لەژێر هێڵی سفری سیاسەت دا

نیگار نادر

نیگار نادر
696

لەو ڕۆژگارەی ئێستادا

کۆمەڵگه‌ چاڵێکە لە چڵکاوی سیاسەت دا پەنگ دەداتەوە

نوسەر و ڕۆشەنبیرانیش

تونێڵێکی تاریکن

سیاسەت لەناویاندا دەنگدەداتەوە …

 

 

هەرسیاسیەک ئەگەر سەرپێچی لەیاسا نەکات

لەخەتی سوری گەندەڵی نەدات

وەک پووشی بەربا بزر دەبێ و

 بەهەوادا دەڕوات….

 

 

گەندەڵچێنەران پێیانوایە؛

گرنگ نییە چەند گەندەڵسازی ، گرنگ نییە چەند گەندەڵپەناهی

بەڵکو گرنگە چەندە گەندەڵتروکێنەری

ئەوجار کەسایەتیەک، سیاسیەکی بێ

ڕکابەری.

 

 

میدیا داوەڵێکی سیاسیە

هەموو داهێنان و ئازادیەک دەڕەتێنێ و گەندەڵی سواخدەدات، بەتیژترین دەنگ و ڕەنگ، بازرگانی هۆشبەری گشتی کۆمەڵگا برەو پێدەدات…

 

 

زمانی کوردی نزیکی تێکشکانە

ڕۆژی هەزارەها وشەی لێ شەهید دەکرێ، هەزارەها دەستەواژەی دەستبەسەردەکرێ، بەهەزارەها وشەی بەعەرەبی زیندبەچاڵ دەکرێ، ڕێزمانیشی بەزمانی تورکی دەقرسێنرێ و  بەزمانی ئینگلیزی هاوردە دەکرێت…

 

ئەو سۆشیال میدیایە ئەوەندە شەکر ڕێژە

ڕۆژانە بەهەزاران مێشەنوسەر پەروەردەدەکا و هەزاران مەگەزی ڕۆژنامەنووس بەدەوریدا هەڵدەفرێ، بەهەزاران مێشە سیاسی لیێدەنیشێ  و لە ڕێگەیەوە پێدەگا، بەسەدان  مێشەهونەرمەند دروستدەکات، بەهەزاران ژنی زڕەمێش دەکاتە ئەستێرەو بەناوبانگیان دەکات .

 

 

ئێرە دەریا نییە  ئێستای کوردستانە

ئەو کوردستانە هەرچەندە زۆر زۆر لەدەریا دوورە بەڵام دروست دەریا خەسڵەتە ، زۆربەی هەرە زۆری دەستەبژێر و هەر مرۆڤ  و هەرشتێک کە بێسەنگ بێت، تێیدا ئاسان بەرزدەبێتەوە   و بەسەردەکەوێ، هەر کەس و هەرچ شتێکی سەنگی تێیدا مابێ نغرۆ دەبێت و کەس نایبینێتەوە.

 

پلەو پەڵە

پلە گەورەترین پێوەرە، لەبەرئەوە هیچ گرنگ نییە مێژووت چەند پەڵەی ڕەشی پێوەیە، گرنگ ئەوەیە چەند پلەت پێبەخشراوە…

 

نەوتبازی

لەو سەردەمەدا ئەگەر  سیاسەتمەدارێکی چەند کارامە بێت، قومارمەدارێکی چەند یاریزان بێت، بەڵام ئەگەر نەوتبازێکی چەتەو چەور نەبێ، ناتوانێ بچێتە ناو هیچ هاوکێشەیەکی سیاسی لە جیهاندا.

 

چۆن دەچیە سەرێ

ئاگاداربە بۆ بەناوبانگ بوون و  بوون بە  سیاسی  و بەدەستهێنانی پلەو پێگە، نە زانست، نە شکۆ پێویستە.

تەنها (بدە بەرێ دەچیە سەرێ) *

 

ڕاپەڕین گشتی بوو

بەڵام لەوەڕگەی تاک تاکی دروستکرد، دیکتاتۆرێکی گەورەی سەرەوژێرکرد و سەدان جۆر دیکتاتۆری گچکەی لەجێی دروستکرد…

 

ژیان دوو تەختی یەکلاکەرەوەی تێدایە

تەختی نەخۆشخانەو تەختی دەسەڵات، لەسەر هەریەک لەو تەختانە هەموو کەس باش دەناسی، یارو نەیار هاوڕێ و هاوپشت ،دۆستی مان و نەمان و دوژمنی وەک دووپشک و مار.

مێژووی ئەو کوردە

پڕپرە لە لەدەستدانی هەلی مێژوویی و دەستەبەرکردنی هەڵەی میژوویی.

 

مێشەکان لە پیسی دەنیشێن و کۆدەبنەوە

لەو سەردەمەدا مرۆڤەکان هەمان خەسڵەتی مێشیان هەیە، بۆیە ئەگەر مرۆڤێک پاک بێت ئەستەمە چواردەورەی قەرەباڵغ بێ و بەتەنها دەمێنێتەوە، بەپێچەوانەوە ئەوانیتریش هەمیشە خەڵکێكی زۆریان بەدەورەوەیە .

 

 

ئاگاداری بۆ وەزارەتی سامانە سروشتیەکان

ئێوە بەرپرسن لە شێواندنی سروشتی سیاسەت و سروشتی نیشتیمانپەروەری و سروشتی سامان لەهەرێمی کوردستان.

 

Negar nadir/ London2017

*پەندێکی کوردیە

 

 

تایبه‌ت به‌ كولتور مه‌گه‌زین
ته‌نها دانانی لینكی بابه‌ت ڕێگه‌پێدراوه‌.

You might also like More from author

Comments are closed.