نەژاد عەزیز سورمێ - شاعیر - نوسەر و وەرگێڕ

خەونێک لە نێوەڕۆدا

نەژاد عەزیز سورمێ – کاری کۆلاژ

خەونێک لە نیوەڕۆدا

قەسیدە 

نەژاد عزیز سورمێ

 

ئەو بەرھەڵە ھەبێ و نەبێ چییە ؟

ئاوازی جادووگەرانی تاریکی

بەئێمە لێ نەدرا…

بەفر ،

لە دەرەوەی بازنەی وەرزەکان

چرۆی دەرکردبوو ..

ڕووبار ،

پیرییەتی یۆتۆبیای لە کۆڵ نابوو

بە نەزمی کولانەوەی برینەکانمان

دۆڵا و دۆڵ دەھات …

 

بەھارێکی پۆشتە بوو ..

درەخت گەڵایان ھەڵوەراند .

ئەستێرە لە ھەوران نقوم بوون .

بەڵام ئاخ ..

کلیلی عومریان شکاندین

چەخماخەی نەوایان بە زریان سپارد ..

بەم جۆرە

(مەرگ)یش جیاوازی تێکەوت!!

 

نەژاد عەزیز سورمێ – کاری کۆلاژ

بڕوانە!

لێومان بە لێوی بورکانەوە ناوە

قاسیدی ھەتاویش لە قامیشەڵانی سۆزدا ،

ئاوازی جادووگەرانی تاریکی دەچڕێ ..

 

بەختەوەر بوون ئەوانەی ڕۆیشتن ..

بەختەوەر بوون ئەوانەی

نوێژیان بۆ ئایندەی بەفر دەکرد ..

بەختەوەر بوون

ئەوانەی (با) یان لە چاو کرد و

دڵیان لە باران پڕ کرد بوو

بەسەر پردی (نۆ ھەشت شەش)دا پەڕینەوە

بەختەوەر بوون …

 

 

نەژاد عەزیز سورمێ – کاری کۆلاژ

(پرۆفاید کۆمفۆرت) ، بادەی نەشئەبەخش  ..

شازادەی کسپەدار

لەبەر ڕەشماڵی لەعنەتیی شیعر ،

کینەوەر ،

لە شەقامی گریان

لە جوغرافیای داخراو ..

لە دڵی سەر تیشە

سەمفۆنیای ئاگری

کەنار و کەنار

بنار و بنار

ئاسمان و ئاسمان

ھەڵدەفڕاند …

 

بەدنمەکی

تەنی لەرزۆکی

بۆ برووسکە ناکاتەوە

ئیتر بەسەرچوون

ساتەکانی نمایشی پاکیزەیی بەسەرچوون … 

ئەستێرە پۆل پۆل ڕایان کرد

تێیاندا بوو

لە لەزەتی جەستەی شەڵاڵدا دەتوانەوە ،

تاک تاکیش

بەسەر ڕەخشی ئومێدەوە مابوونەوە

دەڕژانە گیرفانە زلەکانی ئایدیۆلۆژیا ..

 

 

نەژاد عەزیز سورمێ – کاری کۆلاژ

ئەو بەرھەڵە ھەبێ ونەبێ چییە ؟

ئەبەدییەت …

کوێرایی مێژوو …

تەکنیکی داتەپین …

گۆزەیەکی خەت خەتی سۆمەر و

شەقامێكی بە ژاوەژاوی

مەیخانەکانی (ئور) دەرچوو …

لێم دیارە… با بڕوات

گەردوونێکی سۆزانی ،

لە سوێند و شادی و

خەم و درۆدا ھەڵکێشراو

با بڕوات

مۆمێکی ھەڵایساو

بەسەر پەنجەکانییەوە دزە دەکا ،

تەلیسمی کازیوەیە …

شەفەقی ڕسکان …

نەژاد عەزیز سورمێ – کاری کۆلاژ

دەنگەکان پچڕپچڕ

باران پچڕپچڕ

زیندانەکانی ناخ دەکوتێ …

 

ئەی خودای تاک و تەنیا

تەنیا

تەنیا

ئێمە سوختەی ئەو ھەڵەتەین

لە خاکی لەعنەتیی شیعر ،

نە سیپارەیەکمان پێیە

نە تێشوویەک ..

 

نەژاد عەزیز سورمێ – کاری کۆلاژ

ڕۆژگار ،

بە تراکسوتێکی بریقەدارەوە

لە باخچە ئەفسانەییەکانی شەودا

دەخوولێتەوە

لەگەڵ ئەوەشدا

خەنجەرێک نەپشکوی ،

چرۆیەک دانەوەشێنرا ..

ئەی ڕووباری سەرشێت !

ڕووباری پیرییەتی یۆتۆبیا

ترسی نزیک !

کوێرایی با

لە دوورگەی شەختەڕا

دەتکەم بە کۆلارەیەک

دوور دوور

بەرز بەرز ھەڵتئەدەم

تا لە چاوی ھەمووانت ون دەکەم .

نیسانی 2001

 

 

 

 

 

 

تایبه‌ت به‌ كولتور مه‌گه‌زین – بیروڕاكانی بابه‌ت و ڕێنوس خاڵبه‌ندی تایبه‌ته‌ به‌نوسه‌ر خۆی. كولتور مه‌گه‌زین. ته‌نها دانانی لینكی بابه‌ت ڕێگه‌پێدراوه‌. هه‌موو په‌ره‌گرافێك و پۆستكردنێك بێ دانانی لینك و ناوی نوسه‌ر و گۆڤاره‌كه‌ دژی یاسای كۆپی ڕایته‌ و لێپێچینه‌وه‌ی یاسایی له‌ دوایه‌. ‌