ڕەشەبا

ڤان شێرزاد – شیعر

Painting by Picasso
339

ڕەشەبا

ڤان شێرزاد

 

 ڕۆژێک لە چوقی چڵی دارێک کەوتمە سەر زەوی،

میوەی پێگەیشتوو نەبووم، گەڵای پیریش نەبووم.

من کرمێکی تازە بووم، ڕەچەڵەکی  خۆم نەدەزانی،

کەوتمە بەردەمی باڵندەیەکی برسی.

 

 زامی نوک بەنوکی، بەسەر پشتمەوە دیاربوو، گینگڵم دەدا.

دڵم نەبوو، ئەگینا لەدڵی خۆمدا دەمگووت؛ نەمدەویست نە کرم بم،

نە باڵندە،

نە داریش بم…

 

 دەموویست ڕەشەبابم،

هەر کات ئازارم هەبوو هەڵبکەمە گەردەلوولێ

 ئافاتێک بەرپابکەم،

 قەڵەڕەشەکان بەسەر دارەکانەوە هەڵفڕێنم

 چاوی باڵندەکان کوێر بکەم مشک و

 جرجەکان بگەرێنمەوە قڵیشانەکانی برینی زەوی.

هەر خۆم هەڵبکەمە تووڕەیی و هەرخۆشم کپ بم و دابمرکێمەوە.

 

 ئێستاش ڕەشەبا نیم، لەناو سکی ڕەشەبایەکم

 نە خۆم هەڵدەکەمە تووڕەیی و نە خۆشم ئارام دەبمەوە.

 بە ئاڕاستەی بایەک دەڕۆم،

کە  پێچەوانەی ویستەکانم هەڵدەکات.

تایبه‌ت به‌ كولتور مه‌گه‌زین – بیروڕاكانی بابه‌ت و ڕێنوس خاڵبه‌ندی تایبه‌ته‌ به‌نوسه‌ر خۆی. كولتور مه‌گه‌زین. ته‌نها دانانی لینكی بابه‌ت ڕێگه‌پێدراوه‌. هه‌موو په‌ره‌گرافێك و پۆستكردنێك بێ دانانی لینك و ناوی نوسه‌ر و گۆڤاره‌كه‌ دژی یاسای كۆپی ڕایته‌ و لێپێچینه‌وه‌ی یاسایی له‌ دوایه‌. ‌

You might also like More from author

error: Content is protected !!