هەوار کەمال؛ شەهوەتا کوترەکێ

Loading

هەوار کەمال
هەوار کەمال

دەنگ: ئاڤاهیێ خۆ فێردکەتە دیتنێ
جادێ فێردکەت ل نزم ئاسمانەکی بکەتە بەرخۆ
ل بلند ئاخێ وەک ئەورەکێ نێرگزان ڤەخۆت
چاڤێن خۆ ڤەدکەم
بتنێ سیبەرا پەنجەرەکێ د لەشێ خۆ دا دبینم
وەک بیردانکا کوتران
رەنگ ل ناڤ سیبەرێ بسەرئێکدا دفرن
هەمی فرین ل ناڤ لەشێ خۆ بەرزەدبن و
لەش،
سەرێ خۆ د سندریکا خۆ دا ژ خەورادکەت
پێن خۆ ژ دەرڤە دنڤینیت
مری،
رویبارەکی ژ خۆ دهاژوونە شکەفتەکا سپی
ژ بۆ هەر رویبارەکی سرۆدەکێ دنڤێسن:
دەنگێ من،
پارچەیا بەرزە و ل هنداڤی من
رەنگێ من،
دعایا ئاگری و نە ژ بۆ من
ئاگرەکی گۆریا خۆ د ئەردی دا داهێلا
هەناسەک بەردا
چلخانەکێ توخیبێن هەرجارێن دەمی بەزاندن
گۆت:
رۆناهی سپێدەهییا بەختێ دەمیە
ژ بۆ سپێدەکا رۆناهیێ
دەم ل تەنشتا خۆ
مرۆڤان د تاڕیێ دا دهێلیت

ئالایەکێ سپی
خۆ هەلددەت ل سەر لەشەکێ دوور
پایزەک ل ئاخەکێ و بێی ئاخێ هەلدبیتە ژوور
پەنجەرەک،
ب پابووسەکێ تاڕیێ دکەتە کنار ژ بۆ رەنگێ سۆر
پابووس،
هەلما زیندانێ یە ژ بۆ گەرمکرنا لەشێ ئاشتیێ
زیندان،
ل بەری ئەلندێن خۆ گۆیەکا ئاگری بوو
خۆ دنڤێسی مالەکا سپی
دنیا ژ دەستەکی ب دەستێ خۆ
کەفتە ناڤ چیرۆکێن دەنگێ وێ
لەو، زیندان پرچا شەڤێ
ل بەر خۆدیکا جەهنەمێ شەدکەت
گولهنارێن دەنگێ سپێدێ ب تۆزا بیابانێ ڤە سێدارەددەت

کێ ئاشتی دڤێت؟
بلا تلا خۆ بدەتە ل گەل تلا من، دێ دنیایێ پالدەین ژ ڤێرێ
کێ زیندان دڤێت؟
بلا ل سەر دەرگەهێ مالا خۆ بنڤێسیت: دنیا
کێ رویبارەکێ شیری دڤێت؟
بلا سترانەکێ بێژیت هەتا کوتر دفرن

من دەستێ خۆ کویر دادهێلا ناڤ پەنجەرێ
لێ هەرجار دەستێ من ڤەدگەریا
وەرزەکێ تەزی و بێهنا حوریەکێ یا پێڤە
و بتنێ من ئاگرەک دڤیا و پیرۆزیەک
ژ مەرەق و شەهەوتا کوترەکێ

٢٠/٦/٢٠١٣

 

مافی بڵاوکردنەوە بۆ نوسەر و کولتور مەگەزین پارێزراوە! ڕێنوس و خاڵبەندی تایبەتە بەنوسەر خۆی.
مافی بڵاوکردنەوە بۆ نوسەر و کولتور مەگەزین پارێزراوە!
ڕێنوس و خاڵبەندی تایبەتە بەنوسەر خۆی.