قاوەخانەیەکی تر
قەسیدە
ئیسماعیل حەمەئەمین
دەبێت لەهەموو شارێکدا قاوەخانەیەک هەبێت بۆم،
لەهەموو شارێکدا دەبێت حەشیشەکێشێک بدۆزمەوە، پێکەوە بۆ ئەم هەموو چاوڕاونیە بگرین…
دەبێت لەهەموو شارێکدا سۆزانیه‌كی میهرەبان، بەتەمەن و قەڵەو بدۆزمەوە، بۆ ئەوەی لەنێو پێچەکانیدا خۆم گووم بکەم…
دەبێت لەهەموو شارێکدا شێتێک هەبێت پێکەوە جڕت بۆ هەموو یاسایەک لێبدەین، کە بیروکرات دایڕشتبێت، پێکەوە شەق لەهەموو قۆدیەکی جێهڵڕاوی لاکۆڵانە تەریکەکان هەڵبدەین، بۆهیچ نا، تەنها بۆئەوەی خانمە لوتبەرزەکانی ئۆرستوکراتیەتی حیز، بێزارکەین…
دەبێت لەهەموو شارێکدا کۆمەڵێک گەنج بدۆزمەوە لەگەڵ هەڵهاتنی خۆردا تاوەکو خۆرئاوا بەسەر جادە و شەقامەکاندا بێهودە بێن و بچن، ئێواران دوور لە هەموو نائومێدیەکانی باوکان، لە نێو باخچەکاندا سێکس بکەن، یاخود وەک ڕەبەنێکی ئەبەدی لەبن درەختەکاندا دەستپەڕ لێدەن…
Woman before a Mirror
1897
Henri de Toulouse-Lautrec
دەبێت ئەم ڕۆحە تاڕواگەیەی من لەهەموو شارێکدا کۆڵانی پێچاوپێچ و تێرمیناڵی چۆڵی لەبیرکراو بۆ پیاسەکردن، یاخود بۆ قووڵکردنەوەی تەنیایی خۆی بدۆزێتەوە…
دەبێت لەهەموو شارێکدا مێینیەک هەبێت ئەشقم بێت و مێینیەک هەبێت حەزم لە گۆشتی بێت و مێیینه‌یەکیش هەبێت ڕقی دنیای لێم بێت…
دەبێت لە هەموو شارێکدا بگەڕێم بەدووی وێستگەی شەمەندەفەردا، یاخود گەر نەبوو، بگەڕێم بەدووی ئەو تێرمیناڵەی سەدەیەکە لەخەونی چەند کەسێکدا نوستووە، بچمە نێو شوێنی خەیاڵبۆکراوی، و لەبەردەم هێڵی ژمارە سێ دا بوەستم و چاوەڕوانی ئازێزێک بکەم کە بە هەڵە بەرەو ئێرە دێت.
دەبێت لێرەو لەوێ، لە شارێکدا ئەو نابووتانە هەبن کە بەپڕاوپڕی ژیان ژیاون و ئێستا لەوە تێگەیشتوون کە دونیا هیچی دیکە نییە جگە لەتێپەڕبوون نەبێت بەنێو هیچدا… دەبێت لەهەموو شارێکدا ئەوانە بدۆزمەوە و پێکەوە تابەیانی عەرەق لە پیاڵەی بچوکی بەرچاییدا بخۆینەوە…
دەبێت لەهەموو شارێکدا دوکانێکی حەوزی ماسی بدۆزمەوە بۆئەوەی تێر بۆنی ئەو دەریایە بکەم کە نامەوێت لەکەنارەکانیدا بژیم، ئەو دەریایەی بەردەوام لێی ڕادەکەم و دەمەوێت تەنها لەنێو خەیاڵدا شەپۆل بدات…
دەبێت لەهەموو شارێکدا پەنجەرەیەک بدۆزمەوە لەکاتی بێزاریدا بە بەردەمیدا تێپەڕم و خۆم لەو دیووی شوشەبەندیەکەوە ببینم…
دەبێت لەهەموو شارێکدا لێبوکێک بدۆزمەوە بەئۆکۆردیۆنێکی ڕەنگاڵە، پێکەوە لەسەر شەقامەکاندا تا ئێوارە سەما بۆ مناڵان بکەین…
دەبێت لەهەموو شارێکدا مناڵێک بدۆزمەوە کە ناوێکم لێ بنێت هیچ مانایەکی نەبێت، سەرسام بێت بەدەموچاوم وەک ئەکرۆباتێکی ئەبەدی…
دەبێت لەهەموو شارێکدا ڕووبارێکی بچکۆلە، کارێزێکی لەبیرکراو، یاخود چ نەبێت فوارەیەک هەبێت، تێدا قەوزەی هاوینانی یادەوەریەکانمی چەکەرەبکات…
دەبێت لەهەموو شارێکدا ناشوێن هەبێت لە شوێنەکاندا، بینراو هەبێت لەنێو نەبینراودا، ونبوون هەبێت لەجیاتی ئەشق و بیرکردنەوە هەبێت لەجیاتی توڕەیی…
Henri de Toulouse-Lautrec
Rue des Moulins, 1894, 1894
دەبێت لەهەموو شارێکدا منی لێبم، شاعیرێک، چەلۆژەنێک، جازیستێکی شێت هەبێت.
دەبێت لە هەموو شارێکدا شێوەکارێک هەبێت جگە لەخەت و ڕەنگ و ئەبستراک نەبێت، چیتر حەزی لە دونیای ڕیاڵ نەبێت.
دەبێت لە هەموو شارێکدامنی لێ بم، چیرۆکنوسێک هەبێت، بۆئەوەی هەموو ئەمانە بەخوار و خێچی بگێڕێتەوە…
دەبێت لەهەموو شارێکدا کەمنی لێ بم قاوەخانەیەک، سۆزانیەک، شاعیرێک، وێستگەیەکی شەمەندەفەری بەجێماوی لێ بێت.
دەبێت لەهەموو شارێکدا کۆڵانێکی لێ بێت، جگە لەمن کەسی دیکە بەنێویدا خەون نەبینێت…
دەبێت لەهەموو شارێکدا کەمنی لێبم خەونێک هەبێت، قاقا بە دونیا پێبکەنێت، کلاسیک هەبێت، جازیست و ساکسیفۆنیستێکی ئێواران هەبێت، کەمانچەژەنێک هەبێت، لەسەر تەپڵەکێکی بچووک تاوه‌كو نیوە شەو ڕستەی موزیکی بێمانا بژەنێت…
دەبێت لەهەموو شارێکدا منی لێبم، بیرۆکە لاکەوتووەکانی سەر جادە هەبن ، کە بۆمن جگەلەدۆزینەوەی فۆرم نەبێت هیچی دی نین…
دەبێت لەهەموو شارێکدا منی لێبم ئەو ئەو مێینەیە هەبێت، لەچاوەڕوانیمدا لەسەر جێگای چێژ بەنێو پەردەسپیەکاندا بێت و بچێت…
Henri de Toulouse-Lautrec – ” Femme nue allongée ” – Huile sur carton – 22 x 30 cm
دەبێت لەهەموو شارێکدا کەمن بۆی دەچم، لەواگۆنی دوای دواوە، لەبەشی نابووت و خەوبینەر و حەشیشەکێش و سۆزانی لەبیرکراو و لێبوک و کەمانچەژەن و شاعیری ڕۆمانسیدا دانیشم… دەبێت لەواگۆنی دوای دواوە دانیشم تەنها بۆ ئەوەی کە لە وێستگەی خەیاڵی ئەو شارەدا دابەزین، بۆئەوەی هەموو پێکەوە لەو قاوەخانەیەدا جێگیر بین کە کورسیەک لەسووچێکیدا چاوەڕوانی منە. سووچێک لەقاوەخانەیەکدا چاوەرێی ئەوەیە چیرۆکی هەموو لێبوک و سۆزانی و حەشیشەکێش و جازیست و خەوبینەرەکان بنوسمەوە..
دەبێت دوای قاوە خواردنەوە ، لە سووچە تاریکەکاندا لەگەڵ سۆزانیە بەمیهرەکاندا بگرین، لەگەڵ لێبوکی ئازیزدا سەرەموقلات بدەین و هەڵقوونە بکەین، کە هیلاکیش بین لەژێر ڕیتمی نەرمی سێکسیفۆنی جازیستەکەدا گوێ لە شیعری ڕۆمانسی بگرین و بیر لەو پەنجەرەیە بکەینەوە کەڕۆژێک بەبەردەمیدا تێدەپەڕین…
دەبێت لەهەموو شارێکدا، بۆمن قاوەخانەیەکی ئاوەها هەبێت،
دەبێت قاوەخانویەکی ئاوەها، قاوەخانەیەکی تر هەبێت…
ئەڵمانیا – كه‌مپتن – سنووری سویسرا ٢٠٠٨
تابلۆکان؛ هونەرمەندی ڕوانینگیر (ئیمپریشینست – انطباعی) فەڕەنسی هێنری لوتریک دولوزە ١٨٦٤ – ١٩٠١