ئێمە کە بە خێرایی شەڕ گەورە بووین
شیعر لە ئەدەبیاتی بێگانەوە
چاپی یەکەم ٢٠٢٢
هەڵبژاردن و وەرگێڕانی لە عەرەبییەوە: نەژاد عەزیز سورمێ
دیوانێکی سێ سەد لاپەڕەیی قەشەنگ، گەشتێکی شاعیر `نەژاد عەزیز سورمێ`ە بە نێو شیعری جیهاندا، هەر لە عەبدولوەهاب بەیاتییەوە بیگرە تاوەکو دەگاتە چارلس بۆکۆفسکی و تاوەکو لە خەڵوتگەی `جەلادینی ڕۆمی` سروتێک دەکات. نەک هەرئەوە بەڵکو شاعیر بە سەلیقەی شیعرییەوە، کورداندنی قەسیدەکانی `فازڵ عەزاوی` و `فلیەح حەسەن`ی شاعیرمان پێ ئاشنا دەکات و دووبارە لە ماڵی جوبران خەلیل جوبران ڕاماندەگرێت.
چاپی یەکەم ٢٠٢٢ – هەڵبژاردن و وەرگێڕانی لە عەرەبییەوە: نەژاد عەزیز سورمێ.
شاعیر بە ئەوەشەوە ناوەستێت بەڵکو خوێنەر، ئاشقانی شیعر، دەباتە بەردەم دونیایەکی نەناسراو لەلای ئێمەی خوێنەرانی کورد، کە ئەویش شاعیرانی ئەفغانستانە هەر لە ؛ فاتیمەی ڕۆشنەوە بیگرە تاوەکو قەنبەر عەلی تابش و عاسف حسێنی و ئەلیاسی عەلەوی و زەهرای زاهیدی و چەند شاعیرێکی دیکە… هەروەک ئەوەی `نەژاد عەزیز سورمێ` بیەوێت پێمانبڵێت؛ ئا لێرەدا، لەم ئەفغانستانە، تەنها وڵاتی ئەفغان عەرەب و تالیبان و توندڕەوی و حەشیش و هێزە ناشرینەکان نییە، بەڵکو وڵاتی جوانییەکانی شیعرە کە لە دژی ئەم هێزە ناشرینانە لە جەنگدایە.
شاعیری وەرگێڕمان لە هەمانکاتدا شاعیرێکی وەک `پێسوا` و `جاک بریڤەر` و `سیلڤیا پلاس` و چەندەها شاعیری دیکەی ئەمریکای لاتین و ئیسپانیا و ئەمریکا و ئەوروپای لەیادنەکردووە و بە ڕیتمێکی جوانەوە، بە هەناسەیەکی شیعرییەوە موزیکی وشەکان و ئاماژە قووڵەکانیان دەدوێنێت.
ئەم کتێبە شیعرییە ` ئێمە کە بە خێرایی شەڕ گەورە بووین` ئەم گەشتە شیعرییە بەنێو شیعری دونیادا، یەکێکە لە کارە گەورەکانی `نەژاد عەزیز سورمێ` شاعیر. تەواو ئەو دیوانە جوانەمان بیردێتەوە `نوستوی بەرباران` کە لە سەرەتای هەشتاکاندا لە زمانی فارسیەوە وەریگێڕایە سەر کوردی و خوێنەری کوردی ئاشنا کرد بە شاعیرانی وەک؛ `ئەحمەدی شاملو` و `گوڵسورخی` و زۆریتر لە شاعیرانی هاوچەرخی فارسی.
نەژاد عەزیز سورمێ لەم کتێبی وەرگێڕانەدا، دەرگایەکی گەورە بۆ شاعیرانی گەنجی کورد دەکاتەوە، بۆ هیچ نا، بۆئەوەی لە پەلەکردنی نوسین قوتاریان بێت، و لە ژێر ماڵی شیعری جیهاندا پشوویەک بدەن… ئەم کتێبە شایەنی ئەوەیە لە کتێبخانەی هەموو ماڵێکدا بوونی هەبێت.
