سەباح ڕەنجدەر

چوارینه‌كانی بابا تاهیر هه‌مه‌دانی


Loading

چوارینه‌كانی بابا تاهیر هه‌مه‌دانی

– پەخشانە قەسیدە –

 سه‌باح ڕه‌نجده‌ر

 

 

 

پۆست کارتێک بەروونی میتۆدی ئیمپریشینستی ڤانکۆخ نیشاندەدات- پەیمانگای ڤانکۆخ
The overgrowth on the
postcard shows very clear similarities to the shape of the roots on Van Gogh’s painting.’ Photograph: Institut Van Gogh

گله‌یی گۆزه‌

 ئاو لە جۆگەلەکانەوە دەچێتەوە ژێر زەوی

پاراوتر دەبم تا گۆزە گلەییم لێ نەکات

کاتێک ڕێڕه‌وی ده‌گۆڕێ و به‌ خێرایی هه‌وره‌برووسكه خۆیمان لێ ون ده‌كات

ئێمە لە چۆڵەوانییەکی ترساودا بیری نیگای تێکەڵاوی دەکەین و هەڵاتوویەکین له‌ بریسكه‌ی قه‌ڵغان و شمشێر خۆمان سڕیوه‌ته‌وه‌

 

 

جه‌للادی ناقۆڵا

 بەیان لێرەوە تێپەڕی ڕووناکی کۆ کردەوە و لەگەڵ خۆی بردی

نەیهێشت باڵندە چاو به‌ دەنکەگەنم گه‌رم بكه‌ن و دەنووک خۆشكه‌ن

نۆبەتدارێک تازە لەسەر گردێکی دەوردراو بە شۆڕەبی هاتبووە خوارێ و تفەنگی لە قوڵغ جێ هێشتبوو

ته‌می هه‌ست له‌سه‌ر حیكمه‌تێك لاده‌دا و ده‌ڵێت جیهان لە بۆشایی قۆچی كه‌ڵه‌كێویدا جه‌للادی ناقۆڵا‌ په‌روه‌رده‌ ده‌كات و تفه‌نگ ده‌لاوێنێته‌وه‌

 

دوا هێڵی ڕۆژی شه‌شه‌م

 تابلۆی زەوی هێشتان هەموو هێڵەکانی نەکێشراون

باڵندە لەسەر لکە پڕەکان تووشی حەپەسان هاتوون

لە ڕێگادام چەند جارێک ویستوومه‌ پێی ڕابگەیەنم هێڵەکان تەواو دەکەم

لە زەردەی ئێوارەیەکدا لوورەی ئاگر دەترسێنم و فرمێسکی نابەجێ ناڕژێ

ڤانکۆخ ١٨٩٠؛ قەلەڕەشکەی سەر وەردەکان – هونەری ڕوانینگیرەکان (ئیمپریشینیزم)
Wheatfield with Crows — oil on canvas 101×50 cm Auvers june 1890

 

به‌ده‌م ڕێوه‌ی پرسه‌ی نان

 لە دڵی بە خورپەوە نزیکی و لە چوونە پرسەی ناندا بە تەنیشت یەکەوە بەڕێگاوەین

پەرچەمت لەسەر چاو لا دەدەم و شان بە زینی ئەسپەکانمان دەدەین

ڕێگا شه‌رمن و کەمڕووە دڕکوداڵی دنیا ده‌ستی زاڵی له‌سه‌ری ڕاگرتووه‌

نان پاداشتی زەردەخەنەی ساز و سۆزی دامەوە و زرینگانه‌وه‌ی گیانیش دەزانێ خوێن له ‌شه‌قام زمانی پڕ ده‌بێ له‌ خواست

 

 

له‌ناو دێرینترین شوێنپێ دووباره‌ بوومه‌وه‌

 کۆتەرەدارێک لە حەوشەمان هێندەی کێوێک به‌ ده‌ستوپێیه‌ و درەخت لە دەوری ڕواوە

ماڵیش پەنجەرەی گەورەتر و کۆڵان نامۆ نەبوو

چاودێرێكی خه‌واڵوونیم و لەبەر ئاگردانی کوژاوەش دانەنیشتووم

گه‌نجینه‌ی پێی مرۆڤ بۆ تاهەتایە له‌ شوێنێك له‌ نێوان دوو شوێندا ده‌مێنێته‌وه‌ و بارانی په‌ڵه‌ كۆ ده‌كاته‌وه‌

 

 

بزربوونی ناونیشانی حه‌وا

 ئادەم بۆنی ددانی ڕزیو لە دەمی دێ

حەوا خۆی لە تەنیایی مارە کرد و ناونیشانی بزر کرد

کەس تەماشای ئاشنای خۆی نەکرد و ناسین تەفرەی داین

ئەو درەختانە ئاشنامان‌ بوون ڕەگیان گەیشتبووە ناو ڕووبارە نزیکەکان

 

وا ناوی گوڵی باخچه‌ی گه‌ڕه‌ك ده‌زانین

 ده‌ست باڵه‌ بۆ فڕین و خستمه‌ ناو ده‌ستێك تازه‌ سڵاوی له‌ زه‌وی كردبوو بە زمانی سێبووری توانی پێم بڵێ ئەستێرەی مایەوەی دوای شەوم و بۆ تاهه‌تایه‌ ڕاسته‌قینه‌م

جامێكی فافۆن پڕ بوو لە ئاو

تای منداڵانی گەڕەکی هێنا خوارەوە

گوڵ ناوی گوڵی تەنیشتی زانی و ناونیشانی باخچەکانیان گوت و ستایشیانكردن گه‌شه‌ تێیدا كۆتایی نایه‌

 

 

ڤانکۆخ ١٨٨٩؛ مانگە شەو – هونەری ڕوانینگیرەکان (ئیمپریشینیزم)

سه‌رابی كوێر

 لە پەڕینەوەی هێڵێکی ئاسن دەموچاوم پڕ خوێنی گەشە بوو

دەستم بۆ درێژکردی نێوانمان بووە تراویلکەیەکی کوێر یان گوڵی یاده‌وه‌ری

له‌ كه‌شوهه‌وایه‌كی پله‌به‌رزدا به دەوری سووڕامەوە و له‌ترم دا

وەرزی دروێنەم بزر کرد گوڵەگەنمێکی لێکراوە بووم

 

 

 

له‌سه‌ر پشتی ئه‌سپێكدا

 لەو کاتەیدا شادی هەبوو

باڵندەیەک لەسەر پشتی ئەسپێک چاوی سووڕاند بەپەلە کەوت و باڵی خۆشكرد

لکە گیایەکی کەوی بانگی کردبوو

هەمیشە بیر لە ئۆتۆمبێلە سەربازییەکان بکەرەوە تیژپەڕ بەلاماندا تێدەپەڕێ و فیشه‌كڕشێنمان ده‌كه‌ن

 

 

سۆمای شار

 زەریا مەند نییە لە کەناری خۆی ورد بووه‌تەوە و دارەبازە دەمەونخوون داندراوە

منیش بەدیار مۆمی ڕووداوێك دەمارەکانم دەپشکوێن و ددانم ده‌چێته‌وه‌ سه‌ر یه‌ك

ڕووبارێک بەرەو کانی باسکی داوێ و تاو دەدا

گڕێک سۆمای شاره‌ لەناوی یاری دەکا و شاد و شادمان لە حەوت ئاسمان ئەستێرەی هەیە

تشرینی یه‌كه‌می 2020 هه‌ولێر

 

 

 

تایبه‌ت به‌ كولتور مه‌گه‌زین – بیروڕاكانی بابه‌ت و ڕێنوس خاڵبه‌ندی تایبه‌ته‌ به‌نوسه‌ر خۆی. كولتور مه‌گه‌زین. ته‌نها دانانی لینكی بابه‌ت ڕێگه‌پێدراوه‌. هه‌موو په‌ره‌گرافێك و پۆستكردنێك بێ دانانی لینك و ناوی نوسه‌ر و گۆڤاره‌كه‌ دژی یاسای كۆپی ڕایته‌ و لێپێچینه‌وه‌ی یاسایی له‌ دوایه‌. ‌