خـەون

خـەون

نەژاد عزیز سورمێ

 

(شەو) لە ژێر لێفەی ھەوران ئارامی گرتووە…

ئاوازی باران پرووشان.

شازادە چاوی بە کڕێوە ڕشتووە..

قامیشی لێواری (ئابزۆ)⁽¹⁾ ی پۆشیوە..

بەخشڵی پەرستگای پاییزیی (نینئەننا⁾⁽²⁾ خەمڵێوە…

 

بەیانی بەم شکۆ و بەرزییەوە

باران دێ کێشمانەی خۆی دەدا

چارۆگەی ڕێژنەدار ،

بە کێڵگەی سکداوی دمووزی⁽³⁾دائه‌دا..

(ڕۆژ) لە ژێر ساماڵی چاوی گەش کەوتووە..

کڵپەی گیان سووتان ،

شازادە ڕووت و قووت

لەبەردەم حەفتەمین ئاستانە ،

بارانی پشکۆی لە چاوە..

 

ھەر بینا شەو داھات

ھەر بینا تریفەی حەوتڕەنگی شازادە،

ختۆکەی شەوی ژێر لێفەی ھەوری دا.

ھەر بینا کڵپەی گیان سووتان

بەیانی (ئوور) و (نیپۆر)ی بەردا.

 

 

نیسانی 1987

 

• ئابزۆ (Abzo ئیشارەتە بۆ ئاوە ئەزەلیەكەی سەربردەی خوڵقاندن.

(2)ئینەننا (nin-an-na) كچی ئاسمان  – (عەشتار).

(3)دمووزیDumiuzi) ) تەممووز.