مژده نـاوه‌خته‌كانی كـاوبا
نه‌ژاد عزیز سورمێ
به دیار گیانه‌ڵای خه‌ونه‌كانمه‌وه
(چه‌نگ)ی مێژووم له باوه‌شدا
ئاوازی مه‌حاڵ ده‌ژه‌نم ..
ئه‌سته‌مان به حیكمه‌تی قوڵنگ
ئاشنا ده‌كه‌م…
ئا…
ئێمه سێبه‌ری دره‌ختێكمان به‌س بوو
موچڕكه خه‌وتووه‌كانمانی
پێ بێدار بكه‌ینه‌وه ..
تیشكه ڕه‌شداگه‌ڕاوه‌كانی ئارامی
له تووله‌ڕێ و یـاڵ و به‌نده‌نان وه‌ربگرینه‌وه..
فرمێسكمان جۆگه‌ی
به‌سه‌ر ڕه‌شایی شه‌ودا ده‌به‌ست
شه‌به‌نگی خه‌مبار
له جه‌ژنی گومانداراندا
ده‌نگوباسی ئه‌هلی دڵی ده‌گه‌یاند..
فرمێسك بكوژ بوون
ئه‌وه‌ی له‌و شه‌وه‌دا ڕشتمان
هه‌وای كۆنه‌پارێزی لێی دابوو
سێبه‌ری ئاگردانێكی كوژاوه بوو
مه‌رگی ناوه‌ختی
له تۆغیانی ژیاندا پێشانداین.
به‌ره‌به‌یانێكی سۆزانی ،
كه دووكه‌ڵێكی ده‌قنه‌شكاوی ، خوێناوی ، بێ چاندی
لێ هه‌ستا
زرنگانه‌وه‌ی په‌رێشانی بوو
به‌ری ئاسۆی لێ گرتین ..
ئه‌وسا ،
مژده ژه‌نگگرتووه‌كانی كاوبا
له گۆشه‌ی جیا جیاوه
ده‌ستی له ساویلكه‌ییمان ده‌گێڕا ..
ئیتر نه‌ما
دڵ ئاوێنه‌ی دڵ بێ.. نه‌ما
نه‌ما كچان
به خۆیان و ملوانكه ساده‌كانیانه‌وه
ئاینده‌یان
له داڕژانی ئه‌ستێران ببینن
یا وانه‌یه‌ك
ته‌نێ وانه‌یه‌ك
له بارانه‌وه فێر بن..
هه‌ور ناناسینه‌وه..
باران ناناسینه‌وه..
یاده‌وه‌ریه‌كانمان،
به خاڵه سپییه‌كانی خه‌ڵوز ده‌بینین..
به مه‌ته‌ڵێكی هه‌ڵنه‌هێنراو ده‌وره دراوین
ئۆردووی خه‌یاڵبازان
كه تارماییشیان نابینرێ
شه‌شده‌ری ڕوئیاكانمانیان
به چڵی هه‌ڵچووی تاسان گرتووه
ئاگرمان پێ ده‌دروونه‌وه
فرمێسكه قه‌تیسه‌كانمان پێ كون ده‌كه‌ن
پێخه‌فی به‌فرمان پێ ڕاده‌خه‌ن..
چه‌مكی سه‌رچڵیمان
به چه‌ند تیكتۆكێكی بێ واز ، بێ ئاره‌زوو
تێده‌گه‌یێنن..
ئه‌وه باڵانوێنی مرۆڤه ئێستا
سه‌ر به هاوینێكی پڕوكێنه‌ر
سه‌ر به زستانێكی تووش
به ئاوازێكی بابوێر
به ختووكه‌ی پێده‌شت
به مژده خۆشه هه‌ڵخه‌له‌تێنه‌ره‌كانی كاوبا.
سواڵی له‌باوكه‌وتن
پردی سه‌ر شه‌پۆله سه‌رشێته‌كان ..
خه‌نده‌ی كه‌مه‌ندان..
جه‌نگه‌ی نوخشه‌لێدانی
به‌ژنی گه‌رداو..
ستاندنه‌وه‌ی ڕه‌ندایه‌تی..
سه‌ڵا و كه‌باری جاڕ و ڕیكلامان
كه هه‌وا
له ئۆكسجینی هه‌ناسه‌سوار وه‌رده‌گرن..
چه‌شه‌خوازیی زیندانان
شاڵاوی گیرسانه‌وه و
ڕیتمی دادوه‌ری
له ده‌ركه‌زایانه‌وه‌یه…
ئه‌وه ئه‌و سه‌رده‌مه
وه‌رزی ڕۆژه‌ڤ و
سارده‌كێل لێك ناكرێنه‌وه ..
لووتكه‌ی چیایان
وێنه‌ی شاییه‌كی به‌ره‌واژ
له بیره نه‌وته بۆگه‌نه‌كان داوێین..
به تامی با
جه‌ربه‌زه‌یی ده‌رمانخواردوو..
ژیان
به ئاوازێكی نه‌شازی شه‌یپوورێكی شكاو نه‌شئه‌دار..
وره ، بڕست ، جه‌ساره‌ت
به‌رده‌ستی ڕووهه‌ڵگرانه..
دونیای جوان
ژیانی جوان
سرووشتی جوان
گریمانه‌یێكه
به قاڵبه‌سابوونێكی كۆڵێی جاران
سپێردراوه..
ئیتر هیچ له هیچ ده‌خوازرێ..
(گوناه)ی گوناه
له‌به‌ر ده‌رگای مزگه‌وت و كه‌نیسان
به ڕه‌ونه‌قێكی شكۆداره‌وه
ڕیزیان بۆ گوڵاڵه‌سووره‌ی
به‌ر په‌رچه‌می هێمنی به‌ستووه..
بێده‌نگی،
هه‌ڵایسانی بن بیره
ده‌بێ خوو
به فشاری قووڵ و بێدیماهی
شه‌وه‌وه بگرین..
هه‌وڵ بده‌ین بگه‌ڕێینه‌وه ڕه‌حمی یه‌كه‌م
قه‌شه‌نگترین و
ئه‌مینترین ته‌لار..
ده‌سبه‌تاڵی،
بزه‌ی لاله‌زارانه
سه‌رسام..
مه‌ستتر له مه‌ستی
له شه‌خته ساردتر
به‌دبینتر
له‌و په‌یمانانه‌ی
شانۆی پێ ده‌ڕازێنرێنه‌وه..
ڕه‌نگ له ڕووان نه‌ماو
شه‌رمن
له هه‌مان ئه‌و كاوبایه‌دا ده‌توێنه‌وه ،
ساوی ڕه‌شه‌با ده‌ده‌ن..
خه‌رقه‌ی كازیوه ده‌پۆشن
بۆ سه‌فه‌رێك
له بازنه‌ی گێژه‌نێكی ڕه‌وان ده‌خوولێته‌وه،
ژیان و مه‌رگی
پێ كڕاوه و فرۆشراوه..
شاخه‌كان هه‌ڵه‌یان كرد
كه‌ڕه‌نای میدیا
به‌رخه‌ل په‌رت و كۆ ده‌كاته‌وه..
ودمی به‌دنیهادی
شه‌هدی پێ ده‌كرێته شه‌ره‌نگ
زه‌نوێر
له سه‌ره‌مه‌رگدا
شه‌تاو ده‌ستیان به‌سه‌ردا دێنێ…
ئای له زیخه‌ڵانی ئه‌و سنگانه‌ی
یاده‌وه‌ریه ڕه‌شه‌كانی قووت دا
ژه‌نگی سه‌ر دڵه‌به‌ردینه‌كانی لادا
مه‌وسیمی باڵانوێن و كینه‌په‌ڕێنیان
بۆ كردین
به بووكه‌به‌فرینه‌ی خه‌یاڵی نه‌خۆشیان..
هه‌یبه‌تیان
له ئاهه‌نگێكی ئیرۆتیكی زڕدا
دایه‌وه شه‌وی كوێر
كه‌ڵه‌شێری به‌ناوه‌خت
تیا بانگ ئه‌ده‌ن..
برینی تێدا ده‌كولێنه‌وه ..
كه‌ڕه‌نای میدیا
سپتیتانكێكی بێ بنه
به ڕه‌نگی په‌لكه‌زێڕینه ده‌رده‌كه‌وێ
به ده‌نگی شمشاڵ ده‌گاته گوێ!!
ئای له‌و كلیلانه‌ی
له ته‌نیشت دڵمان دانابوو
ئه‌و كلیلانه‌ی
داماننابوو
گه‌نجینه‌ی هیوای پێ بكه‌ینه‌وه..
هاتن بێباك
به دڵه‌وه
خستیانه‌وه ناو سه‌رابی كاوبا..
هێللانه‌ی باڵندانیان به شیرازه‌یه‌ك ،
له ئۆده‌ی بووژانه‌وه كه‌وتبوو
كۆر كردنه‌وه ..
بۆنی ڕه‌نگ و
خه‌ونی ئاوهه‌ڵدێرانیان كوشت..
به‌رده‌وام بوون
له به‌رده‌وام بوون…
حوزه‌یرانی 2024
