ده‌روێش عه‌بدوڵا

بەرد مەگرنە (دەروێش عەبدوڵڵا) 


Loading

ڕێبوار حه‌مه‌تۆفیق

پاش کەمێک گەڕان بە دووای ژیاننامەکەیدا، بۆم دەرکەوت کە نەک هەر زانیارییەکی ئەوتۆ لەسەر ئەم ـ بە وتەی گۆرانی شاعیرـ (فریشتەی مۆسیقا)یە نییە، بگرە ئەوەشی کە هەیە پڕە لە دژایەتیی و وتی وتی بێ بنەما؟!

– سەیرم لێ دێت؛ هەڵەبجەییەکان خۆیان بە خەڵکی شاری شاعیر و هونەرمەندان دەزانن، کەچی دوو دێڕیان دەربارەی نەنووسیوە!؟

– سلێمانییەکان خۆیان بە (ئەهلی دانش) و پایتەختی ڕۆشنبیریی دەناسێنن، کەچی زانیارییان لەسەری پێ نییە!؟

سەندیکای بە سەدان ئەندامی هونەرمەندانمان هەیە، دامەزراوەی کەلەپووریی و کولتوریی پڕ پارەمان هەیە، تەلەڤزیۆنی زۆر و کۆلێژی هونەر و پەیمانگا و بەشی مۆسیقامان هەیە، بەڵام تا ئێستا دوو کتێب و لێکۆڵینەوەمان تایبەت بە مێژووی مۆسیقای کوردی نییە!؟


ئەو تاقانە وێنەش کە هەیە و (بابی لالۆ – كه‌مال ڕه‌ئوفی نوسه‌ر) خۆی بە خاوەنی دەزانێت، دیار نییە کە بە چ پێوەرێک وێنەی دەروێشە!؟

(جەمال بابان) لە (ئیبراهیم باجەلان) و ئەمیش لە (ڕەشید هەورامی) دەگێڕێتەوە کە؛  دەروێش عەبدوڵڵا، زمانی فارسی و تورکی و هندی زانیوە و ماوەیەک لە سوپای لیڤی ئینگلیزدا کاری کردووە…

باشە کەسێک ئەم توانایانەی هەبێت، چۆن (محەممەدی مەلا کەریم) وا باسی دەکات کە؛  دەروێش لە سسیەکان و چلەکانی سەدەی ڕابوردوودا بۆ کارکردن چووەتە بیارە و سەبەتەیەک خورماشی پێ بووە بۆ فرۆشتن؟!

ده‌روێش عه‌بدوڵا

لەو کلیپانەی کە وێنە و دەنگی دەروێش عەبدوڵڵایان لەسەر داناوە، وادەردەکەوێت کە دەروێش دەفژەن و دەنگبێژ بووە، کە چی وەک (گۆران)ی شاعی بۆمان باس دەکات؛ هەژارێکی قەدرنەگیراوی شمشاڵژەن زیاتر هیچ نەبووە!  (ئازاد حەمدی) لە (هەڵەبجە و کەسایەتییەکانی)دا باسی (مینەی لولکژەن) دەکات، توخنی دەروێش ناکەوێت!

(کامەران سوبحان) نەک لە پەراوێزی وەسفی (قالە مەڕە)دا نێوی دەهێنێت، بەڵکو مەدالیای شیعرەکەی (گۆران)یش کە بە نێوی (بۆ فریشتەی مۆسیقا)وە بۆی نوسیووە، لە بەرۆکی دەروێشی دەکاتەوە و دەیبەخشێت!؟

(ناسری حوسامی) بە هەمان نێوی (فریشتەی مۆسیقا)کەی گۆرانەوە، هۆنراوە بۆ (قالە مەڕە) دەنوسێت!؟ من هەرگیز بەم قسانە لە شکۆی مەڕە کەم ناکەمەوە، بەڵکو غەدرێک لە وێنەی جوانی ئەویش بە بەردتێگرتن دەزانم کاتێک هەندێک لە غازفرۆشەکان بەیانیان زوو خەڵکی پێ ناڕەحەت دەکەن!


دەربارەی دەنوسن؛  دەروێش دوای ئەوەی لەگەڵ (فەتم)ی حەزلێکردووی لە قەرەداغ بە یەک ناگەن، گەڕاوەتەوە بیارە و بێوەژنێکی هێناوە و دوو کچی لێی بووە. بەڵام تا ئێستا کەسێک نەیگوتووە من نەوەی دەروێشم!

(گۆران) بە کەسێکی (هەژار و نەدار و بێکەس)  ناویهێناوە و هێندەی هەموو حکومەتی هەرێم و دامەزراوە و نوسەر و هونەرمەندەکانی، جوانتر وەسفی دەروێش عەبدوڵڵای کردووە کاتێک دەڵێت:


بەڵێ، دیارە، لەناو قەومی بەسیتا قەدری سەنعەتکار
وەکو عەکسی قەمەر وایە لەناو حەوزێکی لیخندا
بەڵام تەختی ڕوفاهـ و تاجی حورمەت میللەتی هوشیار
بە ئوستادێ ئەدا وەک تۆ لەناو شمشاڵی کون کوندا!

 

 

ته‌واو

تایبه‌ت به‌ كولتور مه‌گه‌زین
ته‌نها دانانی لینكی بابه‌ت ڕێگه‌پێدراوه‌.

 

 

فه‌رموون له‌گه‌ڵ نمونه‌یه‌ك له‌ گۆرانیه‌كانی ده‌روێش عه‌بدوڵا: