هەردوو کار و سەمفونیێن ماموستا (دلشاد محەمەد سەعید) یێن کو ب ناڤێ (پێشمەرگە و شنگال) ژ هەلبەستێن هەلبەستڤان (ئەدیب چەلکی) دگەل ئورکسترا و کۆڕاڵا وەڵاتێ (چیک) ب بەشدارییا چەندین هونەرمەندێن ناڤدارێن کورد، یێن ب سپۆنسەریا ڕووداو هاتینە بەرهەم ئینان. ب راستی ئەڤە یەکەمین جارە کو مللەتێ کورد ببیتە خودانێ کارەکێ موزیکێ بڤێ هێزێ و ڤی رەنگێ جوان و زانستی و ئەکادیمی، ب باوەرم کو ئەڤ هەردوو سەمفۆنییە دێ هێنە تومارکرن د مێژوویا مۆزیکا کوردی دا و ب سەدان ساڵێن دی ژی مللەتێ کورد دێ شانازییێ ب ڤان هەردوو کاران بەت، دیسان ل پەیمانگەهان و کولێژێن مۆزیکێ دێ لسەر ڤان کارێن موزیکڤانێ ناڤبری هێتە خواندن، دەستێن هنگو زێربن هەر هەبن ژبۆ خزمەتا مۆزیکا کوردی.
ئەز وەک خوێندکارەکێ موزیکێ چەند تێبینیەک من هەبوون هێڤیدارم ب گۆتنا ڤان تێبینی و رەخنەیێن من نەبیتە جهێ دلمانییێ، بەلکو من دڤێتن بێژم داکو پتر خزمەتکاربین ژبۆ مۆزیکا کوردی، ب نێرینا من وەکی دهزرا من دا فەر و پێویست بوو ل باتی ئورکێسترا گروپێ کۆڕاڵێ یێ وەڵاتەکێ بیانی مۆزیکڤانێن مە ل هەرسێ پارێزگەهێن هەڕێما کوردستانێ یان کوردستانا مەزن ب گشتی هاتبانە هەلبژارتن، ژبۆ ئەجامدانا ڤان هەردووک کاران و ب ڕاستی دئەڤرۆ دا ئەو کەسانێن مۆزیکڤان مە هەبوون و ئەو شیانە دبەردەست بوون گەر هاتبانە بکارئینان، دبیتن نەبڤێ کواڵتییا زۆر باش با، چەندین ئاریشە و پرسگرێک هەبانە، لێ ب باوەرم دا ئەڤ دەلیڤە بیتە ئێکەمین پێنگاڤ ژبۆ کۆمڤەکرنا مۆزیکڤانێن کوردستانێ و دابیتە ڕێخوەشکەرەک ژبۆ دامەزراندنا ئۆرکێسترایەکا کوردستانی کو خەونا زۆر مۆزیکڤانانە و هەروەسا پتر گرنگی دان ب مۆزیکڤانێن مەیێن کوردستانی، ماندیبوون دا هەبیتن هەتاکو ئەڤ مۆزیکڤانە هەمیە هاتبانە ڕێکخستن و کۆمڤەکرن هەتا کو کار بڕێڤە چووبایە، پرسگرێک دا هەبن و ڕێکخستنا کارەکێ مەزنێ ب ڤی ڕەنگی یا ب ساناهی نەبوو، دیسان پڕۆڤەکرن ژی دگەل وان هەتاکو حازرببان و ئامادەکارییێن خوە کربانە پێویستی ب دەمەکێ درێژتربوون، دبیتن گەلەک ئاریشە و پرسگرێکێن نەچاڤەڕێکری هەبان یێن کو نوکە نە ل هزرا من لێ ب نێرینا من دا ئەڤ بەرهەمە هەمی پێکڤە بیتە بەرهەمەکێ کوردستانی، دیسان ژلایەنێ ماددەی ژی ڤە بباوەرم دا مەزاختیێن مە ل کوردستانێ کێمتر بن، هەر دیسان دشیان زیندی ژی نمایشێن خوە ل کوردستانێ و هەر دیسان ل دەرڤەی وەڵاتی ژی بکەین بێی کو هاتبا ڕێکۆردکرن ژی، ب زانینا من ل گۆر تێگەهشتنا من و وەکی ماموستا دلشاد ب خوە ژی ئاماژە پێدای گوهداریکرنا ڤان رەنگە کاران ب زێندی تام و خوەشییەکا تایبەتمەندتر هەیە.
داخوازیا من ژ حکوومەتا هەرێما کوردستانێ وەزارەتا ڕەوشەنبیری و پارێزگەهێن هەڕێمێ ب گشتی ژ ڕوداو و هەردیسان ل ماموستا دلشادی و هەر کەس و لایەنەکێ پەیوەندیدار ئەوە کو بکارن ڤان موزیکڤانان ل کوردستانێ و گروپێ کۆڕاڵی ئامادەبکەن، ئانکو ئورکێسترایەکا کوردستانی هەتا کو یا دەمی ژی بیتن گەر نوکە ئیمکانیات و شیان نەدگونجای بن! ڤان هەردووک سەمفۆنیان و چەندین کارێن دی یێن موزیکی کار ل سەربکەن و هەمی مۆزیکڤانێن کوردستانێ دێ دلخوش بن کو د ئورکێسترایەکا نەتەوەیی و کوردستانی دا کاربکەن، کو ئەڤە چەندین ساڵن خوێندکار ل پەیمانگەهان و کولیژان دەردچن دل سوتیێن کارەکێ بڤی رەنگی نە بکەن، نەخاسمە دگەل موزیکژەنەکێ خودان شیان و ب ناڤ و دەنگ مینا ماموستا (دلشاد محەمەد سەعید)ی.
موزیکژەن: بێکەس نوری عـەبدال
ڕێنوس و خاڵبه‌ندی تایبه‌ته به‌نوسه‌ر خۆی – مافی بڵاوكردنه‌وه بۆ نوسه‌ر و كولتور مه‌گه‌زین پارێزراوه