من چاڤێن خوە ڤەکرن تاریاتییەکا گران ب سەر ژورێ دا کەتبوو. ل دەستپێکێ من هزر کر ئەڤ خەونە و کابووسەکا نەخوەشە دێ ب دوماهیک هێت، لێ تا رادەیەکی جوداهی کرن د نافبەرا راستیێ و جیهانا دی دا یا بیانی و بترس بوو، من شیان نەبوون واقعی بینمە هەبوونێ..؟ لێ وەکو یا دیار بانکارتەک ل سەر دیواری هەبوو ل سەر نفیسی بوو: “ب تەنێ بۆ دەمێ دەمژمیرەکێ تە مافێ سەرەدانێ هەیە”. بۆ من خوەیا بوو کو ئەڤ زیندانە…! و ب تاوانا شەرەف و کەرامەتێ “کو ژن د ڤی جفاکی دا سمبولا رەوشت و شەرەفێ نە” ئەز هاتبوومە زیندان کرن و بونەوەرێ دی کو زەلامە ژ هیچ ئاریشەیەکێ و بەرپرسیارەتییەکێ د پیفەرێن شەرەف و کەرەمەتێ دا بەرپرس نینە …
من دڤیا چەندەکێ تێهزرینێ بکم پیچەکێ میشکێ خوە براوەستینیم ژ هزرکرێ کو ئەڤ بزحمەترین ئەرک بوو د زیندانێ ڤە ئەنجام ددم. ئەڤە ژی د سپێدەهیان دا من دکر دەمێ خەونێن نەخوەش جانێ من ئەزیەت ددا، ل دەمێ نیڤرۆیان من خوە درازاند و من ل دیوارێ هنداڤێ تەختێ خوە مێزەدکر و بێدەنگییەکا دژوار ب سەر ناخێ من دا خوە دچەسپاند، ل دەمێ ئێڤارییان کو مافێ هەر زیندانییەکێ بوو تەنێ بۆ ماوەیێ دەمژمێرەکێ د رۆژێ دا سەرەدانا باخچێ زیندانێ بکت، ئەو ژی ئەگەر سەقا یێ خوەشبایە و چ باران نەبانە، هەر چەندە دەما باران دهات من دخوازت تەر ببم دا کو خوە ژنێرینێن جڤاکی بشۆم خوە ژ وێ گونەهێ پاقژ بکم، یا کو هەتا نوکە ژی رەوشت و شەرەف و کەرامەت د ناڤ پێن ژنێ دا؟ هەرچەندە د دمێشک و رەفتاران دایە کو مروف یێ تەمیز بیت ژ تەماعی و درەو و دزی و گەندەلیان، ناخێ خوە پاقژ بکت ژ ڤان هەرسێکان، لێ من دڤییا خوە ژ ڤان هەمی هزرکرنا بدەرێخم و خوە پاڤێژمە دناڤ سروشتی دا و پیچەکا هێزێ بۆ خوە ژ دار و بار و کەسکاتییێ وەربگرم، دەمێ پیچەک ئارامبوونێ ئەز دگرتم جارەک دن ئەز دکرمە د ژورێ ڤە و دەرگەهـ ل من گرتن، پیچ پیچە تیشکێن هەتاڤی خوە ژ ئەردی فەکێشان و رۆژ ئاڤابوو.
ل دەمێ شەڤێ وژدانا من نەدزانێ ئەز شەری دگەل خوە و نەفسا خوە دکم یان ژی شەری د گەل هەلویستێ وان مروڤان دکم یێن بووینە ئەگەر ئەز د ڤێ ژورێ دا ببم، پاشان من پێکول کرن کو تولڤەکرنێ نەکم ژبەر کو بارێ من گران تر لێ دهات، هەرچەندە هژمارا وان مروڤان زێدە ژی دبوون یێن کو بووینە ئەگەر کو من بێشینن و ئەزیەت بدەن، ل دویف دا من پێکول کرن هزر بکم گەلەک کەس هەبوون کو ژییێ خوە د زیندانێ ڤە بوراند بوون ناڤێ خوە د مێژووێ دا تومارکربوون، من کەسایەتییا خوە رازی دکر کو یا پێدڤییە هێزا خوە هەمیێ بکاربینم دا کو رۆمانەکێ د ڤێ زیندانێ دا چێکم کو هزرا من تنێ ل سەر هندێ بیت دگەل روودانێن رۆمانا خوە دا بژیم، داکو بشێم تشتەکێ جودا بەرهەم ببینم، بۆ هەمییان دیار بکم کو خوە هەبوونا من د زیندانێ ژی دا بیت هەر دشێم مفای ژ شیانێن خوە وەربگرم و ببمە کەسایەتییەکا ناڤدار و مێژوو ل سەر خوە راگرتنا من د نافا جڤاکەکێ نێر و مێشک گرتی دا ل سەر باخفیت و بنفیست، من چاڤێن خوە گرتن و من لەشێ خوە رادەستی خەوێ کر و نفستم.
ڕێنوس و خاڵبەندی تایبەتە بەنوسەر خۆی.