ھەناسەیەک ژ کورتە فلمێ (ھشیارکرن)* یێ سینەماکار (روال ناڤگوندی)

دیار عەبدولعەزیز

دیار عەبدولعەزیز
867
فلمێ (ھشیارکرن) یێ سینەماکار (روال ناڤگوندی)

ئێدی دوژمن گەھشتە ئاستەکێ ھۆڤایەتییێ، گەھشتە پاشڤەمان و بێوژدانییەکا دوور ژ ھەموو بھا و بنەمایێن مرۆڤایەتی و ژیاندۆستییێ، ل جھێ کو ھەبوونا کەس و ئالیێن ھەمبەری خوە، ھەیینەکا جودا ژ ھەیینا خوە، ئەو کەس و ئالیێن مینا وی ھزر ناکن، وەکە وی ناژین، ب ئاوایەکی جودا ژیان و رۆناھییێ دبینن، ب دەنگەکێ دی راستی و حەقیقەتێ دخوینن، ل باتی ڤان جوداھییان بکەتە رۆناھییەکا جودا ژبۆ دیارکرنا ناسنامەیا خوە و ھەبوونا خوە سیناھیێ ژ وێ رۆناھییێ بکێشیت، ل جھێ کۆ ھەولبدەت جوداھی و ئاوایێ ژیانکرنا یێن دن د سەقایەکێ پر ژ ژیاندۆستی و ھەڤدوپەژراندنێ دا بەرجەستە بکەت … بەروڤاژی ڤێ یەکێ ب تۆندترین شێوە ب وەحشیەتەکا ڤەرێژا وێ ژ ھزرکرنەکا سلبی و دەروونەکێ پر گرێک و تاریاتی ھاتی، ھەولدا وان ھەموو ھەبوون و ئالی و ھەمەرەنگییا جودا ژ یا خوە ژناڤ ببەت و ببۆھژینیت.

 

ھەلبەت ئەڤ بشافتنە (ئەسمیلاسیۆن)ە، ئەڤ ژناڤبرن و حەلاندنا ناسنامە و کەلتوور و زمان و شوونوار و شەھرستانی و.. تاد، ل سەر بنەمایەکێ سایکۆلۆژییەکا سادی و ھزرکرنەکا سلبی ھاتبوونە دارشتن، ژبۆ ئەنجامدانا ڤێ پرۆسێسا فەناکرنا ئەوێن نە وەک خوە، پلانێن دۆژمنێ ھۆڤ ژ رەشترین ئەقل، ژ پیسترین دەروون دەرکەفتبوون، ب خوینترین و چەپەلترین دەست ھاتبوونە دانان، ئەم ژبیرنەکەین ھەموو دەمان ئەقل بەر ب ئالییێ رۆناھیێ و پۆزەتیڤ و باشییێ ناچیت، ھەمی ھزرکرن د ئیجابی و مفادار نینن، ھند جاران ھزرکرن د رەوشەکا مەترسیدار دا، د بیاڤەکێ خراب دا بەرھەمەکێ ترسناک و نەباش ل پاش خوە دھێلیت، ھەکە کوور تەماشە بکەین ل پشت ڤان دکتاتۆر و ستەمکاران، ل پشت ڤان ئەنفال و جینۆساییدان ئەقلەک ھەیە، لێ ئەقلەکێ درندە و سلبی، سیستەمەک ھەیە لێ سیستەمەکێ پر خوین و ستەم و تاری! ئەنفال ژی ژ ڤالاھییەکێ نەھاتییە، بەلکو ب سیستەم و ئەقلانییەت ھاتییە دانان و جێبجێکرن، ئەنجامدەرێن ئەنفالان ب سیستەمەکێ بێ ئەندازە نقۆمی فاشیەتێ بووینە و قەبوولنەکرنا ھەر لڤین و دەنگەکێ جودا ژ ئەرکێ وان یێ بنگەھین بوو، ب بریارا دکتاتۆرەکێ تا سەر ھەستی ترسنۆک و باوەری ب خوە و غەیری خوە نەیی، ھەر ھەبوونەکا نەکەڤیتە بن ئایدۆلۆژی و سیبەرا وی ب ھەبوونەکا مەترسیدار و گەف ل سەر خوە و سیستەمێ خوە یێ ھۆڤ دزانیت، کورد و کوردستانی ئەو ژینگەھ و مرۆڤێن خوەدی سەقا و کەلتوور و رەنگێن خوەیێن جودا، چ ھێز و چ دەست نەشیان ئیرادە و بزاڤێن وان رابوەستینن ھەرچەندە دبت تا رادەیەکی ھاتبنە پاشڤەبرن یان ژی ب نڤاندنەکا مۆگناتیسی ھاتبوونە ئاراستەکرن! سەرەرای وێ چەندێ تا کوورترین وێستگەھا دیرۆکێ کوردان ب ڤی فۆرمێ خوەیێ ھەیی جھ و مافێن غەیری خوە نەستاندینە، دبیت ل سەردەمێ شاھنشینان ژ ھەڤدو خوار بیت! دبیت ژی ل دەمێ ئمپراتۆرییەتێن کەڤن دەستھەلاتا خوە بەرفرەھـ کر بن لێ ل ھەمبەر ڤێ بێ ھەمپا ژبۆ مانا خوە، ژبۆ پاراستنا ھەبوونا خوە، ژبۆ بەرەڤانیکرنا ژینگەھ و کەلتوورێ خوە خەبات و جەنگێن بەردەوام دکرن، ئەو یەک ژی بوو سەدەم چ ھێز و چ ئالی نەشیان ب یەکجاری وان ژناڤ ببەن، ب یەکجاری ھەموو کوردان ب شوونوار ڤە نەھێلن و فەنا بکەن.

 

ئەنفال ئەو دارا رھ و ریشالێن وێ بۆ دیرۆکەکا پر خوین و شەرمەزاری و تۆندرەوی ڤەدگەریت، ئەو پرۆسێسا ژ ھناڤێن ژینگەھەکا پتر ژ بارانێ خوین لێ رشتی دەرکەفتی، نەمرۆڤێن وێ یێن خوەسەپین و چەوسێنەر ژ رڤشتا کوشتن و چەوساندن و تالانان، بەردەوام ئەنفال و تالان پشکەک بوون ژ ھەبوون و شانازییا وان، چ ئەڤ ئەنفالە د سپی بان وەک حەلاندنا کەلتوور و زمان و ناسنامەیان، چ ئەنفالێن سۆر و رەش ژ فتوحات و داگیرکرنان ھەتا ئەنفال و کیمابارانان و ھەر ھێرشەکا ل بن ناڤێن جودایێن ئۆلی و نەتەوەیی ژ ئالیێ نەتەوەیێن دەورووبەران بۆ سەر کوردان ھاتین ئەنجامدان، وێ چەندێ دیار دکەن کۆ دۆژمن ب وێ قەناعەتێ گەھشتییە ئێدی کوردان وەک فیزیک و ھەبوون و ژیان و ژینگەھ و خوەزا و شوونوار و شارستانیەت و کولتووری و جوانی ژناڤببەت، نەھێلیت، ببۆھژینیت، بنبڕ بکەت.

 

ئەڤ گۆتارە من ژبۆ فلمێ (Awakening)* یێ ھەڤالێ من یێ سینەماکار (Rowal Navgundî) نڤیسیبوو، کۆ پشکداری پێنجەم فلمەفەستڤالا دھۆک یا نێڤدەولەتی ببوو.

 

ڕێنوس و خاڵبه‌ندی تایبه‌ته‌ به‌ نوسه‌ر خۆی.

You might also like More from author

error: Content is protected !!