ڕۆمان؛ ئەو هاوارەی نەبیسترا - ئارام موحەمەد - بڵاوکراوەکانی نوسیار ٢٠٢٢

لەبارەی ڕۆمانی `ئەو هاوارەی نەبیسترا`ی `ئارام محەمەد`ەوە


Loading

لەبارەی ڕۆمانی (ئەو هاوارەی نەبیسترا)ی (ئارام محەمەد)ەوە
ئەم ڕۆمانە، لەبارەی (دڵدار)ی شاعیرەوەیە، باسی ژیان و خەبات و مردنی دەکات. لەڕێی ئەویشەوە باسی گوتارەکانی سیاسی و دینی و ڕۆشەنبیری کورد، لە سەردەمێکی مێژوویی گرنگدا دەکات، کە سەرەتای دامەزراندنی دەوڵەتی ئێراق و دامەزراندنی حزبەکانی کوردستانە. ماوەی نێوان یەکەم و دووەم جەنگی جیهانییە، کە کورد لە عێراق و پارچەکانی تریشدا، ئەزموونی کۆمەڵێ کێشە و ململانێ و شکست و خەون و شۆڕش دەکات.
لە ڕێی ڕووداوەکانی ئەم ڕۆمانەدا، لە دیوێکی وجودییەوە کوردبوون و شاعیربوونی (دڵدار) دەبینینەوە. موقەدەسەکانی ئەو گەنجە، خەیاڵ و بیرکردنەوە و مەعریفەکەی، خۆزگە و هیوا و هاوارەکانی. لە هەموویشی گرنگتر، تێدەگەین (ئەی ڕەقیب) وەک گەشانەوەیەکی ڕۆحیی نەتەوەی کورد، بۆ لە (دڵدار) جیلوەی دا؟! بۆ کەسێکی تر لەم سەردەمەدا نەیتوانی شیعرێک بنووسێت، ببێتە پەردەلادەری ئەوەی ڕوحی کوردی دەخستە پەردەوە؟! بۆ ئەم دەقە، بووە وێردی سەر زمانی کورد و تا ئێستاش هاوارەکەی هەر بەرز دەبێتەوە؟!
ئەم هاوارە پەردە لەسەر جیهانێکی نادادپەروەر هەڵدەداتەوە، ستەمی زۆرداران ئاشکرا دەکات، ناشیرینی و ئازاری خیانەت دیاردەدات. هاوارێک ئەگەرچی هەمیشە بەرز دەبێتەوە، بەڵام نابیسترێت!
دەستخۆشی بۆ کاک (ئارام محەمەد)، کە بەم ڕۆمانە هەنگاوێکی گرنگی هاویشت، تا ئەدەبی کوردیش بتوانێت لەڕێی ڕۆماندا، کەسانی ڕووناکی خۆی پیشان بداتەوە. ئەم ڕۆمانە ڕێز و ستاییشێکە بۆ روحی گەشاوەی (دڵدار) و ماڵەکەی، کە بەتەواوی شایستەیانە.
ڕۆمان؛ ئەو هاوارەی نەبیسترا – ئارام موحەمەد – بڵاوکراوەکانی نوسیار ٢٠٢٢
تایبه‌ت به‌ كولتور مه‌گه‌زین – بیروڕاكانی بابه‌ت و ڕێنوس خاڵبه‌ندی تایبه‌ته‌ به‌نوسه‌ر خۆی. كولتور مه‌گه‌زین. ته‌نها دانانی لینكی بابه‌ت ڕێگه‌پێدراوه‌. هه‌موو په‌ره‌گرافێك و پۆستكردنێك بێ دانانی لینك و ناوی نوسه‌ر و گۆڤاره‌كه‌ دژی یاسای كۆپی ڕایته‌ و لێپێچینه‌وه‌ی یاسایی له‌ دوایه‌. ‌