زریانێک هەڵدەکات

 بوخاری وشیار

بوخاری وشیار
431

تاریکاییەک دەبینم

پڕ لە شەهوەتی سپی

لە ژوورێکدام خەریکە بنیچەکەی بڕوخێت

لەژێر داروپەردووی مۆدێرنەدا

خۆم وەک سەگێکی تۆپیوو دەبینم

 

تاریکاییەک دەبینم

پڕ لە خەونی خەوتوو

لەهەسارەیێکدام پڕ لە زیندەوەری مردوو

ئێواران بەسەر دووکەڵی شارەکاندا پیاسەدەکەم

بەیانیان ڕۆبۆتێک هەڵمدەستێنێ

دادایزم؛ یۆهانیس بارگێلد Oktober 1892 -. August 1927 ڤینۆس له‌كاتی گه‌مه‌ی پاشاكاندا.
Die „Venus beim Spiel der Könige“

تاریکاییەک دەبینم

پڕ لە ئومێدی بۆگەنکردوو

لە حەوشەکەمدا ئینجانێک بارووت هەیە

لە گەڕەکەکەماندا باخچەیێک چەکی ڕەنگاوڕەنگ دەبینرێت

دارفیشەکێک لەسەری کۆڵان بۆمبی گرتووە

بەیانیان تانکێک دەمگەیەنێتە سەر کار

ئێوارانیش ناگەڕێمەوە

 

 

 

 

قوتابخانەیێک دەبینم

پڕ لە سەربازی پێنەگەیشتوو

منداڵێک خەریکە یاری بە فیشەک دەکات

مامۆستایێک خەریکی وتنەوەی وانەی جەنگە

گوێم لەدەنگی تۆپخانەیێکە نزیک

 

مزگەوتێک دەبینم

پڕ لە تارمایی سپی

لە منارەیێکەوە دەنگی ژنێک دێت دەگری

گوێم لێیە، منداڵێک بە ترسەوە

سوڕەتی ( تەوبە) دەخوێنێت

تەرمێک کراوە بە ئاڵا

بانگەشەی مەلاکان دەستی پێکردوە

بۆ بوون بە جێگیری خودا

لە تەوالێتی مزگەوتێکدا تا دەتوانم دەڕشێمەوە

بەیانی مەلایێک دادگاییم دەکات

دوو بەیانی لە جەهەندەم گۆرانی دەڵێم

 

کەنیسەیێک دەبینم

خاپوور

مەسیح لە ئاپارتمانێکەوە

شەوانە سەکسیفۆن دەژەنێت

داوای لێدەکەم بهێڵێت بخەوم

تادەتوانێت تفێکم تێدەگرێت

منیش دەڵێم: سوپاس…

 


ئه‌م شیعره‌ له‌دیوانی ؛  ” کووخەکەم لەمبەر دەریاچەکەیە” ٢٠١٨ – لاپەڕە ٥٥. بڵاوبۆته‌وه‌

 

You might also like More from author

Comments are closed.