په‌ریسا عومه‌ر؛ باژێرێ دیکلان

دەما کو ئەز تەماشەی جادەیان دکەم ئەز دزانم ، ئەز هەست پێ دکەم ڤێرە جهێ من نینە، ڤێرە جهەك نینە کو دەرفەتا ژیانێ بدەتە من ، ئاخر کەنگی هەوە دیتیە کو مریشکەك مل ب ملێ دیکلەکێ ب رێکەکێ دا بچیت!

ڤێرە باژێرێ دیکلانە، ل هەمی سپێدەهیێن ڤی باژێری دا دیکل بانگ ددەن ،دکەنە هەوار و دبێژن ئەم خودانێن ڤێ ئاخێ ینە ، ئەم جیهانێ برێڤە دبەین ، ئەم ل سەراڤا ژوورێ دروینینە خار و هوینێن مریشك خزمەتا مە دکەن، ئەم هەژی دەستهەلاتێ ینە ، ئەم بێهنا گولا د هەلمژین هوین ژی دەستێن خو ل ستریێت وان بدەن، ئاخر خودای ئەمێن دیکل یێن هەژی جوانترینان دیتین و پشتی مە هوینن ئەی مریشکێن لاواز .

دیکل هەمی سپێدەهیان بانگی ددەن و دبێژن ئەم بابێن زاروکاینە و ئەو مولکێن مەنە هوین ژی وان خودان بکەن، بانگی ددەن ئەی مریشکێن لاواز هشیاربن هەردەم دجوان بن ئەگەر نە مریشکێن جوان د زورن ها! رێزێ ل مە یێن دیکل   ل مەیێن خودان هێزو دەستهەلات بگرن ئەگەر نە د زورن ئەوێن ب شوکرو سوپاسی ڤە سەرێ خو بومە د چەمینن! ڤێرە باژێرێ مەیە دڤێت هەمی تشت ب حەزو هزرا مە بیت ئەرێ ما کەنگی هەوە یێن مریشك عەقلێ خو ب کارئینایە ،  شقەستا مەزنان نەگوتیە کو عەقلێ هەوە یێ د ناڤ چوکێن هەوە دا هەرگاڤا هوین رابون دێ ژ ناڤ پێ  یێن  هەوە کەڤیت ، ئاخر ئەڤە خودای یا گوتی کو عەقلێ هەوە بەرامبەری عەقلێ مە دیکلان گەلەکێ بچویکە.

 

 ب دەنگەکێ بلندتر بانگ ددەن هشیاری حیزیێ بن ، نابیت مریشکەك ل پشت سەرێ مێرێ خو چاڤێ وێ لسەر دیکلەکێ دی بیت دڤێت دەهمەنێن هەوە د پاك و پاراستی بن ، و ل بیرا هەوە نەچیت خودای رێك یا دایە مە دیکلان بو خۆ سەحکەینە سێ مریشکێن جوانتر و بخو بخوازین ، ئاخر ئەڤە شەریعەتە و دڤێت پێگیریێ پێ بکەین .

 

مریشك هەمی خەمگین دبن و سەرێ خو دچەمینن لێ دیکل ب تورەیی و کەرب و هەوار ڤە بانگ ددەن هەوە چیە ما هەوە نەڤێت خودا بهەشتا خو ب رسقێ مە بکەت؟ مریشك ب خەمگینی ڤە رازیبونا خۆ دەردبرن ، هەر ل وی دەمی دا هەوارەکا دیژی دکەن و دبێژن ل بیرا هەوە نەچیت ئەی دیکلێن خودان هێز پاداشتا ئیمان و باوەرداران خودا دێ حوریان پێشکێشی مە کەتن چ ژ هندێ خوشتر! ئاخر ئەڤە چیە ئەڤە هەمی دهێنە کرن؟ بونەوەرەك لسەر ڤی جهێ بێ دەستهەلات دا ل ڤی جهێ نازك و جوان ب ڤی رەنگی دکەنە هەوار و ب سەر بەرزی و روی ب رویڤە دبێژن ئەم دێ زولمێ ل هەوە کەین و هوین ژی ب مەمنونی ڤە د رازیبن!

 

جار بو جارێ دەنگێ خو بلند تر لێ دکەن بلندتر و بلندتر و حوکم ل دویڤ حوکمی ،گونە‌هـ ل دویف گونەهێ ، نەحەقی لپشت نەحەقیێ و ل چ دەمان هەستێ پەشیمانیێ د چاڤێن وان دا نا دەرکەڤن ، بەردەوام گومانان دروست دکەن، گومان ژ هەبوونا خودای.

 

 ئاخر ئەو ژ روژەکێ نا ترسن کو هەمی مریشك ب پەقن  و هەمی هێزو دەستهەلاتا خو کو تا نوکە یا دناڤ دلێ وان دا ڤەشارتیە ب دەرێخن و دگەل دەر ئێخستنا وان هەمی گەردوون ژ ناف بچیت! ،  سەرێ من یێ ئالوز بوی ژ ڤان دیمەنان ئاخر چاوا چێدبیت تا نوکە ئەوان کەلها مەزنا ژنان ئەوا تژی ژ سوز و دلوڤانی و عەقل و زانست و جوانی و نازکیێ نە دیت بیت؟ ، یان ژی ئەو دبینن لێ هند عەقلێ وان یێ سڤکە هەست پێ ناکەن تا دەمێ ئەو کەلهە ب سەر سەرێ وان دا د هەرفیت…