نیشتمانه‌ باڵداره‌كان

نه‌ژاد عه‌زیز سورمێ

كولاژ - سورمێ
97
كولاژ – سورمێ

ئاگات له‌و ده‌نگانه‌ بێ به‌ ماندوویه‌تی دێن!

ئه‌و زیندانانه‌ت له‌بیر بێ خۆمان دروستمان كردنه‌وه‌!

ئه‌و ئاسۆیه‌ت بێته‌وه‌ به‌رچاو

هه‌موو له‌ هه‌مووی به‌خشش بوو..!

چیرۆكی نیشتمانه‌ باڵداره‌كان

لێره‌وه‌ ده‌ستی پێكرد:

خاك تووڕ درا بوو

له‌ شه‌ڕ و

خولیای خه‌مهێنه‌ر و

زه‌نگی بێزاری

لێ نه‌ده‌بینرا …

بینایی كز

كوێره‌ڕێگایه‌ك نه‌ما

هیوای تۆزاویمانی پێ بسپێرین!

ڕێژنه‌یه‌ك

له‌ ئاره‌زوویه‌كی ئه‌فسووناویدا خه‌مڵیووه،

به‌سه‌ر دارستانی دڕنداندا ده‌بارێ …

چڕتر له،

سێبه‌ری دره‌ختی كه‌ناران

كولاژ – سورمێ

ئاوی لێ كه‌سك ده‌نوێنێ …

شازاده‌یه‌كی ڕازاوه‌

پیاسه‌ به‌ شۆسته‌ و شه‌قامه‌ وه‌همییه‌كانی ده‌كا.

نیشتمانه‌ باڵداره‌كان

ئه‌وانه‌ی

له‌به‌ر شه‌ڕ و

خولیای خه‌مهێنه‌ر و

زه‌نگی بێزاری باڵیان گرتووه‌،

نه‌ مزگه‌وتیان تێدایه‌

نه‌ دێر و كه‌نیسه‌ و

نه‌ هیچ په‌رستگایه‌ك …

سێویان به‌ تاڤگاندا دێنه‌ خوار …

په‌یتوونیان

به‌ كووچه‌ و كۆڵانان دێ و ده‌چێ،

ده‌نگی سمی ئه‌سپه‌كانیان

له‌ بزاڤی ڕۆژانه‌ی

به‌رد و چه‌وی

ڕووبار و زێیان ده‌چێ.

په‌لكه‌گیا له‌و نیشتمانانه‌دا

هه‌ر ده‌مه‌ی به‌ ڕه‌نگێ ده‌رده‌كه‌ون.

دانیشتوانیان غه‌مگینیش بن،

شیرینی له‌ ژاڵه‌

كولاژ – سورمێ

شادی له‌ خه‌م هه‌ڵده‌هێنجن …

مردووه‌كانیان ده‌خه‌نه‌وه‌ سه‌ر زه‌وی.

مۆسیقایان به‌ ڕیتمی فڕینیانه ‌…

گۆرانییان،

باسی مه‌ستی و

په‌سنی هه‌وای خوا و

ئاسمانی فراوان و فره‌چین ده‌كا.

مێژوویان،

له‌گه‌ڵ مێژووی هه‌ڵۆ و

قومری و

چۆله‌كه‌ و

قورینگ و

نه‌وره‌سان دایه‌ …

قوتابخانه‌ و نه‌خۆشخانه‌ له‌و نیشتمانانه‌دا

له‌ میوانخانه‌كانی خواوه‌ند ده‌چن …

زانست،

له‌ ئیكسیری وردبوونه‌وه‌ و

كوانووی ڕوونبینی و پۆشته‌كردنی با و

ماكی گه‌وهه‌رناسی و

مژده‌ی مه‌رگی له‌خۆنووسان فێر ده‌بن …

مێژوو،

له‌ كۆیله‌یی و پێناوی و گومڕایی زه‌وی …

ده‌رمان،

له‌ ڕه‌نگی كازیوه‌ و

تریفه‌ی نیوه‌شه‌وانی مانگ و

فه‌لسه‌فه‌ی ئه‌شكه‌نجه‌

دروست ده‌كه‌ن.

كولاژ – سورمێ

نیشتمانه‌ باڵداره‌كان

به‌ ده‌گمه‌ن شه‌ڕیان تێدا ده‌بێ

شه‌ڕ له‌و نیشتمانانه‌دا

وه‌ك شه‌ڕی

نیشتمانه‌ وه‌ستاوه‌ بۆگه‌نه‌كانی

سه‌ر زه‌وی نییه ‌…

له‌وێ ڕكابه‌رایه‌تی

له‌سه‌ر

به‌رزفڕی و

بڵاوكردنه‌وه‌ی ئۆكسجین و

جوانیناسی و

فه‌نتازیای ئاواز و

هه‌نیه‌ و گۆنای دره‌وشاوه‌یه ‌…

ژنان له‌و نیشتمانانه‌دا

به‌زه‌رده‌ی به‌یانی و

نه‌شئه‌ی خه‌ون و

سۆمای سروه‌ و

سێبه‌ری پاكیزه‌كانی چیا

خۆیان جوان ده‌كه‌ن.

باڵایان

له‌ خه‌نده‌ دڵگیرتره‌ …

نیشتمانه‌ باڵداره‌كان

ئاژه‌ڵی دڕنده‌ی لێ نییه،

هه‌موو ئاژه‌ڵه‌كانی دۆستی مرۆڤن

هه‌موو مرۆڤ دۆستی ئاژه‌ڵ.

پێوه‌ندی له‌و نیشتمانانه‌دا:

كولاژ – سورمێ

هه‌موو به‌رپرسیاره‌ له‌ هه‌موو …

پاشا له‌و نیشتمانانه‌دا

له‌ كرێكاری كارگه‌كان ماندووتره‌

باڵی فڕین، فڕینی نیشتمان

پاشا ڕایانده‌وه‌شێنێ …

به‌ شنه‌بای تۆقه‌ڵانانیان

خۆیان فێنك ده‌كه‌نه‌وه‌.

نه‌وت و گاز و كانزای لێ نییه‌

چرا و گڵۆپ و سۆپاكانیان

به‌ شیعر و مۆسیقا كار ده‌كه‌ن

ماڵێك له‌ مانگێكدا

چه‌ند كۆپله‌یێ شیعر و

چه‌ند پارچه‌ مۆسیقایه‌كی به‌سه.

شیعر و مۆسیقا

له‌ ئاسمانی هه‌ره‌ به‌رزه‌وه‌

به‌سه‌ر كۆشكی پاشادا ده‌بارێ

ئه‌ویش به‌ یه‌كسانی

به‌سه‌ر هاونیشتمانیانی دابه‌ش ده‌كا.

شاعیران له‌ نیشتمانه‌ باڵداره‌كان

ئیره‌یی به‌ شیعری

ئاسمان نابه‌ن،

ئه‌وان جیاواز ده‌نووسن …

نیشتمانه‌ باڵداره‌كان

كولاژ – سورمێ

ڕۆژنامه‌ و ڕادیۆ و

ته‌له‌فزیۆن و ئینته‌رنێتیان نییه،

سه‌ر ئاسووده‌

پێكه‌وه‌ ده‌ژین …

فڕۆكه‌شیان نییه‌

خۆیان باڵیان هه‌یه‌ ده‌فڕن …

یه‌ك زمانیان هه‌یه‌

هه‌موویان به‌و زمانه‌ قسه‌ ده‌كه‌ن و ده‌نووسن.

تاكه‌ گرفتی نیشتمانه‌ باڵداره‌كان

هه‌ڵم و دووكه‌ڵ و

نیفاق و دووڕوویی و

هه‌وای پیسی زه‌وییه‌

زۆر جار ناچاریان ده‌كا

به‌رز و به‌رزتر ببنه‌وه.

 

ئابی ٢٠١٧

تایبه‌ت به‌كولتور مه‌گه‌زین –
ڕێنوس و خاڵبه‌ندی تایبه‌ته‌ به‌ نوسه‌ر خۆی.

You might also like More from author

error: Content is protected !!