تو تۆڤێ ژیانێی

چنار

تابلۆی ڕێبوار سه‌عید
200

کچا من …

چنار

ئەڤ ئێک ژ وان نامایە، کو ئەز دەربارێ رابۆریا تە دا بۆ تە دنڤیسم. ڤان تشتان دبێژم دا کو تو باشتر دمن بگەھی. من ژ وان چپکێن بارانا نەرم پر حەزدکر کو دەما من پەنجەرە ڤەدکر راستەراست ئەو چپک ژ سەر دێمێ من را دھاتنە خوارێ. وێ کێلیێ من ھەناسەیەکە کوور دکێشا و بەرددا. پاشی چاڤێ من ل وان ئاڤاھیێن بلند دکەت. ئەو ئاڤاھی مینا چیرۆکێن وان مرۆڤان بلند و درێژ بوو، کو د ناڤ وان ئاڤاھیێن بێسەرووبەر دا دژیان. ئەو قەلەبالخ دھاتە گوھێ من و ئەز پێ دحەسیام کو ژیان یا بەردەوامە، لڤینەکا سەیر و بلەز دکەتە وێ کۆلانا ئومرانیەیا ناڤەراستا ستەنبۆلێ دا. ھەرچەند من حەز ژ بێدەنگیێ دکر، چنکی د دەما بێدەنگیێ دا نڤیسکار پتر دشێن تشتێن بچووک بگەهینن ھەڤ، چیرۆکەکا ئەفسانە ب تەڤێ قەھرەمانێن تێدا بافرینن.

لێ ڤێ جارێ براستی ئەز نە ب تنێ بووم، د ناڤا من دا گیانەکە بچووک ژی ھەبوو. ئەو گیانا د ناڤ جانێ من دا تو بوویی کچا من. من ھێدی ھێدی گوھ ل دەنگێ دلێ تە ژی دبوو. دەست و پیێن تە ھێژ چێنەببوون. من نەدزانی کا تو کەچی یان کوڕ، تنێ د وێنەیێ دا مینا گلۆکەکێ ب قاسی کولمەکی خویادکری. ئەرێ، ژیان ب ڤی رەنگییە، بێیی کو خوە بەرھەڤ بکن ھندک راستھاتن ل گەل مرۆڤان چێدبن. راستھاتنا منا ڤێ دەمێ ژی دوگیانیا من بوو. تو راستھاتنەکا پر جودابوویی بەڕخامن.

یا پێدڤی بوو وەک ھەموو ژنێن دیتڕ دبن دایک خوە ژ کەیف و شاھیان ھلاڤێژم، ھەتا سەرێ من ل ئاریک ئانکو سەقفا بانی بکەڤێت و پەر و چەنگێن من چێببن و بفرمە ئەسمانان. لێ ببوورە من نەدشیا وە بکم. ژ بەر کو لەشی و ھەستێن من بەرھەڤ نەبوون ژ بۆ ڤێ سوپرایزێ. تنێ تشتەک دشیا من ژ ڤێ رەوشێ دەربێخت ئەو ژی نڤیساندن بوو. لێ ئەڤ جارا یەکەمینە ئەز وەسا ل لاپەرەکە سپی مەیزە دکم بێیی کو بشێم تشتەکی بنڤیسم. ب شێوەیەکی رەنگ ل پێش چاڤێن من بێتام بوون. ھەر تشت مینا ڤالاھیەکە کوور و بێواتە بوو. پەیڤان خو ژ من ڤەدشارتن، وەک کو ژ من سل بوون ، ل گەل من نەداخڤتن.

ترسەکا مەزن خو ب سەر ھەست و ھزرێن من دا دسەپاند، من نەدخوەست مینا ژنێن دیتر بم و تنێ زارۆکان چێبکم، ببم ژنا ل بەر لێنانگەھێ، بەرمالی و سادە بژیم. ئەڤ چەند ژ بۆ من کوشتنا خەونێن من بوو. ژ بەر ھندێ ئەز ل گەل روحا خوە کەتمە شەری و ھەڤرکیەکە مەزن. ژ ئالیەکێ ڤە ھەستێن دەیکین و ژ ئالیێ دیتڕ ڤە خەیالێن نڤیسکاریێ بون

جانا من، راستی ئەڤ بوو … د وان دەمان دا من نەدزانی دەربارێ وێ مرۆڤا بچووکا د زکێ من دا چ بکم. براستی من نەدزانی کا تو دخوازی بھێیە ڤێ دنیایێ یان نە. ئەز ل بەندا ئیشارەتەکێ بووم کو تو بدەیە من. کا ڤێ ژیانێ دخوازی یان تە ژ ناڤا خوە باڤێژم! لێ جارەکە دیتڕ ئەز پاشڤە دچووم. من دزانی ھەبوونا تە، وەک مرۆڤەکا بچووک نە ژ بەر بژاردەیا تە بوویە، لەوما من خوە گونەھبار دکر. ئەڤ ھەموو ھەست ل دۆر من کۆم دبوون. ژ ئالیێ دیتر ڤە ئەو گوھەرتنێن ل سەر جانێ من چێدبوون، ب چ ئاوایی من قەبوول نەدکر. ھێدی ھێدی کێشا من زێدەتر دبوو و قەلەو دبووم. ژ بەر ڤێ من ھەست پێ دکر، کو یاجوانیا خوە ژ دەست ددم.

دوولەکا وھا خوە ب سەر ھزرێن من دا دگرت. ئەڤ ھەستەکە وسا بوو کو تنێ ژن ئان ژی مێ ھەست پێ دکن. زەلام ئان ژی نێر نەشین ڤان ھەست و ھزران تام بکم و فام بکن. ژ بەر ڤێ دبە ئەڤ تشت ژ بۆ وان نە بالکێش بیت، سەرەنجا وان نەکشێت. پشتی شەش مەھان من بریار دا دوماھیکەکێ ژ بۆ ڤێ چیرۆکێ داینم. ھەر کێلیێ ھزرا وێ یەکێ نەکم کو تە ژ ناڤا خوە باڤێژم. من ب ئیشارەتەکا تە بریار دا تە بینمە دنیایێ.

دەما ژ بۆ کۆنترۆلێ من خوە ل سەر تەختێ پزیشکێ درێژ کربوو، تە ئیشارەتەک ژ بۆ من ڤرێکر و پەھینەک بھێز ل زکێ من دا. ئەڤ یەکەمین لڤین بوو کو تە دڤێیا بێژی ئەز دخوازم بژیم … ژ وێ روژی پێدا من زێرەڤانیا ھەموو لڤینێن تە دکرن و ب ھەموو ھەست و حەزکرنا خو تو پاراستی ژ سەرمایێ، ژ گەرمایێ و ژ نەخوەشیان. گوفتوگۆیا د ناڤبەرا من و تە دا یەکەمین جار وھا دەست پێ کر. ئێدی ئەز ب ھەستێن دەیکێن ل گەل تە دپەیڤیم.

لێ ئەز ڤێ راستیێ ژی ناڤەشێرم تە نیشا من دا کو دایکێن جوانترین تشتە ل سەر ڤێ گەرستێرکێ. دایکێن دبیتە سەدەما پەیوەندیەکا بھێز ب گەردوونێ را و دبیت خەلەکەکا زێدەبوون و بەردەوامبوونا نفشێ مرۆڤان.

ئەز ب دل و جان ل گەل وان ژنا مە کو دبێژن دایکبوون باشترین تشتە د ژیانا وان دا. لێ بلا ئەم راستگۆ ژی بن. ھەر ژنەک وێ رەوشا دەروونییا پسکۆلۆژیک دەرباس دکت. چ د دەما دوگیانیێ دا بیت چ ژی پشتی ئینانا زارۆکان بیت. ئاست و پلەیا وێ تێکچوونا دەروونی ژ ژنەکێ ھەتا ژنەکە دیتڕ جودایە. دوماھیکێ نەھ مەھێن دوگیانی دەرباس بوون.

ئەز بەر ب ژوورا نەشتەرگەریێ ڤە چووم. جارا یەکەمین وێ گاڤێ من ھەست پێ کر، کو ئەم ب تنێ نە و کەس نینە دەستێ من و تە بگریت و مە رزگار بکەت لەوما ئەز و تو مرۆڤا بچووک، دڤێیا ئەم بھێز بن و ب ھەڤ را ڤێ سەربۆریێ دەرباس بکن.

د ناڤ جلوبەرگێن شینێن ئەسمانی دا بووم. ژ ئالیەکێ ڤە من مەراقا دیتنا سەرووچاڤێن تە دکر، دەست و پیێن تەیێن بچووک دکر، ژ ئالیێ دیتڕ ڤە ژی ھەستێ فرین ئان ژی خەوەکا بێداوی من ددیت. دبیت ئەم ھەردو چاڤێن خوە ژ ڤێ دنیایێ را ڤەنەکەین، لێ دبیت ئەم ھەردوو ھەڤ را چاڤێ خو ژ رۆناھیا ژیانەکە نوو را ڤەکن. دەرگەھێ ژوورا نەشتەگەریێ ب سەر مە دا ھاتە گرتن … چێڕوک خۆبەردەوام دکت …

 

مافی بڵاوکردنەوە بۆ نوسەر و کولتور مەگەزین پارێزراوە!
ڕێنوس و خاڵبەندی تایبەتە بەنوسەر خۆی.

 

You might also like More from author

Comments are closed.

error: Content is protected !!