زه‌رده‌ له‌ سه‌ران بێ، له‌ سیما قه‌وزه‌داره‌كان زیاتر نه‌بینی، كه‌س چاوه‌ڕێت نه‌كا …

نه‌ژاد عزیز سورمێ – قه‌سیده‌

كۆلاج - نه‌ژاد عه‌زیز سورمێ
329

 

 

 خۆشبه‌ختین هه‌ست به‌ ئازار ده‌كه‌ین،  واته‌ هێشتا زیندووین              

                     وی هیوی   –  ڕۆمانی ( هاوسه‌رگیری له‌گه‌ڵ بوزا ) دا

 

كۆلاج – نه‌ژاد عه‌زیز سورمێ

ئێمه‌ له‌ كوێین

به‌و سه‌خاوه‌ته‌ بێ وێنه‌یه‌ ،

میوانداری بكوژانمان ده‌كه‌ین؟

چاو له‌ بێبه‌ریایه‌تی

خوداوه‌نده‌ له‌ مه‌رگ تێرنه‌بووه‌كان ،

كه‌ نێرده‌كانیان

پیاسه‌ به‌ زه‌نوێراندا ده‌كه‌ن

چه‌هره‌ی تۆزاوی مناڵانیش

له‌ باده‌یه‌كی گڕگرتوودا

به‌ ته‌زره‌ و چواله‌ ده‌خۆنه‌وه‌ …

 

 

 

 

 

بێده‌نگی كاول و وێرانان ،

سه‌رشارن له‌ بۆشایی ..

 

 

فریشته‌ چاویان

به‌ نیگه‌رانی ده‌شۆن

به‌دوای خه‌ونێكه‌وه‌ نایبینن ،

وێنه‌ی ئه‌و په‌ڵه‌ هه‌ورانه‌ی

له‌ ئاسمانی ئێمه‌دا چڕ ده‌بنه‌وه‌

به‌سه‌ر خاكی دی ده‌بارن …

 

 

 

كۆلاج – نه‌ژاد عه‌زیز سورمێ

كاروانی زێڕپۆشی پاییز

باریان له‌ ته‌نیشت ته‌لبه‌نده‌ نه‌غمه‌داره‌كان

لێ خستووه‌ ..

بێ هه‌‌ست ..

بێ گیان ..

به‌ سیمای ڕووشاوی ڕۆژگاره‌وه‌

له‌ موچڕكێكدا ده‌رده‌كه‌وێ ..

په‌یمانه‌یه‌ك ،

له‌ شه‌رابی دره‌وشاوه‌ی په‌رییان ..

چه‌ند چڵێك

له‌ ڕوناهی ئه‌و ئاگره‌ی

هه‌‌ڕه‌شه‌ی پێ ده‌كرێ ..

پرسیارێكی سه‌رده‌منوێنه‌ …

 

 

 

هاونشین،

بێ وه‌ڵام …

چاڵی گومڕایی،

مێژووگوزه‌ر …

كۆن،

له‌وه‌ته‌ی دونیا هه‌یه‌ …

نوێ،

چه‌ند چركه‌یه‌ك له‌مه‌وبه‌ر …

دوورگه‌یه‌كمان

به‌ خۆمان دروست كرد،

لێمان نه‌ڕوانی

ساویلكه‌ به‌ خۆمان ده‌چووین :

 

 

كۆلاج – نه‌ژاد عه‌زیز سورمێ

باران له‌ ئامێز و

فرمێسك به‌سه‌ر شانه‌وه

ڕۆحمان ڕوو له‌ هه‌وراز …

چاوه‌ڕوان،

په‌نجه‌ره‌یه‌ك بكرێته‌وه ‌…

په‌نجه‌ره‌

نه‌كرایه‌وه‌،

له‌ بێخه‌وه‌ هه‌ڵته‌كا …

له‌ شه‌شپاڵووی كه‌ڕولاڵمان

زیاتر نه‌دی !

كه‌ بووه‌ به‌ قولله‌ و كاژی دڵمان،

له‌ سواڵی به‌ر ده‌رگای ئاسۆدا

قوڵنگی بۆ بخه‌ینه‌ سه‌رشان …

 

 

چراوگ نه‌كوژاوه‌ته‌وه‌ …

فریشته‌ جوانن

جوانن براده‌ر !

شاعیر باكی نییه‌

ئه‌وه‌ی لێی ده‌شارنه‌وه‌ ،

به‌ خه‌ون ده‌یبینێ ..

له‌ به‌هه‌شتیش ده‌ربكرێ ،

دۆزه‌خیی قبوڵی ده‌كه‌ن .

باكی نییه‌ شاعیر

بۆ چه‌ند ئه‌ستێره‌یه‌كی كوژاوه

یا ئێواره‌یه‌كی كه‌یل

ئاو و هه‌وای لێ ببڕن .

ئاوازی مه‌ست باكی نییه‌

له‌ یه‌ك كاتدا به‌سه‌ر پێخه‌فی بێ چاره‌ییه‌وه‌،

سه‌رجێیی شادی و خه‌م ده‌كا …

له‌ یه‌ك كاتدا براده‌ر!

له‌و گه‌مه‌یه‌ی

ئاده‌مزاد

ناویان ناوه‌ جووتبوون ،

نقوم ده‌بێ ….

 

 

كۆلاج – نه‌ژاد عه‌زیز سورمێ

هاوارێك،

له‌ ڕه‌نگی زه‌ردهه‌ڵگه‌ڕاو و

سیمای قه‌وزه‌دارمانه‌وه‌

باڵدار ئاسا

ئازاد … شاد

ئاسمان ته‌ی ده‌كا.

دوور نییه‌ ڕۆحمان

بێدار بكاته‌وه‌ ….

 

 

 

ژه‌نگی دره‌ختان بوه‌رێنێ

ڕه‌نگه‌كان،

كه‌ شه‌ویان به‌سه‌ر دادراوه‌

به‌ به‌نده‌ری سۆزدا بگه‌ڕێنێته‌وه‌

كژێك دا بێ

نیشتمان

به‌ چاوی كوێریشه‌وه‌ ببینرێ .

       ئۆكتۆبه‌ری 2017‌‌

 

 

 

تایبه‌ت به‌ كولتور مه‌گه‌زین –
ڕێنوس خاڵبه‌ندی تایبه‌ته‌ به‌نوسه‌ر خۆی.

You might also like More from author

error: Content is protected !!