێ دا چیە؟ چ تشت گرنگە مرۆڤ بو بژیت؟ ئاکار و هەلویست چیە؟ زانین و حکمە د بویەراندا چیە؟ ڤان پرسان سەرێ لێ وەرماندى پورا وى یا بویە خەلەکێن ئالزى… گەشتا خوە دڤان پرسان دا کرییە و ل گەمیا گەلەک میناکێن بەرى خوە سواربوویە ژ بو هندێ بزانت چ د پشت هەر تشتى دا هەیە، بیریا هەڤالێ خوە دکت، تەنێ باوەرى ب وى هەیە، هەڤالێ وى یێ روحى، ئەوێ دگەل وى و دبن ئێک بەتەنیێ هزریڤە نڤستین، ئەو ژ هەمویان گرنگترە چونکى دزانت دێ زوى د وى گەهت و کێم پرسان ژێ کت. هێشتا قێژیێن وان نە گەهشتنە گوهێن وى، هەوارێن وان دبن بێ دەنگیا ویڤە یێن فەتسین، هەموو یێ خوە تێوەر دکن و د گڤێشن و هەمبێز دکن، یێ ماچى دکن، یێ بو دگرین، یێ چاڤێن خوە بلوق دکن، رویێن خوە یێن مەندەهوش دیاردکن، لێ هەست ب چ تشتێ کەسێ ناکت، تەنێ دزانت کەلەخێ وى یێ د دەستێ وان دلڤت، دێم و رەنگ و دەنگ و بێهنا هەمان مرۆڤێن بەرى حەفت سالانە، تو ل کیڤە بوویى؟ تو ل کیڤە د ژیایى؟ چاوان تو هەتا نها یێ ساخى؟ ئەم باوەر ناکن مرى دوبارە ساخ بن!؟ چ عیسا ل ڤى سەردەمى ناژین!؟ پرس و هوسەیا وان یا دبن پیێن ویڤە د پەرچقت. ژ نشکەکێڤە کەفتە د هەمبێزا مرۆڤەکى دا، وەسان هەست کر دیوارێ شکەفتێ یێ وى دگڤێشت، هەرتشت چکبوو. بێهنا ڤى مرۆڤى چاڤێن وى گرتن، رۆندکەکا ڤە مایى ژ چاڤێ وى هاتە خوار.

ئیکسەر زانى مرۆڤەکە نەوەک وان هەموویان بو ئەوێن بەرى نها ئەو هەمبێز کرى، زانى کەفتە دحەقیقەتا عشق و وەفایێ دا، زانى هەڤال جێمکێ وى یێ هزرییە، چاڤێن خوە ڤەکرن، پرس، خەم، هیڤى، هزر، روح، پوسیدەیى، د سیمایێ وى یێ کەڤنار دا دیتن، ئەڤەیە ئەوێ د هەر هەست و لڤینەکا وى دگەهت، دوان کێلیکاندا لەشێ هەڤالێ وى خاڤ بوو.. چاڤ لێ سپى بوون، مینا پاتەیەک نەرم کەفتە بەر پیێن وى، هەروەک چاخێ چاڤێن زولەیخایێ پشتى رۆنبوونێ ئیکسەر یوسڤ دیتى، باش دزانت هەڤالێ وى چ دل بەرامبەر وى هەیە، خوە چەماند و دەستێن خوە نەرم دانە بن کەلەخێ وى و بەر ب ژوورێ چوو، هەموو مرۆڤێن دى ل پشت دەرگەهى هێلان.. دیسان پرس و قەرەبالغا وان دەستپێکر، مینا بەرى حەفت سالان یێ خوە دوبارە دکن، یێ خوە دکن دادوەر، هەم پرسان دکن و هەم حوکم و بریاران ددن، تشتێ سەیر بەرى حەفت سالان ب هزاران تومەت ب دوڤ ئێخستبوون دەما بەرزەبووى، نها هەمان مرۆڤن و هەمان گوتن و تومەتان دوبارە دکن، د ڤێ گێلەشوکێ دا، دە رگەهێ ژوورێ ڤەبوو، هەڤالێ وى چک راوەستیا. هەموو بێ دەنگبوون، مەندە هوشبوون، ژ نم نما وان دیاربوو، دڤیا بێژن:

– ما قەى بتەڤە خواند! تبەرک بوو وەسان تو هشیار بووى؟! باش ل سەروسیمایێ وان نێرى، دەستێ خوە دا بەرویکا خوە و پرتەک کاغەزێ ئینا دەر. – دخوازم چ کەس نێزیکى من نەبت، من بهێلنە ب تەنێ، ئەم ل دوورى ئێک دێ پتر خوە نیاسین و د هەڤدو گەهن. پرتا کاغەزێ پێچا و کرە د بەرویکا خوەدا. – ئەڤ یەک خواستا وى یە، و تشتێ وەدڤێت ژێ بزانن دێ نها بێژم، وى ب تەمامى گوه و زمانێ خوە ژدەستداینە ئانکو کەر و لال بوویە. مینا لەشکەرەکێ شکەستى و چ ب دەستڤە نەهاتى، ل سەر پێ خوە زڤرین و سەرێ خوە شورکرن و چوون، پرس بونە بەلێن پایزێ لبن خشخشا پیێن وان، هەڤالێ وى ژى دەرگەهێ ژورێ د دوڤ خوەدا گرت و ب تەنێ هێلا، ئەو ژى ل پرسان د هەلنگفت، لێ نە هەمان پرس، نە ب هەمان شێوە، و گومان و دوو دلى یا وى ل سەر کەراتى و بێ زمانیا وى، ماکا هەموو پرسان بوو. لبن وێ سیڤاندێ چاڤێن خوە یێن زوم کرین، ب هەموو هوشدارى یێ زێرەڤانیێ لێ دکت، چاوان د روینت؟ چاوان را دبت؟ چاوان چایێ ڤە دخوت؟ چاوان ب لڤینێن خوە دگەل وێ جڤاتا کەر و لال گەنگەشێ دکت؟ بارانێ بوشتر لێ کر، وى ژى د خواست بارانەکا پرسان ژێ بکت، لێ دزانت ب هەموو باوەرى ئەو ناخوازت کەس نێزیک بت، و رێزەکا هەرى مەزن ل باوەریا وى دگرت، لەو تەنێ زێرەڤانەکە ب دوڤ ڤە، دیت دەما ژناڤ جڤاتا وان مرۆڤێن کەر لال رابووى، دەستێن خوە کرنە د بەرویکا ساکویێ خوەدا و ژووردا د جادا باژێرى دا چوو، ئەو ژى ژ بن وێ سیڤاندەیێ دەرکەڤت، خوە دا لایێ دى یێ جادێ و هێدى د دوڤ دا چوو. ژبلى وان هەردوویان چ کەسێ دى د ئەوێ جادەیێ نینە، و باران ژى جار نەرم و جار ژى بووش دبارت، جادە مینا روبارکەک بچوک خوەیا دکر، د ئەوان کێلیکان دا بریسیەک ب هێز جادە رونکر، تەڤ باژێر کرە دەنگەک، ژ خافلە تى و ترسێ هەردوو دەستێن خوە ب سەرێ خوەڤەنان، دناڤ دەستێن خوەدا دیت دەما جلفەک ب هەڤالێ وى ژى کەڤتى!

هێدى رابوو سەر خوە مینا پەیکەرەکى هشک و بێ لڤین ما، بارانێ گومانێن وى ژێ داقوتان، چاڤێن وى تژى بوون، رۆندک و باران ل سەر روویێ وى تێکەل بوون، ژ دل دخوازت بکت هاوار و ب دەنگەک بلند گازى بکەتێ. – ئەى مرۆڤ، ئەى ئەوێ تژى دەنگ و خوە بێ دەنگ کرى. لێ ل سەر ئەڤێ هەموویێ ژى، دیسان خوە بێ دەنگ کر و رێز ل بێ دەنگییا هەڤالێ خوە گرت، دەربازى لایێ دى یێ جادێ بوو، مینا وى دەستێن خوە کرنە د بەرویکا خوەدا و نەرم پێنگاڤێن خوە ل دوڤ دەوسا وى هاڤێتن، جارنا رۆناهییا بریسییان جادە رون دکر، مینا گرتەیەکا فلمان دوو کەس ببن سیتافکەک و دباژێرى دا ب مەشن. نها ئەز ژى دێ چم خوە ل بەر وێ بارانێ تەر بکم، و ب بێ دەنگى و نەرم پێنگاڤان ل دوڤ دەوسا وان هاڤێژم.. ژ ڤێرێ و پێدا خەما هەوە ژ کەرەما خوە ئێک ژ هەوە بهێت و ئەڤێ چیرۆکێ تەمام بکت.

عادل عەبدولمەجید
2015

تایبه‌ت به‌ كولتور مه‌گه‌زین ڕێنوس و خاڵبه‌ندی تایبه‌ته‌ به‌نوسه‌ر خۆی - مافی بڵاوكردنه‌وه‌ بۆ نوسه‌ر و كولتور مه‌گه‌زین پارێزراوه‌
تایبه‌ت به‌ كولتور مه‌گه‌زین
ڕێنوس و خاڵبه‌ندی تایبه‌ته‌ به‌نوسه‌ر خۆی – مافی بڵاوكردنه‌وه‌ بۆ نوسه‌ر و كولتور مه‌گه‌زین پارێزراوه‌