ئەدۆنیس شاعر و رەخنەگرێ سوری دبێژیت: “ھەر شاعرەکێ مەزن ھزرڤانەکێ مەزنە، ھەر چنە بیت دڤێت کو شاعر خوەدان ھەلویست بۆچوون و ئاحفتنا خوە یا تایبەت بیت ل سەر ھەر بوویەرەکا د ژیواری دا رووددەت”.
مازن یارسانی د شعرا خوە یا (تو ژکووڤە ھاتی) دا شیایە تبلێن خوە بدانیە ل سەر گیانێ ژنەکێ و بکەتە سازەک و ھندەک ئاوازان ژ ئازادییا وێ بژەنیت و وێنەیێن وێ ژبۆ خواندەڤانی بەرچاڤ بکەت.
ئەو شاعرێ ب دروستی ژ روحا خوە ئازاد دبیت و ب پێنوسێ خوە بکاریت ژ زاردەڤێ دارەکێ باخڤیت و نێرینێن دارەکێ ژبۆ خواندەڤانی بدەتە ناساندن، دبیتە روحەکا جیھانگیری، تێکەلی ھەر تشتی دبیت بێ کو ھەستا وی یا کەسوکی ل سەر زال ببیت.
تشتەک بەلاڤە دەمێ شاعر ب شعرا خوە تێکەلی ژنەکێ ببیت.
بەلێ ب نێرینا من پترییا جاران ھەستێ شاعری ئەزوکی پێڤە دیار دبیت و پتر خوە گەھاندییە لەشێ ژنێ و روژا دن ئەو ب خوە دزانیت کو ئێدی ژ وی ھەستی لێڤە بوویە، ب درەو ھەستێ خوە ددەت ناساندن و ھندەک دەمێن دن کەربەک مەزن ژ ژنێ رادکە.
د کەڤن دا هەتا نوکە شاعری ھەولدایە کو ب رێکا شعرێ خو بگەھینیتە لەشێ ژنێ، ژ بەر جوانیێ و حەزا خوە یا غەریزی، لێ کێم شاعران ھەولا گەھاندنێ ب روحا وێ دایە چونکە روحا وێ سیفاتێن خودایی ل جەم ھەنە و ھەر کەس پەنایێ ژبۆ دبە لێ کێم دکارن ببینن.
وەک چاوا محمود دەروێش د شعرەکا خودا دبێژیت:
(ئەز ل سەر لەشێ تە بەلاڤ دبم وەک گەنمی
ئەگەرێن مان و چوونا من
بێھنەکا دی دێ ل سەر لەشێ
تە شەھوەتا من ب داوی ھێت
دزانم کو حەژێکرن تشتەکە و
و تشتێ ئەم لێک کۆم کرین
ئەڤ شەڤە تشتەکێ دی)
ئێک ژ وێنێن شعرا مازن یارسانی دبێژیت:
(ئەزێ وان خەمێن تە تەڤ ماچ بکم)
د ڤێ پارچا شعرێ دا مازنی ڤیایە کو خەمێن ژنەکێ ماچ بکەت، ھنەکێ ژ خەمێن وێ سەرخوەش بکەت و خوشییەکێ ژبۆ ژێ پەیداکەت، کاری یە ل جەم وێ خەمان ژی بکەتە جوانییەک و پیچەک ژ ئازارێن وێ کێم بکەت.
مازن د درێژییا شعرا خوە یا (تو ژ کووڤە ھاتی) دا و د پارچەکا دی یا شعرێ دا دبێژیت:
(دەما تە ل ناڤەندا سیکێ،
سەما دکر..
دەما کو سمبێلێن وان
تە داڤ داڤ دقەتاندن،
دەما تە،
شەرەفا وان، دناڤا
ماچا ئەڤینێ،
خەندقاند)
ناڤەندا سیکێ جھێ خرڤەبوونا ھەمی چین و تەخێن جڤاکییە د کۆمەلگەھا مە دا کو ب جھەکێ شەرم دھێتە دیتن، ب تایبەت ژبۆ ژنێ، پترییا ژنان دەمێ ژبۆ سیکێ دچن خوە باش رادپێچن، ب تایبەت ل ناڤەندا سیکێن ولاتێن رۆژھەلاتی، ل رۆژئاڤایی ھەمی دەمان میۆزیک و سەما ل ناڤەندا سیکان کەلتورن ب سەربلندی دھێنە دیتن، پیڤەرێن خوە یێن رەوشتی ل دیڤ پێشەڤەچونا کومەلگەھ و و ئابوورێ خوە گۆھارتینە، لێ بەروڤاژی دیارە د ڤی تێکستی دا پێنوسێ مازنی خوە شیم کرییە و ڤیایە ژنەک ل نیڤا سیکەکا رۆژھەلاتی د ناڤا کەلتورەکێ ھوزی و ئولی دا، دناڤا وان زەلامێن کو ژنێ ب مولک و شەرەفا خوە ددانن دا، کچا کەسەکێ کو ب سمبێلان خوە ب زەلام ددانیت و لەشێ کچا خوە کریە ھێمایێ شەرەفێ، مازن شییا د شعرا خوەدا ب ھەمی ھەست، لەشێ کچەکێ ب لەیزینیت و ئەو کچە سەمایێ داڤا سیکێ دا بکەت وەکی دبێژیت: (سمبێل داڤ داڤ قەتاندن و شەرەفا وان خەندقاند ب ماچەکێ …)