کاری کۆلاژ - ٢٠٢٢ - نەژاد عەزیز سورمێ

هەندێ وردە تێبینی

 900 جار خوێنراوه‌ته‌وه

نەژاد عه‌زیز سورمێ

هەندێ وردە تێبینی

قەسیدە

نەژاد عزیز سورمێ

 

 

 

کاری کۆلاژ – ٢٠٢٢ – نەژاد عەزیز سورمێ

لەم مەقامەدا

کە زرنگانەوەی برینەکانمان ،

مێژوو بێدار دەکاتەوە

چ شەرابێک بنۆشین ؟

لەم شەوە تاریک و نوتەکەدا ،

کام ئەستێرە بکەین بە میوان ؟

لە شەقامە قەدیفەییەکاندا

لە سایەی بەفرکوشی عەدالەتدا ،

زایەڵەی سووتان گوێ دادەخا ..

گڕی ھاوار خەریکە چاومان کوێر دەکا.

 

 

 

 

 

 

کاری کۆلاژ – ٢٠٢٢ – نەژاد عەزیز سورمێ

(2)

نەوام دی تارای بای وادەی پۆشیبوو .

وەرزم دیتن بە ھەناسەی تۆ دەگۆڕان..

تارا نەبوو بابانوێران

نھێنی خوناوی ئێش بوو ..

ھەناسە نەبوو

شنەی قژی فریشتان بوو .

بە دەوری جوانی تۆدا ،

نیگەران ،

بێدەنگ ،

لوتکەیان دەگرتن ..

جوێباریان لێ دەدان .

 

 

 

(3)

کاری کۆلاژ – ٢٠٢٢ – نەژاد عەزیز سورمێ

تۆ دەوای ڕۆحی ماندوومی

سنووری تەم!

کەوشەنی کۆرپەی مرازان!

تەجەللای نەرم و ئاوازی

پیری موغانی نیازان!

تۆ دەوای ڕۆحی ماندوومی …

 

 

 

(4)

عاشق لە ژێر خاکیشدا غافڵ نییە ‌، بینایی!

کاری کۆلاژ – ٢٠٢٢ – نەژاد عەزیز سورمێ

ئەوە باخچەی ژیانە ،‌

گوڵی لێ دەکڕێ و دەفرۆشرێ ..

ئەوە باخچەی ژیانە

ئاتمۆسفیری گومڕایی تێدا دەگەڕێ .

 

 

 

 (5)

لە وچانێکی کورتدا

دڵم بە مەوسیمی گوڵان سپارد ..

لەگەڵ ھەمووان بەخشندە ..

بێبەختی دەرچوو

داوی بێبەختیی نامەردان .

 

 

 

(6)

باڵانسی باران و سرووشتیان تێکداوە ،‌

ھەرگیز بەتەنیا مەڕۆ !

ھەمیشە با ئاودەنگێکت لەگەڵدا بێ .

ھەرگیز بەتەنیا وەرێ مەکەوە!

سرووشت و باران باڵانسیان نەماوە .

 

 

کاری کۆلاژ – ٢٠٢٢ – نەژاد عەزیز سورمێ

(7)

مەرگ لە حەقیقەتی بێ سنوورەوە دێ .

ڕۆژانی خەمباری دەبێ بڕۆن  .

کام و ناکام لە نەخشەی تەمەندا چی دەگەیێنێ ؟

ئاوێنەی پێخوست ، ئاشنای تەنیا باڵ

مەرگ لە حەقیقەتی بێ سنوورەوە دێ …

 

 

 

(8)

پاساری گەڕانەوە ھێلانەکانیان

سەفەرێکی خۆش نەبوو

ئاسمان ڕەنگی تاریکی پۆشیبوو

ڕۆژ ئێوارەی تێدا نەمابوو ..

وشکەڕۆ ..

وشکەداوەت ، وشکە سەما ..

سەعاتی سفریان دانابوو …

 

 

 

(9)

پیتەکان بایکۆتی وشەیان کردبوو

وشە بایکۆتی ڕستە

ڕستە بایکۆتی پەرەگراف و

پەرەگراف بایکۆتی قەسیدە  ‌..

زنجیرێک ھەموویان ڕادەکیشێ

بەرەو کوێ ؟ کەس نازانێ

نە بایکۆتکردن کژی ھەبوو ، نە زنجیر …

 

 

(10)

ئەوەی نەیتوانی لە زەمەنی سەحەر ھەڵبێ .

ئەوەی کات یاوەری نەبوو کەنارێک بۆ ژیان دانێ ..

کاری کۆلاژ – ٢٠٢٢ – نەژاد عەزیز سورمێ

ئەوەی بواریان نەدا تامی عەشق و باران بکا …

ئەوەی ، ئەوەی دڵی من!

بێدەنگییان پێ پۆشی

ئەوەی فێریان کرد ھەر‌گیز

تا ھەتایێ خەو نەبینێ

ئەوەی :

… …… ….. …. …… .

…… ….. … …… ……

 

 

 

 

 (11)

باران مێژووییەکی لەگەڵماندا ھەبوو

ئێمە مێژووییەک ..

نووری جوانیمان

لە نمەی شەیدای ئەودا بۆ دەردەکەوت ..

گڕمان بە ڕێژنەی بەخوڕی

لە ڕۆحـــی خـــاڵیدا ھەڵدەستا ..

ئای کە چەند ڕاز و نھێنی پێ دەگوتین .

چەند شەوان خەونی خۆشی پێ دەدیتین .

ئێستا باران ،

ئەویشمان لێ زیز بووە

لە لێوپەڕینی ئاسمانان دەچێ

بەسەر وڵاتی وشکەڵانماندا …

ئای باران  ، ئازیزی نەژاد !

کەی شکۆی جارانت دەگەڕێتەوە ؟

ئای باران

گۆرانی حەوانەوەی خاک

خۆشەویستی مێرگ و شکارتە و بەندەنان .

 

 

ئەیلوولی 2011

 

تایبه‌ت به‌ كولتور مه‌گه‌زین – بیروڕاكانی بابه‌ت و ڕێنوس خاڵبه‌ندی تایبه‌ته‌ به‌نوسه‌ر خۆی. كولتور مه‌گه‌زین. ته‌نها دانانی لینكی بابه‌ت ڕێگه‌پێدراوه‌. هه‌موو په‌ره‌گرافێك و پۆستكردنێك بێ دانانی لینك و ناوی نوسه‌ر و گۆڤاره‌كه‌ دژی یاسای كۆپی ڕایته‌ و لێپێچینه‌وه‌ی یاسایی له‌ دوایه‌. ‌