گازی مرنێ بكەن دا بهێت پرتێن خوە یێن نسیای ب ڤێ ژیانێ ڤە خرڤەكەتە سەر ئێک، ل ڤێ پارچەیا ئەردی كوشتن هەر ڕۆژ ل بەر من را ھاتن و چوونێ دکەت، سلاڤێن مرۆڤاتیێ ل مە دكەت، تف ل وێ سێڤێ بن ئەوا مروڤەكێ بەندە كریە بوونەوەرەكێ یاخی، تف ل وێ عەشقێ بن ئەوا هەر رۆژ دئینتە بیرامن چیرۆكا مە ژ كوشتنێ دەستپێكریە، وای هەوار بۆ ڤێ شانۆگەریێ، كەنگی دێ پەردە ل سەر هەر تشتی هێنە گرتن؟ نە نۆتێن میوزیكێ، نە کەڤالێن ڕەنگكری و نە گولێن بوهاران، دەربرینێ ژ ژیانبوونێ دکەن، دناڤبەرا من و تەدا پەردەكێ هەلاویستی نینە، نە ئەزم بینەر و نە توی دەرهێنەر، دناڤبەرا من و تەدا كەلەخێن مریان و رەنگێ خوینێ و قێریێن زارۆیانە، تف ل براتی و ئاشتیێ بن، كەنگی جیهان جهێ ترسنوكایە، خودای ژ خەو شیار بکەن، ئەسمانا بەرەڤ هەسارەكا دی فرێبكەن، دەنگێ چەکی ناچیتێ، ل پارچا ئەردێ مە یێ کاڤلكری و ب روندكێن وێ زارۆیا پێخاس هزار سێڤا لێ بچین دا سپێدێ دەینێ خۆ بزڤرینی.
پەنجەرا ژوورا من ئێدی شیان نەماینە داڤێن پرچا من تێكەلی بايێ ژ دەرڤە بكەت، ژیان چەند هەناسەكا كوژەكە، تف ل وان هەمی رۆمان و هەلبەست و چیرۆكا بن ئەوێن شیان نەبن دەربرینێ ژ هەر شەش پیتێن ناڤێ تە بكەن، وای هەوار بۆ وان سەحكرنا تو چەند زەلامه كێ جودا بووى دەمێ ب هەمی غرۆر تە دگۆت” ئەز قەھرەمانێ خەونێن خوداوەندەكێ مە، من ئەو شیان هەبوون كچا خودای ل خۆ عاشق بكەم”
ئەز چەند رەنگێ وێ شانۆیا بێ ئەكتەر ددەم، ئەڤ باژێرە یێ بەلنگازە، بكەنە هەوار دا شانۆیەك ژ دایك ببیت، رەنگێ بارانێ و بێهنا ئاخێ هەلباسكی نێرینێن عاشقەکا هەژار بكەن، چەند ئێتیم ل سەر دەپێ شانۆیا تە ژ دایكبوونە، تو چەند زەلامەكێ ئاشۆپی بووی نە تە رەنگێ بارانێ دا نە ژی یێ ئاخێ، ب قاسی شۆرەشێن ڤی وەلاتی یێ بێ رامان و بێ ئەنجام بووی، بۆچی بوویە ئەفسانەكا نەمر؟! بوچی یە بوویە داستان و رێبازا دیرۆكا من؟! مانە من یا ژبیركری هەر شۆرەشە هەلگرێن خۆ دخوت؟ تە چەند قەھرەمانێن خۆ كرینە تێكستێن شانۆیێ؟
تف ل وێ خەریبیێ بن یا ژ دەرازینكا هەستێن كوژەك رۆناهیێ نەچار دكەت دەهمەنێن خو هەلدەت و پاپورا ژیانێ سەر ژ نوی بەرەڤ ئاقارەكێ نەدیار بدەتە رێ، من چەند باران كۆمكرینە هەتا كانیێن پەیڤان ل بیابانا هەستا بزێن؟ من ژیان ل چەند ئاقاران ب مێرگێن ژیوارەكێ تال خەملاندیە؟ ل بیرامنە كو بەژن كورتیا پەیڤێن من تێرا رامانەكا هەی ناكەن، تف ل وێ پرسیارێ بن یا رۆژانە ئەزەكا شورەشگێر دكرمە سەركردەكا خائین.
من دلێ خۆ ب چوار پەیڤێن عەشقێ و هەمبێزەكێ فرۆت، ل ستوتینگەها هەستان من هەرو دوهییا خۆ دسۆت و ئەڤرۆیا من هێش نەهاتیە، تو چەند زەلامەكێ سەیر بووی، پرتەك ژ تە ژ ئاشۆپێ بوو و پرتێن دی ژ ئالوزیان، تو وەكی وێ باروڤێ بووی یا ژ نیشكەكێ ڤە هەر تشتی رادوەستینیت، چ هەست نامینن، نەڤیان، نە بیرهاتن، نەژی هەبوون، ژیان ب هەمی دەربرینێن خو ڤە دهێتە كورتکرن، د چەند خولەكەكا دا، مینا وێ رۆناهیێ یە ل سەر دەپێ شانۆیێ، ب دروستی ئاها ل وی دەمی دیار دبیت مروڤ یێ د مەزنترین درەو دا، پەردەی ل سەر شانۆیێ بگرن، نەمن شیان هەبوون دەرهێنەری ببینم، نە ژی من باوەر كر كو ژیان نە پارچەكا شانۆیێ یە…