دناڤ گێلەشوک و ھزر و سیاسەتا داعشێ دا، گەلەک پرسیاران خوە ھاڤێتە دناڤا گورەپانێ دا، ھەرتم پرسیار و لێگەریان ل بەرسڤێ گەلەک گرێ یێن مێشکی ڤەدکەن و تە نەچارکەن ل دور حەقیقەتێ بگەری. ژ وان پرسیارێن ل سەر زارێ گەلەک ژ خەلکی ل ھەر جھەکێ بچییێ، بگرە ژ جادێ تا کو زانکۆیان، ئەرێ داعش نوونەراتییا ئیسلامێ دکەت یان ئیسلامێ (ئیستغلال) دکەت؟ ئەرێ داعش ژ بەرھەمێ کێ یە و کێ دەست ل پشت ھەیە؟ پتریا بەرسڤان دێ بینی ب حێبەتی ڤە ل تە دمەیزن، داعش و ئیسلام!!! ھەروەکی تە کوفرییەک کری و تە ستەمەکا مەزن ل ئاینێ ئیسلامێ کری. دبیت ھەکە ل دەف کەسەکێ توندرەو ڤێ گوتنێ بێژی، ژ تە تۆرە بیت و بێ بەلگە و بەرسڤەکا مەعقول، کو تە پێ رازی بکەت و بۆ تە باوەرییێ دروست بکەت، دێ بێژیت: “کریارێن داعش دیرن ژ ئیسلامێ!” لێ یا حێبەتی تر ئەوە، ئەو ب خوە ژی نەزانیت چەوا موسلمان بوویە! ھەکە ئەم ل دور نێرینا کەسانێن بەرەڤانیێ ژ ئاینێ خوە دکەن بچین، دێ بینن ل دور گوتنا وان: داعش ژ بەرھەمێ ئەمریکایە، باشە ما ئێک ژمە ب چاڤ دیتییە ل ئەمریکا ئەڤە ھندە سالە کوشتن و خوین رشتن دھێتە کرن! ئەرێ ژ بەر جوداھییا ھزر و بیرێن ئاینی ئەمریکیان سەرێ ئێکدو برییە؟ شەرێ سونە و شیعەیان ھەر ژ جەرگێ ئەمریکا دەرکەتییە؟! (اخوان المسلمین و انصار الایسلام) ھەر ئەمریکی بوون؟! رەنگە دێ ھوسا ھزرکەی، ل ئەمریکا ئاین ب شیری و فتوحاتان یێ بەلاڤ بووی، بابەت نە ئەوە کانێ بەرەڤانییێ ژ ئەمریکا بکەین یان ژ ئیسلامێ، لێ گرنگ ئەوە دەستان ژ خوە خاپاندنێ بەردەین و بەس مەژیھشکییا خوە بکەینە خەلەتییا ئسرائیل و ئەمریکا.
جارێ داعش بەرھەمێ کێ بیت یان ژ کیڤە ھاتبیت و چەواھاتبیت نە ئاریشەیە، ژبەرکو ھزر و بیر و کاودانێن رۆژھەلاتا ناڤین دیاردکەن و بەلگەنە کا بەرھەمێ کێ یە و چەوا ژدایک بوویە، پرسیار ئەوە ئەرێ کار و کریار و رەفتارێن وان ھەمبەری خەلکی نوونەراتییا ئیسلامێ دکەن یان نە؟ ھەر ئەڤە یە بابەتێ دبیتە جھێ راوستیانێ، ھەکە داعش نوونەراتییا ئاینێ ئیسلامێ نەکەت پا بۆچی دیروکا موسلمانان ڤێ چەندێ رەت دکەت؟ ھەکە لاپەرێن دیروکا ئیسلامێ ڤەکەی تو نەشی ئینکار بکەی کو ل پترییا جھان ئیسلام ب شیری یا ھاتیە بەلاڤ کرن و سێ ھەلبژارتن داینە وەلاتییان، یان موسلمان ببن یان جزییێ بدەن یان ژی شەر دێ ھێتە کرن، دەستەسەرکرنا ژنان و کچان و برنا وان وەک جارییە و حلال کرنا وان دناڤا دیروکا ئسلامێ دا ھەبوویە یان نە؟ ئەرێ ئەو کەسێن نھا ل بن فشارا داعش بووینە موسلمان حەز ل سەر ئیسلامێ ھەبوو؟ تشتەک ژ ئیسلامێ دزانی یان ژی ترسا ژ مرنێ ئەو کرنە موسلمان؟ باشە سەردەمێن بھێن ئەو زاروێن ل دیف وان دھێن دێ چ ھزرکەن؟ رەنگە وەکی مە و نھا ھزربکەن ئیسلاما وان ئێکە ژ نیعمەتێن خودای دگەل وان دا کری، ب ھزاران مرۆڤ ل گەلەک پارچێن جیھانێ یێن کو نھا شانازییێ ب ئاینێ خوە دبەن ئەرێ دزانن چەوا موسلمان بووینە؟ ئەرێ وان باوەریەک ھەیە کو ب سەدان ژن و کچێن وان نەبووینە (سەبایا، جاریە..) و ب ھزاران زاروێن وان نە بووینە قۆربانێن شەری تاکو ئەڤرۆ ئەو کرینە موسلمان وەکی نھا مە ب چاڤ دیتی؟! ھەکە گۆمانەک ھەبیت کو داعش گەلەکا ژ رەفتارێن ئاینی دیرە، ئەڤ توندرەویا د ناخێ تاکێ موسلمان دا شین بووی بەرھەمێ چییە. ما گەلەک یا سەیرە ئەوکەسێن تا نھا مێشکێ وان ل وی چەرخی کو بشێن سەرا مروڤەکی جیھانێ خرێ بکەنە تێکدان و قەرە بالغ و رەنگە خوە بدەنە کوشتن ژی. ما گەلەک یا ژێ دوورە ھەر ئەو جورێ مروڤان ببن مروڤ خوەر و درندە ب ناڤێ ئاینی؟ ل کیش پارچا جیھانێ ژبلی یا رۆژھەلاتی مرۆڤ دھێنە کوشتن ل بن پەرێن ئاینی، ھەر ئەو مرۆڤن یێن کو ب بورینا چاردە چەرخان ھێش ل سەر مینبەران دکەنە ھەوار و دبێژن: (پاشکەفتنا ئومەتا ئیسلامێ ژ ئەگەرێ دوورکەتنا وانە ژ ئاینێ ئیسلامێ و بێ تەقواییا وانە). واتا پێشکەفتنا ئەمریکا ویابان و ئەلمانیا و بریتانیا ژ ئەگەرێ باوەری ئینانا وان بوویە ب ئاینێ ئیسلامێ و تەقوا یا وان؟ ما ئەڤە ھەر نەئەون یێن ژ دیروکا کەسێن وەکی (یەزیدێ کورێ معاویە، وەلیدێ کورێ یەزیدی،ھارون رشید و ئەبو جەعفر عبداللە..) پتر ژ ٧٠ جاریان ھەین و مەی ڤەدخوار و داخواز ژ ژنان دکر ل بەر مۆزیکێ بۆ وان ب لەیزن و ژ ئالییەکێ دن ڤە داخوازا جیھادێ دکر و ب ناڤێ ئیسلامێ دەستەلات دکر ومرۆڤ دکوشتن و خوە ناڤ دکر ب خەلیفە! ئەڤجا د قووناغەکا نوودا و ب ھندەک ناڤ و دێمێن نوو، ئەڤ دیروکە یا دھێتە دوبارەکرن. یا سەیر ئەوە د چەرخێ نوکە یێ پێشکەفتنێ دا خەلک ھندێ سادە بیت باوەر بکەن ئەڤە نوونەراتییا خوەدایەکی دکەن و بۆ بەحشتەکێ جیھانێ دکەنە ئاگر.
کەوسەر شەوکەت
ڕێنوس و خاڵبه‌ندی تایبه‌ته به‌نوسه‌ر خۆی – مافی بڵاوكردنه‌وه بۆ نوسه‌ر و كولتور مه‌گه‌زین پارێزراوه