له‌ كوێم

جه‌لالی میرزا كه‌ریم – شیعرێکی ساڵی ١٩٧٥

جه‌لالی میرزا كه‌ریم ١٩٣٥ له‌دایكبووه‌ نه‌وه‌ی نوێخوازانی كۆمه‌ڵه‌ی ڕوانگه 1993.01.14دا به‌نه‌خۆشی دڵ له‌شاری هه‌ولێر كۆچی دواییكرد.
1,859
جه‌لالی میرزا كه‌ریم ١٩٣٥ له‌دایكبووه‌ نه‌وه‌ی نوێخوازانی كۆمه‌ڵه‌ی ڕوانگه 1993.01.14دا به‌نه‌خۆشی دڵ له‌شاری هه‌ولێر كۆچی دواییكرد.

له‌ كوێم

جه‌لالی میرزا كه‌ریم

 

وڵاته‌كه‌م.. ئافره‌تێكه‌،

مه‌مكه‌كانی.. دوو ده‌ریاچه‌ی پڕ زووخاوه‌

((منیش هێشتا، شیره‌ خۆره‌م))

– دایه‌! له‌ كوێیت؟

دڵداره‌كه‌م.. سنوورێكه‌،

بست به‌ بستی به‌ ته‌لبه‌ندی په‌شیمانی داچێنراوه‌

((منیش تازه‌ هه‌رزه‌یه‌كی ئه‌و ڕێ كوێره‌م كه‌ نامه‌ی دڵداریی تری تیا سووتێنرا

پێغه‌مبه‌ری تیا فرۆشرا))

– خوایه‌! له‌ كوێیت؟

دایه‌! پێیان وتم: ئه‌مریت!

وتم: له‌ كوێیت؟

كاتێ.. مردم؛ پێیان وتم:

له‌ نێوانی ڕێگای دۆزه‌خ و به‌هه‌شتا

كامیان ئه‌گریت؟

وتم: هیچیان..

چونكه‌ له‌ناو زامه‌كانی نه‌خشه‌ی له‌شتا

به‌غدا و تاران..

ئه‌سته‌مووڵ و شامیش گه‌ڕام،

هه‌ر نه‌مزانی ئاخۆ له‌ كوێیت؟

* * *

چەند هێڵکاریەکی هونەرمەند بالدین

خوایه‌! پێیان وتم: ئه‌ژیت!

وتم: له‌ كوێیت؟

كاتێ فه‌رمان درا بژیم.. پێیان وتم:

له‌ نێوانی باخی خه‌م و بیابانی پێكه‌نینا؛

چ لایه‌كیان هه‌ڵئه‌بژێریت؟

وتم: هیچیان..

چونكه‌ له‌ناو تابلۆكانی خه‌وبینینا

بۆ تۆ گه‌ڕام

ڕێی مه‌رگ و ژینم لێ ون بوو،

ده‌ پێم بڵێ.. ئاخۆ له‌ كوێیت؟

له‌ شوێنێكم..

جێی هه‌ناسه‌م نابێته‌وه‌.

له‌ شوێنێكم..

په‌نجه‌ره‌ بۆ پاساری دڵ ناكرێته‌وه‌.

له‌ شوێنێكم.. بێ ناونیشان

نازانم ژیانه‌.. یاخود ڕێگای نه‌مان؟

* * *

ته‌نیا خۆمم،

نازانم.. كام ڕێگا ئه‌مبا؟

كام ڕه‌شه‌بای ئاگراوی هه‌ڵمئه‌گرێ؟

كام شمشێری ژه‌نگ هه‌ڵگرتوو هه‌ڵمئه‌دڕێ؟

ڕاسته‌.. مۆمم،

به‌ڵام.. كام ژیله‌مۆی فرمێسك هه‌ڵمئه‌كا.

* * *

ده‌نگم.. له‌گه‌ڵ شڵپه‌ی خوێنی

چوارده‌ ساڵه‌ی چرۆی ئاواته‌كانمانا..

له‌ كاروانی خه‌می گوڵی

نه‌ورۆزا ڕه‌نگ ئه‌داته‌وه‌.

ڕه‌نگم.. له‌گه‌ڵ ڕوخساری ڕێی

دوانه‌هاتووی ماندووانا..

له‌ كه‌روێشكه‌ی كه‌ژاوه‌ی مه‌رگی نیگارا،

ده‌رگای به‌ستی ته‌وژمی خۆر ئه‌كاته‌وه‌.

ژانم.. له‌ توێی بزه‌ی لێوا،

سوێی داهاتووم ئه‌خواته‌وه‌.

* * *

ئه‌مجاره‌ش تووله‌ڕێی كێوی هیوا ئه‌گرم،

گیانم.. له‌ناو گۆڕی خۆیدا،

چه‌كی مردووم ئه‌شواته‌وه‌؛

هه‌وراز ئه‌بڕم.

1975

 

 

تایبه‌ت به‌ كولتور مه‌گه‌زین – بیروڕاكانی بابه‌ت و ڕێنوس خاڵبه‌ندی تایبه‌ته‌ به‌نوسه‌ر خۆی. كولتور مه‌گه‌زین. ته‌نها دانانی لینكی بابه‌ت ڕێگه‌پێدراوه‌. هه‌موو په‌ره‌گرافێك و پۆستكردنێك بێ دانانی لینك و ناوی نوسه‌ر و گۆڤاره‌كه‌ دژی یاسای كۆپی ڕایته‌ و لێپێچینه‌وه‌ی یاسایی له‌ دوایه‌. ‌

You might also like More from author

error: Content is protected !!