عەشقەك ژ دەرڤەی مرنێ‌

کەوسەر شەوکەت

کەوسەر شەوکەت
69

ب سیمایێن پائیزی، ڕۆژ ل شەرگەها هەلاتنێ‌ پاشڤە دزڤریت،

ئاسمان چەند یێ‌ وێرەك بووی!

ئەز و تو دو گیانێن بەرمایكێن‌ شكەستناینە.

ئەز ب دەهمەنێن ب خوین و توزەوی و ب پرچەكا نیڤ كەزی ژ ڕەنگێ‌ شەرخوازامە!

دگەل چپكێن بارانان، زاڕۆیەكا نە ڕحەتم!

زاڕۆیەكم ژ نفشێ‌ خەونان!

خەونان ب دەریایانڤە دبینم …

ژ بو دیتنا یا لپشت ئەوران ئاڵوز دبم!

یاریان دگەل بای دكەم، شەری ب پەنچێن پشیكان دكەم.

ب وەریسی هیڤیێن خوە لبەر ڕۆژی دهەلاویسم.

سنێلەیەكم ژبو پاراستنا ئێكەم چیروكا خوە یا عەشقێ‌،

لسەر تێنڤیسا بەلگان ب چیكێن بارانان توماردكەم!

لناڤ پەیڤێن ب ترس خوە بەرزە دكەم،

ل شەڤەكا ڤیانێ‌ ژ فرۆتنا ستێران ب ماچەكێ‌ بەرپرسم.

ژ كودەتایا مێشكێ‌ خوە.

ژ یاخیبوونا هزران، ژ ئێخسیركرنا لەشی و حەزان بەرپرسم!

ژ ترسنۆكییا خوە بەرپرسم.

بێهنا باژێرەكێ‌ تالانكری ژ ناخێ‌ من دهێت،

كۆترەكا چەنگ بری خوە لناڤ دەستێن من گەڤزاندییە.

پیرەدارەكم، ژیانێ‌ ل ناڤەڕاستا بیابانێ‌ دحەوینم.

ل دارستانەكا كاڤڵكری بوهارێ‌ دفرۆشمە بەلگێن پایزێ‌!

تو ئەو رێڤینگی یێ‌ ژ جوانییا دووراتیا خوە تێهنەكێ‌ لگەل باڕۆڤەیان تەڤلی دەریایێ‌ دكەی،

دا عەشق نەبیتە حەز!

ئەگەر تو د چوونێن خوە دا نەبییە هاتن،

ل ناڤ میللەتێن عەشق كوژ نابمە لافاو و بو مرنێ ل پەی خەندقینێ نابەزم.

ل هنداڤی باژێرێ‌ عاشقان، ژ فڕینا بالندەیان، ژ برسقینا ستێران،

ژ هەبوونا مرنێ‌ و ژ هێزا بای و باڕۆڤێ‌، گومانێ دبەم؛ ژ وێرەكییا ئەسمانی ب گومانم.

هێدی گاڤێن خوە دهاڤێژم. ل سەرێ‌ ڤان ڕێكان، ئاگرێ‌ عەشقەكێ‌‌ ڤەمرییە!

تو دبینی پشتی عەشقێ‌ چەوا هەر تشت د ڤەمریت و فەنادبیت!

هەر چەندی هەوە بڤێت، خەمێن خوە پاڤێنە من، چ دیدەڤان لسەر وێرانكرنا هەستان نینن!

چ زیندان بۆ تاوانبارێن ناخی هێشتا نەهاتینە دروستكرن.

هێشتا كەس ل سەر دۆسەیا دەستدرێژییا ڕوحێ دەستەسەر نەبوویە!

ل سەر ئاگرێ‌ دەروونێ‌ خوە ب رێڤە دچم!

كی هەیە ئاگەهـ ژ دەنگێ‌ من هەبیت؟

ئەزا چاڤەرێ‌ گولان هەلناگرم، نەژی گولان دچینم، تزبیێن خەمێن خوە دهەژمێرم.

ئەزم هەلگرا پارزینكێ‌ ڤیانێ‌!

تو زەڵامەكی ژ ڕەسەناتیا بارانێ، ژ فرینا بالندەیان …

سەركێشێ‌ شۆڕەشا وێرانكرنێی …

فیرعەونێ‌ دەستهەلاتا عەشقێی، پارچەیێن من لناڤ هەمی دەستهەلاتا خوە بەلاڤكرینە …

جەهنەما ڤیانێی …

تو ئەو مرنی یا ژ مرنێ‌ مای…

ل هەمی ڕۆناهیان شەڤا منی …

تە ئەز یا كریمە سوارچاكەكا شەركەر!

ژیانێ‌ هەمبەری مە شكەستنا خوە ڕاگەهاندییە.

ڕۆژەك دێ هێت، دێ‌ هەمی زانن، تو چەند ئەفسانەیەكا ڕاست بووی!

تو ئەو بووی، یێ‌ تە ئەز بەر ب ئەسمانان بریم و

بۆ دیتنا جیهانا ل پشت ڕۆژێ‌ دەستێ من گرتی و فێری ئاشكراكرنا نهێنییێن گەردوونی كریم.

تو دبینی باجا عەشقێ‌ چەند ژ یا شەری گرانترە!

هەرە، هەرە، هەرە، گیانێ‌ من! دگەل بای و باڕۆڤان هەرە،

خوە بەر ب ئاسمانی بلند بكە، چیایان هەمبێز بكە، ستێران ماچ بكە، سروشتی ئازاد بكە.

كۆپەكێ‌ ڤیانێ‌ دگەل فڕەكا بای د دەستێن عاشقەكی دا تێرا ژیانكرنێ‌ هەیە.

بەرێ خوە بدێ‌ عەشقێ‌ چەوا ئەز كرمە كەسەكا دلبەست و ژیانخواز.

تو دبینی دگەل عەشقێ‌ چەند نهێنیێن ل تاریاتیا شەڤێ د بەرزە خوە دفروشنە ڕۆژێ؟!

ئەی عەشق لناڤ تاڵانان تو تاكە ئیمپراتۆریەتا بهێزی،

تو دبینی تە چەوا ئەز كرمە گەمیڤانەك ل ناڤەڕاستا دەریایێ و دگەل بای ناكوك ببم؟!

ئەوا لبەر لێڤا دەریایێ‌ دهێتە دیتن، نە ئارامی و بێدەنگییە!

ئەو بنئاخكرنا هەمی هەست و حەزێن دو عاشقێن ترسنۆكە.

ژ تۆزێ‌ بپرسن، چەند هیڤی دگەل خوە برینە؟

ئەوا ژ ناخێ‌ من بۆ بای دچیت، ئەوە یا نەهێتە هەبوونێ‌!

ئەزم شەرڤانەكا قەندیلی، شەری ب سروشتی نافرۆشم،

شەری ب ئاسمانی و قەدەرێ دفرۆشم!

تو سەركردەیەكێ‌ زیندانكری!

پێنۆسەك د دەستێ‌ مندا بیت بەسە، لسەر تەڤایا كاغەزان بكەم خوەپێشاندان!

تو ژ نفشێ وان میللەتان نینی یێن كەفتینە ل پشت شفشێن ترسێ‌!

ئەزژی ئەو پەری مە، یا ژ دەریایێ یاخیبووی‌،

فێری زمانێ‌ ئاخێ‌ و گیا و چیا و گول و باڵندەیان بوویم.

ئِەز ژ نفشێ ئاگریمە …

زیندانیا قەفەسێن ڕەشپوش نینم.

ئەز و تو بووینە كیژان ئیمپراتۆر؟

 

ڕێنوس و خاڵبه‌ندی تایبه‌ته‌ به‌ نوسه‌ر خۆی.

You might also like More from author

error: Content is protected !!