_ ببورە، تە ئاگر هەیە؟
لسەر ملێ خوە زفری، دوو چاڤێن شین یێن مایێ خوە د هزرێن وی دا دکن.
_ بەلێ، فەرموو…
ئاگرێ هەموو جەهنەمان یێن لنک من هەی…
_ ببورە، تە چ گۆت؟
_ چونە، ئەز دگەل خوە دئاخڤتم…
دەستێ وی یێ چەرخا ئاگری تێدا. کرە دناڤ هەردوو دەستێن خوەدا. سەرێ جگارا خوە ب گۆریا ئاگری ڤەنا. مێژەک ل جکارێ دا. تژی دەڤێ خوە دووکێل کر، بەردا ناڤچاڤێن وی.
_ توو گەلەک جاران دگەل خوە دئاخڤی. ئەڤە نەخۆشیە یان عەشقە؟
کەنیێ دێمێ وی گەش کر.
_ عەشق بوو… لێ یا بوویە نەخۆشی…
ستێرکا چاڤێن خوە یێن شین، ئێخستنە چاڤێن وی یێن رەش.
جگارە هێلا دناڤ دوو تلێن زراڤ دا. ب دوو تلێن دی، یاری ب پۆرا زەر کرن.
_ توو مرۆڤەکێ ئالۆزی. یان وەک تە گۆتی، یێ نەخۆشی…!
چاڤێن رەش، کەتنە لێڤێن سۆر.
_ ئەز نەیێ ئالۆزم و نەیێ نەخۆشم. ئەز هەلگرێ بارەکێ گرانم.
هێشتا تل یێ یاریا بگولالیکێن زەر دکن. هەر چەندەکێ لێڤ یێن خوینا جگارێ دمێژن.
لهنداڤ سەرێن وان. دوکێلا جگارا گۆهنێلی دکرن.
_ بارێ چ؟ توو پێتڤی پارای؟
کەنی بلند بوو. لێ هەر زوو دێم بوو مەیدانا خەمێن گران.
_ سپاس، ئەز نە پێتڤی پارامە. ئەز پێتڤی هەڤالەکی مە، هاری من خەمێن من هلبگرت.
دەڤێ خوە یێ تژی دوکێلا جگارێ، نێزیکی گۆهێ وی یێ راستێ کر.
_ ئەز ئامادەمە تە و خەمێن تە هلگرم…
کەنیەکا مێ تژی جهی بوو.
_ دبت توو بشێی من هلگری. لێ کەس نەشێت خەمێن من هلبگرت.
چاڤێن شێن زیق بوون.
_ بوو؟ ما گرانیا خەمێن تە چەند کیلونە؟
ئەو دوکێلا ددەڤیدا بەردا هنداڤ سەرێ خوە. چاڤێن وی دوور وێنەدکرن.
_ تە دیتیە؟ یان گۆهلێبوویە. مرۆڤەکی چیا و دۆلێن ولاتێ خوە د پاخلێن خوە دا هلگرتین؟
ئێکسەر بەرسف دا.
_ نەخێر…!
_ تە دیتیە؟ یان گۆهلێبوویە. مرۆڤەکی رووبار و کانیێن ولاتێ خوە دچاڤێن خوە دا ڤەشارتین؟
_ نەخێر…!
_ تە دیتیە؟ یان گۆهلێبوویە. مرۆڤەکی گەلەکێ بێ خۆدان، لبەرسینگێ خوە نڤاندی.
دێمێ بەفرین، تژی پرسیارێن ئالۆز بوون.
_ توو چ دبێژی؟ ئەز دتە ناگەهم…؟!
سەرێ خوە یێ تژی خەم و هیڤی هەژاند.
_ ئەز باش دزانم توو دمن ناگەهی.
لدوور خوە زفری، کەس لنێزیکی خوە نەدیت. دەڤێ خوە نێزیکی گۆهێ وێ یێ دبن پۆرا زێرین ڤە ڤەشارتی کر.
_ تژی پاخلێن من چیانە.
مێژەک لجگارێ دا. تژی ناڤ مەمکێن وێ دۆکێل کر.
_ تژی سینگێ من، رووبار و کانینە.
تژی بیبلکێن چاڤێن من، کچێن چاڤ رەش و بەژن بلندن.
تژی دلێ من ئەڤینە.
دەستێن خوە ڤەکرن.
_ توو ڤان دەستان دبینی؟
ب دوو چاڤێن زیق، بەرێ خوە دا دەستێن وی یێن ڤالا.
_ تژی ڤان دەستان، گازندەنە.
وەک زارڤەکەرکی شانوویێ.
_ ئها بڤان دەستان، ئەز رۆژانە هزارەهان دەڤێن برسی تێر دکم.
هەر بڤان دەستان، ئەز رۆژانە هزارەهان زیندانیان ئازاد دکم. و هەر بڤان دەستان، ئەز رۆژانە هزارەهان گەندەلچیان سزاددم…
و بڤان….
قۆبکێ جگارا خوە هاڤێتە ئەردی. پێلاڤا خوە یا چمک تیژ. دوو سێ جاران لسەر بادا.
_ تنێ مرۆڤێن نەخۆش ڤان کاران دکن.
هێلا دناڤ هەڤالێن وی دا.
کەنیێ دێمی وی نەخشاند…
_ کەس باوەرناکت، تژی سەر ملێن من چیانە…
کەس باوەرناکت، تژی پاخل و بەرووکێن من رووبار و کانینە…
دەنگێ وی بلند بوو.
_ کەس باوەر ناکت، هەرشەڤ ئەز چیرۆکان بوو گەلەکی بن دەست دبێژم، هەتا لبەر سینگێ خوە دخەو دبم…!!
تەواو
٢٣/٤/٢٠١٢ نورنبێرگ