جەستەی هێز، هێزی جەستە؛شەڕی بازاڕی جەستە، شەڕی بازاڕ لە سەر جەستە

ئه‌بوبه‌كر جاف – ‎چەند سەرنجێك لە سەر (سایەكەریم و زەینەب)و بە بارمتەگرتنی جەستە

سارا مالپ؛ یاریكردن به‌ ئاگر
1,136
سارا ماپل؛ پێرفۆرمانس

‎یەكەم

‎ئێمە ڕووبەڕووین بە سەردەمێكی بۆش، ڕووبەڕووین بە سەردەمێكی پڕ لە بۆشایی و كەیاس و بێسەرەوبەرەیی، بە شێوەیەك بۆش كە هەرچی شەپۆل و تەوژمێكە، بە بێ فلتەرو بە بێ گوزەركردن بە ناو فلتەرگەلێكدا بە ناو ئێمەدا تێدەپەڕێت و ئێمە بە ناویدا تێدەپەڕین. ئەم بۆشییە و ئەم بۆشاییە لە ناو بەركەوتن و بەیەكداچوونێكدایە كە چركەساتێكی نوێی لە ئاستی سۆسیۆلۆژیی و بەهایی و مەنزومەی قییەمی لە دونیای ئێمەدا خولقاندووە.

دووەم

‎ئەم بۆشاییە، ئەم بۆشییە بە شێوەیەك مانیفێست دەبێت كە چیتر ناوەوە هەناوێكی پڕو قورس و سەنگین بوونی نییە كە بارگاویی و لێوانلێو بێت بە ئیمان و  بڕواگه‌ری  و بیروباوەڕی سەنگین. و جێگرو دامەزراو داكوتراو، بەڵكو پڕكراوەو پڕە لە ( دەرەوە) بە شێوەیەك كە چیتر قسەوباس لە ناوەوە و هەناوێكی داخراو لە ئاستی تاك و جڤاكیشدا نوكتەیە.

 

 

‎سێهەم

‎ئەم دەرەوەیه‌،  بازاڕو تەواوه‌  بە ئۆبژێكتیڤبوونی سوژەیە، خوده‌،  لە بازاڕدا. واتە ئەوە بازاڕی دەرەوەی شمەك و شتومەكە بەرچاوخراوەكانە كە ئێمەیەك فۆرمولە دەكات بەو شێوەیەی دەیەوێت. ئێمەیەك كە بەهاو پرەنسیپگەلێكی گەورەی وامان نییە،  یاخود نەماون تا نەیەینە دەرەوەو لە ژوورەوە، بە ئارامی و داكوتراوی بمێنینەوە. مرۆڤی ئێمە لە ناو ئەم چركەساتە نوێیەدا هەر شمەك و شتومەكی پێدراوە لە دەرەوە، دەستكاریكردنی جەستەو جوانكاریی هەر لەم دەرەوەدا، هەر لە ناو ێەم بازاڕەدا خۆی ساغ دەكاتەوە.

 

 

چوارەم 

 ئەم بازاڕە جەستەیە و لە سەر جەستەی بایۆلۆژی، سیاسیی، كۆمەڵایەتی، دەروونی، خۆی وێنا دەكات. بەواتایەكی دیكە، تەنیاو تەنیا جەستە دەبێتە بارمتەی هێزو ململانێی هێزەكان لە بازاڕدا. نموونەی سایە كەریمی ڕووت،  خاتوو زەینەبی پۆشتە لە ناو جەستەی بازاڕو بازاڕی جەستەدان.

 

‎پێنجەم

‎لێرەوە ئێمە لە گەڵ فۆرمێك لە ئاوابوون و كەوتنی ڕۆحیانەت، عیرفان و ڕۆحگەرایی، هەناویی و ناوەكی و دوورەپەرێزی و گۆشەگیریداین. واتە سەروكار و ڕووبەڕووبوونەوە لە گەڵ سروت و كه‌شیگه‌راییه‌ ئاینییەكان و موقەدەسەكان لە دەرەوەی  لە بازاڕدا، لە دەروەدا. وێنەی خۆمان و بەركەوتن بە خۆمان ئەو وێنە و ویناو تیشكدانەوانەیە كە لە دەرەوە وەریدەگرینەوە.

 

 

سارا مالپ؛ كاری هونه‌ری

‎شەشەم

‎ڕەنگەو ئەوەش واریدە كە ناوەو هەناوێك دوا نەفەسەكانی خۆی بدات، لە سەرەمەرگیدا لە ناو هاتوهاوار، پرسەو شیوەن، خۆشی و شادی، ترس و بیمەو تۆقینی ئاوابوونی بە فۆرمی جیاواز زەبروزەنگ و توندوتیژی فیزیكی و ڕەمزیش سەر ڕێگا بخات. واتە دوانەفەسێك كە بێ مانەوەی خۆی دەست بۆ هەموو شتێك دەبات لەوانەش جنێو و قسەی بازاڕی، قسەی بازاڕیی لە بەر ئەوەی ئێمە سەروكارمان لە گەڵ بازاڕ/ دەرەوەیەكدا هەیە كە زمان و ئاستی زمانەوانیی و. ئاستی موفرەداتی بازاڕیی و دەرەوەی دەوێت.

 

‎حەوتەم

‎لە گەڵ ئەم دەرەوەدا، لە گەڵ ئەم. بازاڕو هاتنە ناوەوە بۆ بازاڕو، هاتنە ناوەوەی بازاڕەدا ئێمە ڕووبەڕووین بە سروت و كه‌شیگه‌رایی  و كردەی ئیمانداریی لە دەروەدا، خۆداپۆشین و دەركەوتنی زەقی خۆداپۆشینەكان. لە دەرەوە، ئەو هەموو وێنەو ئەلبوومی وێنانەی حەج و عەمرە، زیادبوونی مزگەوت، شەرعییەتی مامۆستاو پیاوانی ئاینیی  دەرەو و پاشان دانەوە ناوەوە.  ‎لە هەمووی گرنگتر فۆرمولەبوونی جۆرێك لە نیفاق و چەند ڕوویی لە ناو كردەی پەیوەستبوون و هۆگربوون بە مۆراڵ و بەهاكانەوە. بەكاربەریی و بەرخۆریی و بەكاربردنی ئیستیهلاكی بازاڕیی هەموو شتێك، بە دەرەوەكردنی هەموو شتێك و بە ناوەوەكردنەوەی، ڕەفتارو سلوكی چەند فاقی دێنێتە ئاراوە بە ناچارییەكی نوێی بیناكراو لە سەر دەرەوە و بازاڕ. بەرگریكردن لە پرەنسیپ و ئایدیاگەلێك لە دەرەوە لە ناو بەكاربردن و سیمیلاكری بەردەوامدا.

لێرەوە قسەوباس لە ئۆنتۆلۆژیایەكی دیكەی مرۆڤی دەرەكییە، ئۆنتۆلۆژیاو سایكۆلۆژیای سوژە و بوون لە دەرەوەو پاشان. دانەوە بە ناوەوە، جا یان دەرەوەو ناوەوە دەبێت بە یەك شت، یەك جەوهەر، یان دەرەوەو ناوەوە دەكەونە ناو ململانێی سەخت و دەستەویەخەو، لەوێشەوە سلوكی نیفاقیی و چەند ڕویی دەردەكەوێت.

 

‎هەشتەم

‎شەڕو ململانێ وه‌ها دەكەوێتەوە كە تەواوی هێز بەكار بهێنرێت، تاوەكو كەسێك، جەستەیەك، بتوانێت زیاترو زیاتر لە دەرەوە بێت بە زەقكراوەیی. ئێمە ئافرەتی سفوور و بێ لەچكمان هەیە، بەڵام لەم بازاڕ/ دەروەدا ئاساییەو نامۆ نییە. نامۆ نییە تا لە ناو مامەڵەی ئەم بازاڕەدا وەك ( جیاوازێك) ببینرێت. دەی كەواتە پێویستە ڕووت و قووتیەك هەبێت تا جیاواز بێت و زیاتر لە دەرەوە بێت. بە هەمانشێوە ئێمە فۆرمی جیاوازی لەچك و پۆشتەیی وباڵاپۆشییمان هەیە، ئەمەش ئاسایی دەڕوات و نامۆ و جیاواز . و چاو . لەسەر نییە، دەبێت فۆرمیولەكراوێكی دیكەی داپۆشراویی هەبێت كە جیاواز بێت و ببێتە بابەتی زیاتری بەكاربردن و سیمیلاكراو، لێرەوە نیقابێك دێت و زیاتر لە حیجاب و پۆشتەیی دیكە چاو لەسەرە.

 

 

سارا مالپ؛ كاری هونه‌ری

نۆهەم

‎با بچینە لای میشێل فوكۆ؛ كه‌  كەنیسە و قەشەو گوناهبار، لە ناو دیسپۆزیتیڤێكی دیكەی دەسەڵاتی ئەو سەردەمەدا، پێویستە هەناو بهێننەوە دەرەوە و ئاگاداری ویژدان و ڕۆح بن، بۆ هێنانە دەرەوە پێویستی بە (داننان و دانپیانان) بە گوناهه‌ و تاوانەكاندا.  لێرەوە ڕۆڵی دانپیانان لە پێناو كەشف و كۆنترۆڵی ویژدان و ئاڕاستەكردن و حكومڕانی كردنی جەستەدا بووە.

ئەگەر فەیسبووك، فەزای مەجازی و ئیفتیرازیش وەك دیسپۆزیتیڤێكی نوێی دەسەڵاتی كۆنترۆڵی وەرگرین، ئەوا دەبێت هەرچیمان هەیە، یاخود زۆربەی شتەكانمان بهێنینە دەرەوە، بهێنینە بازاڕی سایبێر و فەزای ئیفتیرازییەوە. مادامەكی ڤێرتوێلیش بۆ بوون بە ئەكتوێل پێویستی بە ئەكتوێلیزەبوونە، دەبێت بهێنرێتە دەرەوەو بهێنرێتە ئەم بازاڕەوه‌. لێرەوە لە ناو فەزای میدیاو فەزای ئیفتیرازیدا (جەستەی سایە كەریم و جەستەی زەینەبیش) دەبینین كە دەهێنرێنە دەرەوەو دەخرێنە ناو مامەڵەی شمەكیی و ئاڵووێری ئەم بازاڕەو بەكاربردن و بازاڕپێ گەرمكردن.

 

‎دەهەم

‎لێرەوە دەكرێت سایەو زەینەبیش وەك دوو بینراوی بازار، وەك دوو خواست و ئیرادەی بازاڕ، وەك سیمیولاكراو، وەك جەستەی ڕێوڕەسمكراوی بازاڕ ببینین، كە دیاردەگەل و فاكتگەلی نوێی ناو ململانێی نوێی هێزەكان و بەركەوتنی لۆكاڵ و  جیهانیی ببینین.  كە له‌ ناو ستراتیژی نوێی بەرهەمهێنانی ماناو ستراتیژی نوێی بازاڕو سیمیولاكروان.  ‎بە شێوەیەك لەم بازاڕەدا و لە ناو ئەم  ململانێ نوێیەدا بازاڕو ئیرادە و ویستی بازاڕ پێویستی بە دوو جەستەی دژ بە یەك بێت و هێزەكانیش خۆیان تاقیبكەنەوە.  هەژموون و هەیمەنەی خۆیان ببینن. لێرەوە بەركەوتنی دوو جەستە لە یەك (كاتی نزیكدا) نیشانە و سیمپتۆمێكی نوێیە بۆ هێزگەلێ نوێ. ئێمە ڕووبەڕوین بە بەرهەمهێنان و سەرمایەگوزاری تەواو نوێ لە سەر جەستەو، شەڕی هێزەكان لە سەر نەخشاندنی جەستە و نەخشاندنی بە ویست و ئیرادەی خۆی.

جەستە لە ئێستاداو لە ناو ململانێ و بە بارمتەگرتنی نوێ،  پەیوەندی بە دەركەوتن و هاتنەناوەوەی كاپیتالیزمەوە هەیە لە ناو بەرهەمهێنانەوەی ئابووری لیبیدۆیی. بە بێئەوەی ئەم كۆنتێكستە جیاوازە خێڵەكی- لۆكاڵییە، لە بەرامبەر بێ ئەكسیۆمی كاپیتالیزمداهیچی پێ بكرێت. بە ڵكو سەرقاڵی بەرهەمهێنانی ئارەزوو و ئابووری ئارەزوو و لیبیدۆیی خۆیەتی.

تایبه‌ت به‌ كولتور مه‌گه‌زین –
ڕێنوس خاڵبه‌ندی تایبه‌ته‌ به‌نوسه‌ر خۆی.

You might also like More from author

error: Content is protected !!