دوا گفتوگۆم لەگەڵ `گۆشەگیری`* 

دوا گفتوگۆم لەگەڵ `گۆشەگیری`* 

موئەیەد موستەفا

 

 

١

وەک سێوێک نەبووم،

کە کەوتمە خوارەوە،-

نزیک بم لە درەختەکەم،

فڕێدرامە دوورترین ئاوایی.

 

 

٢

وەک گیا لەسەر بنجی خۆم ڕوام،

کەچی با بردمی لە باوەشی سلاڤیدا،-

بە سەرخۆشی، بە بێ هۆشی؛

بە ڤۆدکا،

کۆتاییم بە شەو دەهێنا.

 

 

٣

فەرهادێک بووم،

بۆنی بەهارم دەکرد،

دەمم دەگەیاندە حاجیلە،

دەستم هاوڕێی تفەنگ بوو،-

قاچەکانم لە دوای خۆما ڕادەکێشا؛

ماندووی شەڕ بوون شەڕ!

 

٤

دوای هەر قاوەیەک،

دوای هەر پیاسەیەک،

دوای هەر ماچێکی بلۆند؛

هەستم بە تەنیایی دەکرد،

لە کەشێکی خومار دا دەخەوتم،-

تا خۆم بیربچێتەوە.

 

٥

نامەوێ لێرە بژیم:

بێز لە خۆم دەکەمەوە،

بێز لە سوزی، بێز لە ڤێسنا،

بێز لە ڕۆلاند، بێز لە شرۆیدەر؛

بێز لە ڕیتا، بێز لە مرۆڤ،

 مرۆڤ لەبێز دەکەمەوە.

 

٦

گیربم لە گۆشەیەک دا، نامەوێ،-

ببمە قالۆچەکەی کافکا، گوێم لە دنیا بێ،

کەچی نەتوانم پەیڤێک گۆبکەم؛

دنیا کۆشک بێ، پڕی بێ لە قەحپە و،-

خۆشەویستیش کرم لێی بدا.

 

 

٧

دەگەڕێمەوە ئەی نیشتیمانی دایک،

هەر تۆی بنمیچی خوایی،

 منی ستوونت ڕاگرتووە.

هەر تۆی شاقوڵیانە بەرزم دەکەیتەوە،

تا باڵا بژیم، باڵا؛ ئەی نیشتیمانی دایک:

خۆشم دەوێی.

٢٤\١١\٢٠٢٤، ماینز

 

 

• ئەم قەسیدەیە دوای تەواوکردنی خوێندنەوەی ڕۆمانی (گۆشەگیری) ڕۆماننووس `ئیسماعیل حەمەئەمین` نووسراوە.