کیمیای ئەدیرناڵین
ڕێدار فەریق شێخانی
for a Portrait of Lucian Freud, 1966. Bacon, Painting Series
دەمەوئێواران ،
سپێدەی ساڵحان،
لە قرچەی گەرما،
شەوە لێزمەکان.
ئەو ساتانەی حەسحەسەکان بەئاگان و
یان بێئاگان.
بە چنگەڕنێ و
بە سنگە خشێ..
دەتەوێ بەسەر ئەو دیوارە بەرزەدا هەڵزنێێ
ئەو شورا دێرینەی بەختەوەری
کە دەچێتەوە سەر دیوەکەی تری خۆت
وەلێ مەحاڵ
بە دارێکی دەستی ئینزباتە کلێتەسورەکانەوە
بە بێ دەربەست دەتخاتە خوار.
چەندان سی ساڵیی ئاوها تێپەڕیوەو
ئەم دەوارە شڕە
کە لە دووری چەند فرسەخێک
لە سنوورەکانی وەهم هەڵدراوە
گۆڕە یان مەنزڵ؟
یاخود چادری قەرەجەکان؟
لەمپایەکی زەیتیشی تیادا ناسوتێ،
هەموو جێنشینەکانی شەوکوێر-
بێ چاویلکە کتیبە سپییەکانی مۆندێرنێتە
دەخوێننەوە!
دەڵێی تۆو ئەو چارشێوە
قوماشێکن و بەبەرگی یەکا دووراون
دەڵێی تۆ و ئەو پۆشاکە قەترانیە
کفنێکن و
لە منداڵییەوە لە تەنیشت یەکدا دانراون
دەڵێی ئەدیرناڵین-
کیمیایەکە
تەنیا هۆزەکانی ئەمازۆن
پێکهاتەکەی دەزانن!
یان مشتێ جادوی رەشە
لە بیری بەرهووت پەرتکراوە!
وا لە قووڵایی هزرا عاسی و
بە هیچ کلۆجێ جەم نەکراوە..
لەودیو دیوارەوە دەنگێ دەڵی:
رەنگە بەختەوەری
زۆر نزیکتر بێ
لە گیزەی ئەو مێشەی
شەوێك لەسەر کۆڵی رووداوەکان
لە لووتت دەرهات
کە تیایدا خەونت
بە پاشماوەکانی پاشەڕۆژەوە دەدیت،
دوای نەکەوتی!
تابزانی
سەر بە چ کونجێکا دەکا
لەوێ
فریشتەی بەختەوەری
بە پۆشاکێکی ئاوریشمینەوە
چاوەڕوانی چ دەکا؟
