بەخێربێی شەهلای شووشەیی

بەخێربێی شەهلای شووشەیی

نەژاد عزیز سورمێ

”ھەموو ئاویان لێڵ دەکەن ، تا قووڵ بنوێنن ..” 

                                          (نیتچە)

بەخێر بێی میوانی تاراپۆش !
بەخێر بێی دونیای خەمۆکی بێدەنگ ..
ئەو درەوشانەوەم پێ ببەخشەوە ،
لە گەواڵەیەکی چڕی شەرمەوە دێ
تارمایی ببینم ..
ساوی (با) م بە سەردا ھەڵبکا
غەریبی نێرگسی لێ بتکێ ..

بەخێر بێی شەھلای شووشەیی نووستوو !
ئەوەی ھات دڵی خۆی نەدیت و پێی لێ نا ..
ئەوەی چوو بازی کێوییانی ون کرد

نھێنی ڕێکەوت و
ورشەی ئازار و
مەوسیمی جودایی
لە شکانی شەختە و
مەرگەمەلەی کەنار و
کێشمانەی سپێدەدا دیتبوو ..

بەخێر بێی بۆ دەرگای تۆنێڵ و
باوەشی بەسۆزی
سرووتی کسپە و
ئاوازی لاتی و
فەرشی باران ..

بەخێر بێی دونیای خەمۆکی بێدەنگ ،
میوانی تاراپۆش !
تۆ سەیری ،
کۆتری حەوشەی خانەقا چەند شا دن
چەند شا دن کۆتری حەوشەی خانەقا
گڕی شین لە بنباڵ ھەڵدەگرن
ئاسمانگەڕ ،
لە بۆسەی بەسامی فەنتازیا
دەچنەوە باوەشی
سرووتی کسپە و
ئاوازی لاتی و
فەرشی باران ..
شەھلای شووشەیی نووستوو !
میوانی تاراپۆش
بەخێر بێن بۆ شایی گوڵاڵە سپییەکان ..

نیسانی2010