لەشەڕی ناوەخۆی كوردستان، كە حیزبەكان هیچ نەما بەیەكتری نەكەن و تەنانەت دڕندەیی هەندێك لە چەكدارانی كورد بەرامبەر یەكتر، گەیشتە ئەوەی گەر یەكێكیان بە دیل لەلایەن حیزبە ڕكابەر و دوژمنەكەی گیرابا، لەو دیلانە هیی وایان تێدا بوو كە بە په‌رێمز گونیان ئاگردەدرا، ئەم ئازارە وەحشییانەیان لەناو خۆیاندا ناو نابوو (گون -تەقێنی)…زۆر لەو دیلە داماوانە بەوهۆیەوە گۆڕبزر كران و ئێستاش داكوبابیان چاوەنۆڕی هاتنەوەیانن…تەنانەت جاری وا بووە زەلام بە نوێژی نیوەڕۆ لە جادە دەگیرا و دواتر تا هەتایە شوونبزر دەكرا.
ئەو ڕۆژانە بیرم لەوە كردەوە كە من پیاوی چەكداری و شەڕوشۆڕ نیم، بۆیێ واچاكە چارەسەرێكی خۆم بكەم و بەو بڕە دۆلارەی پاشەكەوتم كردووە، خەمێكی پیاوانە لە خۆم بخۆم و باشترین چارەسەریش ئەوەیە بۆ دەرەوەی وڵات تێیتەقێنم و خۆم لەو شەڕەسە و سەگوەڕەی نێوان هێزە سیاسییەكان قورتار بكەم، تا ئەوكاتەی لایەك بە لایەك دەبێ، چجای، من كە لە حیزبێكم لە دونیادا پایدۆسی كردووە و مۆدێلی لە هیچ قوژبنێكی گۆی زەویدا نەماوە. ئەو حیزبەی من لێیم، جاران بە یەك فیكە دەیتوانی بە ملیۆنه‌ها لە لایەنگر و هاووڵاتییان بێنێتە جادە، كەچی ئەمڕۆ بە هەزار ناری عەلی پێی ناكرێ پازدە كەس كۆكاتەوە. بیرمدەكردەوە كە لەم ڕۆژگارەدا قەتوقەت بەهۆی حیزبەكەمەوە ناگەمە هیچ….
ئەوەبوو بۆ ڕۆژی دواتر خۆم و (پاییزە)ی هاوسەرم بڕیارماندا سەری خۆمان هەڵگرین و بۆ ئەوروپا هەڵێین. چەند ڕۆژ دواتر هەموو كەلوپەلەكانی ماڵەوەمان تەحس و نەحس كرد و بەشێكیانمان هەرزانفرۆش كرد و هەندێكیشیانم بەخشی، كتێبەكانیشم تەسلیمی ماڵی خەزوورم كرد و لە هەورەبانی ماڵەوەیان شوێنێكی تەقەتیان بۆ كردنەوە. هەفتەی پاشتر گەیشتینە سەر سنوور و چەند ڕۆژ دواتر بەو پارەیەی هەمانبوو، بەهۆی قاچاخچییانەوە زۆر بە زەحمەت گەیشتینە ئەوروپا.
لە ڕێگا ئەوەندە بە پێ ڕۆیشتبووم، پێڵاوەكەم هەلا بەهەلا ببوو، ڕۆژانی سەرەتا كە لە بەلجیكا گیرساینەوە، هەستم بە نامۆییەكی كوشندە دەكرد و باری دەروونیم خەریك بوو مێشكم تێكوپێك بدات، لا كولانەیەكیان دابووینێ و تێیدا دەژیاین، سەگ بە حاڵمان نەبووبێ، ناز و نیعمەتی هەولێر لە كوێ و ئێرە لە كوێ! هاتنە دەرەوەكەم لە كوردستان زۆری پەشیمان كردمەوە. بیرمدەكردەوە، باشە من بۆ وا لەخۆمم تێكدا؟ چما لەوێ لای خۆمان كێماسییەكم هەبوو؟ ئەندامێكی بەرزی حیزب و خاوەن پاسەوان و ماڵوحاڵێكی ئاوەدان و تاڕادەیەك لەناز و نیعمەت.
ڕۆژ هەبوو خەریك بوو لە دەردەسەرییان بتەقم. نیوەڕۆیەك دوای ئەوەی بە حاڵ توانیم پارەی پێڵاوێكی ئاسایی پەیدا بكەم و لەو دەوروبەرە ئەو خەمەشم لە كۆڵ كردەوە. خۆم و جلی شڕ و وڕ و پێڵاوی تازەم لە (گەڕەكی جامخانەكان) خەریكی گەڕان و سووڕانی بێهودە بووم، ئەو جامخانانەی كە ژنانی ڕووتیان تێدا ڕاكشاوە و چاوەنۆڕی موشتەریی بەزم و ڕەزمی سێكسین. من پارەیەكی وام پێ نەمابوو كە بەشی ئەوە بكات حەزی گڕگرتووی ئاگردانی نێوگەڵم دامركێنمەوە، بەڵام زۆرجاران لەنێو ئەو كووچە و كۆڵانانە بۆخۆم نەفەسێكی پڕ چێژم وەردەگرت.
ئەو نیوەڕۆیە لە لاكۆڵانێكی كشوماتدا ئەسعەدی برادەرمم ڕووبەڕوو بووەوە، كە لە مەكتەب پێمان دەگوت (ئەسعەد چلودوو. چلودوو). ئەسعەدم لە حەفتاكانەوە نەبینیبوو، ئەو كوڕی پیاوێكی خواپێداو بوو و لە ژیانیدا ساردی و گەرمیی نەچەشتبوو، زۆریششارەزای ئەم وڵاتە بوو و زمانەكەیشیانی بە تەواوی دەزانی، ئه‌سعه‌دساڵانێكی زۆر بوو هاووڵاتیی ئەوێ بوو. شەوەكەی لە مەیخانەیەكی شەومەستان دەعوەتی ئەو بووم و بەیەكەوە خۆشمان ڕابوارد و تا مڕبووین هەڵمانقوڕاند. ئەسعەد بۆ ئەوەی لەو بێ پارەیی و بێكاری و لاتوپاتییەم ڕزگار بكات، ئەلهەقی پیاوانە هاتە دەست و توانیی بە هانامەوە بێت. ئەو دەیزانی كاتی خۆی من لە مەكتەب چەند زیت و زرنگ بووم، بۆیێ چەند پێشنیازێكی بۆ كردم كە یەكێكیان خوێندنی دوكتۆرا بوو و یەكی تریشیان پاسەوانیی سیفێكی پڕ لە سەگ بوو بە مانگانەیەكی باش، ساحێب سیف دەوڵەمەندێكی توركی برادەری خۆی بوو. كۆڵێ خۆشحاڵ بووم بە دیتنەوەی ئەسعەد و خەریك بوو كەمێك لە خەمۆكییەكەم دەڕەوییەوە، بۆیە دەمودەست پێشنیازی دووەمیانیم پەسەند كرد.
بۆ ڕۆژی دوایی بوومە پاسەوانی سەدان سەگی جۆراوجۆر، تووتكە سەگ و سەگی لمووز بەرانی و دێڵەسەگ و سەگی سیفەت تاژی و گەماڵ و گۆردەی گوێ شۆڕ و قەپۆز تەشوولەیی و سەگی قژن و سەگی كلك خەنەیی و سەگی سەروگوێلاك پر مۆڕە و سەگی كلك قووت و دەیان جۆری تر. جاری وا بووە لەگەڵیاندا دەكەوتمە قرووسكە قرووسك و كتومت وەكوو ئەوان دەحەپیم، ئێستاش باوەڕ ناكەم كەس هەبێ وەكو من جوان بقروسكێنێ، حەپینێك دەحەپیم گەر تەماشات نەكردبام و تەنیا گوێت لە دەنگم بگرتبایە، هەر كتومت حەپەی گەمبۆڵەكانی پشدەر، ئەوەندە متووی سەگ ببووم كە زۆرجاران لەگەڵیان بە قسە دەهاتم و دەمتوانی لە هەموو مەبەست و حەز و خولیایەكیان بگەم…زۆرجار لەوێ بە تەنیا لاسایی سەگەكانم دەكردەوە و دەگەوزیم و یاریی سەیر و سەمەرەم لەگەڵدا دەكردن.
ئێوارەیەكی كۆتایی هەفتەی یەكەمی كارەكەم لە گۆڕەپانی سیفەكە و لەنێو سەگەكاندا دەخولامەوە، ئەسعەدم لێ بەژوور كەوت و باسوخواسی خوێندنەكەمی لەگەڵ هێنامە گۆڕێ، منیش ڕام وابوو كە ناتوانم بخوێنم و كار بكەم. تاقەتی خوێندنم نەبوو و پرۆژەكەیم بەلاوە چیایەكی هەزار بە هەزار بوو، پاشان دوو ئیشیم بەلاوە زەحمەت بوو. ئەو سوور بوو لەسەر ئەوەی بخوێنم و بۆ هەندێش زانكۆیەكی بۆ دۆزیمەوە كە نە خوێندن و خۆ هیلاككردنی دەویست، نە پارە و پوولێكی وا كە نەتوانم دەستەبەری بكەم. وەعدیشی دامێ كە هەر كات پێویست بكات، هاوكاریم بكات. ئەوەبوو یەكشەممەی دواتر چووینە سەرۆكایەتییەك لەو زانكۆیانەی كە ئێستا لێرە ناویان ناون زانكۆی علووجه، ئەوكات لێرە لەم جۆرە زانكۆیانە نەبوون، كەچی هەنووكە پڕە لە زانكۆی ئەهلی و علووج كە قوتابییانی تێدا ساقیت نابن و شتێكیشی لێ فێر نابن، ئەی نابینی خەریكە لە كووچە و كۆڵانانیش كۆلیژ و بەشەكانی قانوون هەن؟ چما نەتبیستووە كۆلیژی قانوون لە بەحركەش هەیە؟ هەمووجار حاجی حەمیدی ئامۆزام، شەكرە عەنتیكەكانی دەشكاند و دەیگووت؛ بە شەرەفم شەق لە تەنەكە و حاویەی زبڵی بەر دەرگای هەر ماڵێك و تەنانەت لە قوونی كەر هەڵدەی، خەریجی قانون دەردەپەڕن، جا چتۆ خەریج؟ خەریج بە شەرتی كڵۆڵی لە قانون. كۆڵەوار و نەزان لە دەستوور…
سەرۆكی زانكۆكە زۆر پیاوانە پێشوازیی لێ كردین و هەر ئەو ڕۆژە ناوی خستمە نێو لیستی وەرگیراوان لە یاسای نێودەولەتی، ئاگاداریشی كردمەوە كە چاوێكم لێیان بێت و ناوەناوە بەسەریان بكەمەوە، من لەوە نەگەیشتم، پاشان ئەسعەد تێی گەیاندم كە پێویستە مانگێ یەك دوو جار دیارییەكیان بۆ ببەم. هەفتەی دوو ئێواران بۆ ماوەی سێ سەعاتان دەچوومە زانكۆی گۆرین، هەفتەی سێیەمی دەوامكردنم بوو كە پرۆفیسۆری سەرۆك بەش بەدوایدا ناردم و تێی گەیاندم كە پێویستە ناونیشانێك بۆ تێزی دوكتۆراكەم دیار بكەم ، ڕۆژی دواتر لەسەر پێشنیازی ئەسعەد، ئەم ناونیشانەم تەسلیم كردن (بارودۆخی دابەشكردنی كوردستان بەدەست كۆڵۆنیالیزمەوە)…مانگێك دواتر پرۆفیسۆرێكی گەنجی ناو زانكۆكەمیان بۆ كردم بە سەرپەرشتیاری تێزەكەم كە لە ژیانیدا ناوی كوردستانی نەبیستبوو. ئەسعەد چاكەی ئەوەشی بەسەرمەوە بوو كە هاوكارێكی هەولێریی خۆی ڕاسپارد كە دەستی نوسینی هەبوو تا تێزەكەم بۆ بنووسێت. لەگەڵ هاوڕێ سەرپەرشتیارەكەم، زۆرجاران بەیەكەوە پیاسەمان دەكرد و تەنانەت جارجارە لە گەشت و سەیرانان بەیەكەوە تا مڕ دەبووین دەمانخواردەوە و من نەمدەهێشت ئەو بە خەونیش هەست بە تەنكبوونەوەی گیرفانی بكات. بۆیە بوو بە هاوڕێیەكی گیانی بە گیانی و وای لێ هات كە زۆر هاتوچۆی ماڵەوەشی دەكردم، پێوەندییەكەمان هیی مامۆستا و قوتابی نەبوو، هەردووكمان شارەزای سڕ و تڕی یەك بووین. ئێستاش جارجارە وەك دۆستێكی دێرینی كورد و كوردستان لەلایەن بەرپرسە گەورەكانەوە، وەك میوانێك لە كوردستان پێشوازیی لێ دەكرێت، هەركە بە میوانیش دێت، ئاگاداری منیش دەكرێتەوە و بەشداریی دانیشتنەكانی دەكەم.
ئێوارانیش لەناو سەگە خۆشەویستەكانم تا درەنگانی شەو و تا نۆبەتە پاسەوانیم تەواو دەبوو، خۆم دەخافڵاند. ئەمە بوو بەرنامەی ڕۆژانەی ژیانم تا ئەو كاتەی كە سڕەی دوكتۆراكەم هات، بۆیە ماوەی چەند ڕۆژێك لەگەڵ هاوكارەكەم خەریكی شتێك بووین، ناوماننا (تێز). قەتم لەبیرناچێتەوە، شەوی بەر لە بەخشینی دوكتۆراكەم كە هەمیشە ئەو جۆرە زانكۆیانە بەخشینی بڕوانامەكانیان بێ جەلسەی گفتوگۆ و هەڵسەنگاندن و ئیمزا و میمزا، بەڵكو ئێوارەكەی لە ئاهەنگێكی كێك و میوە خواردن و سەما و مۆسیقادا بڕوانامەكان بە كۆمەڵ دەبەخشرێن و دوای فیكە و چەپڵە لێدان دەبیت بە دوكتۆر و ئاوێ بێنە و دەستان بشۆ. شەوی دواتر كە دوكتۆرام وەرگرت، لە سیفەكەدا لەناو سەگاندا ئەوەندەم قرووسكاند خەریك بوو دەنگم دەنووسا. تەنانەت سەگەكان ناوەناوە بە سەر و ڕووخساری سوڕماوەوە تەماشایان دەكردم كە قەتیان وا نەبینیبووم… بیرمە ئەو شەوەی بوومە دوكتۆر، شەرەفخانی بەدلیسیم هاتە خەونێ و زۆری قەشمەری بە تێزەكەم كرد و ئامۆژگاریی كردم كە مێژووی بەرباد و شێواوییەكانی ناو تێزەكەم چاك بكەمەوە یان ئەوەتا دوای وەرگرتنی بڕوانامەكە، تێزەكەم بشارمەوە و تا دونیا دونیایە نەیدەمە دەست كەس و نەیەڵم حەشتەبای خواش بیبینێ و قەتوقەتیش چاپی نەكەم. بڕواش ناكەم كەسێ لە كوردستان زمانی نوسینی تێزەكەم بزانێ تا بتوانێ وێرانە و قەشمەرجارییەكانی ناویی ئاشكرا بكات. لێگەڕێ با بڕوا و لە وڵاتی ئێمە دوكتۆرا یەعنی دوكتۆرا و بڕایەوە، ڕۆژەكەی بیرم كردەوە و بە خۆمم گووت؛ هەی ئەحمەق، بۆچی خۆت بە خەون و خەیاڵانەوە خەریكدەكەی؟ هەی گەمژە؟ چما هەر كاتێ بچییەوە، بە دوكتۆر بانگ ناكرێت؟!
ئێوارەكەی تەحسینی برام تەلەفۆنی بۆ كردم و لە هەواڵی بڕوانامەكەمی پرسییەوە و گووتی؛ هەڤاڵانی حیزب و هەموو خزم و دۆستان عەوداڵی هەواڵەكەن. ئەرێ چیت بەسەر هاتەوە؟ پێیم ڕاگەیاند كە تێزەكەم وەكو خۆی و بە پلەی نایاب پەسەند كراوە. تەحسین داوای زانیاریی زێتری لێكردم تا هەواڵەكە لە ڕۆژنامەكان وەك ڕووداوێكی مەزن و وەرچەرخێنەری بارودۆخ بڵاوبكاتەوه. ئەوەبوو هەفتەی دواتر هەموو ڕۆژنامەكان بە وێنەی ڕەنگینی خۆمەوە باسیان لە گرنگیی تێزەكەم بۆ دواڕۆژی كوردستان و دەنگدانەوەی لە سەرتاپای گۆی زەوی كردبوو. بڕواتان هەبێ كە تەحسین وێنەی هەواڵەكەی بۆ ناردم و دواتر كە خوێندمەوە، ئیستێكم كرد و هۆپەكم لەخۆم زانی! چما من ئەوەم كە میدیاكانی وڵاتەكەم باسم دەكەن؟ بۆیێ بڕیارمدا دوو دەستە قاتی پێركاردن و دەستەیەك بۆینباخی نایاب و چەند قۆندەرەی پڕ باقوبریق و بۆنی ماركەی جیهانی و كەلوپەلی تر بكڕم و سەرەتای مانگی ئەیلوول بگەڕێمەوە و كارێك بكەم بە بایەخەوە پێشوازیم لێ بكرێ.
بەر لە گەڕانەوەم بە مانگێك دانەیەكی مۆركراوی بڕوانامەكەمم بە هاوڕێیەكمدا بۆ تەحسین نارد تا تەسلیمی بەشی بڕوانامەكانی وەزارەتی خوێندنی باڵای بكات، بۆ ئەوەی مۆری بكەن و بە ڕەسمی پشتڕاستی بكەنەوە و بڕوای پێ بهێنن. مانگێك دوای ئەوە تەحسین تەلەفۆنی بۆ كردم و پێی ڕاگەیاندم كە لیژنەیەك لە وەزارەتەكە بڕوایان بە دوكتۆرانامەكەم نەهاتووە. بەویان ڕاگەیاندبوو كە ئەو زانكۆیەی بڕوانامەكەی داوە، زانكۆی جەڵەبی و بێ بڕوا و متمانەیە…كە ئەمەم بیست، لە داخان مووی سەرم ڕەپ ڕاوەستان و چاوم چووە پشتی سەرم. بیرم كردەوە كار وا بڕوات، ڕیسەكەم لێ دەبێتەوە بە خوری، ڕۆژی دواتر تەلەفۆنم بۆ یەك لە برا بەرپرسەكانی وەزارەتەكە كرد و ماوەی سەعاتێك مشتومڕمان بوو و دواجار بڕوایان نەهات كە دوكتۆراكەم تەواوە.
سەروبەندی ڕێككەوتننامەی واشنتۆن بوو لە نێوان هەردوو حیزبی زلهێز و هەردوو لا بەڵێنیان بە هەڤاڵانمان دابوو كە بۆ پێكهاتەی حكومەتی تازە، لایەك لە ئێمەش بكەنەوە، بۆیێ كاروبارەكانی خۆمم ڕێكخست و دە ڕۆژ دواتر بلیتی ئەستەنبۆڵم بڕی تا لەوێوە بگەڕێمەوە وڵات. هەواڵم ناردەوە كە سبەی سەعات چواری ئێوارە دەگەمەوە سەر سنوور. ئەوەبوو لە گەڕانەوەمدا هەڤاڵێكی زۆری خۆمان لەسەر سنوور لە پێشوازیمدا بوون و كە چاوم بەم هەموو دۆستە ئازیزە كەوت، ماندوێتیم لەبیر چۆوە و ڕۆژی دواتر شەو ئاهەنگێكی سەرمەستانەیان بەبۆنەی هاتنەوەم و بەدەست هێنانی دوكتۆراكەم لە كۆشكی قەڵا بۆ ڕێك خستم و تا درەنگانی شەو لەگەڵ حەشاماتی هەڤاڵان ماینەوە. چەند ڕۆژ دواتر بڕیاری بەرپرسێتیی ڕێكخستنی حیزبیان بۆ دەركردم و ناوم لە سەری سەرەوەی هەموو نووسراو و بڵاوكراوەكاندا بە پێشگری (د.) دەنوسرا و لەوەوە كەس بە ناوی خۆمەوە بانگی نەدەكردم. دوكتۆر، دوكتۆر نێرەكەر نەیدەكێشا.
ئەو ماوەیە زۆرم هەوڵدا بڕوانامەكەم بە ڕەسمی هاوتا بكەمەوە، بەڵام دوكتۆرێكی بەتەمەنی خوێندنی باڵا لێم لەڕك ڕاچوو و سوور بوو لەسەر ئەوەی ئەو زانكۆیەی دوكتۆرای داومێ، ناوی لە هیچ لیستێكی زانكۆ بڕوا پێكراوەكانی دونیادا نییە. بە كورتی تێی گەیاندم كە من بڕوانامەم لە دوكاندارانەوە وەرگرتووە، ئیتر دەستم لەو كارەم شووشت. لەو ماوەیەدا خەڵكانێكی زۆڵی زۆرزان بەو حاڵەیان زانیبوو و ناسیاویشم بوون و هەر بۆ فشە پێكردنم لە مەجلیسان بە دختۆر نەك دوكتۆر ناوزەدیان دەكردم و منیش لە مەرام و فیتەیان دەگەیشتم، بەڵام ناچاری خۆ لە گێلدانێ بووم.
وەزعە سیاسییەكە خەریك بوو ئارام دەبووەوە و شەڕی ناوەخۆ كە دەیگوترایێ براكوژی، خەریك بوو تا ڕادەیەك لە بیر دەچووەوە، ڕۆژێكیان لە سەركردایەتیەوە تەلەفۆنیان بۆكردم و گوتیان؛ بڕیارمان داوە سبەی ئێوارە كۆبینەوە و چەند هەڤاڵێكیشم پێیان ڕاگەیاندم كە قسەیەك هەیە پشكێكی وەزارەت بەر حیزبمان بكەوێت، ئەوان لای خۆیانەوە منیان دەستنیشان كردبوو بۆ وەرگرتنی ئەو پۆستە و دایاننابوو لە كۆبوونەوەكەماندا بابەتەكە بێننە گۆڕێ. ئەو شەوە لە خۆشییان خۆم و پاییزە خەومان نەچووە چاو. لە كۆبوونەوەی ئێوارەكەدا باسم لە گرینگیی بەرپرسیارێتیی تاك كرد لە كۆمەڵگەكەماندا و جەختم لەوەش كردەوە كە پێویستە تاكی بەرپرس لەنێو ئێمەدا بەر لە هەموو شت لە خەمەكانی هاوڵاتیاندا بێت و لە خزمەتیاندا ڕاستگۆ بێت و كار بۆ چەسپاندنی دیموكراسییەت و ئازادی بكات و خۆی لە منمنۆكێ و خۆپەرستی بە دوور بگرێت و ئەركەكانی سەرشانی دوور لە ناپاكی و خیانەت بەجێ بێنێت. قسە و باسەكانم بوونە مایەی سەرسامیی هەڤاڵانی میم سین، پاشان كە قسە هاتە سەر بەشداریی كردنمان لە دەسەڵاتی جێبەجێكردن و هاتنە سەر كاندیدكردنی یەكێكمان بۆ پۆستی وەزارەتی داد لە وڵاتەكەمان، تێكڕای هەڤاڵانم بە زۆرینەی دەنگ منیان هەڵبژارد و منیش دوای منگەمنگێكم كە وامكرد كەس تێمنەگات چیمە، پاشان ڕەزامەندی داواكەیان بووم.
چەند ڕۆژێك دواتر كەناڵەكانی ڕادیۆ و تی ڤی و فەیسبوك و ڕۆژنامەكان لیستی كاندیدكراوانی كابینەی بنكە فرەوانیان بڵاو كردەوە كە ناوی بەندەشیان تێدا بوو، ئەو ڕۆژە بە سەدان كەس بە نامە و تەلەفۆن و سەردانی ماڵەوەم، پیرۆزباییان لێ كردم و خۆشحاڵیان بۆ دەربڕیم، خەڵكی وام دەهاتنە سەردانێ كە قەت بیرم بۆیان نەدەچوو، لە كارمەندانی وەزارەتی داد زەلامی ملەستوور ملەستوورم لێ بە ژوور دەكەوت، جێگا نەمابوو گوڵی جۆراوجۆری هۆڵەندی و ئێرانی و گوڵی باغە و دەستكردی تێدا دانێم، چەند ڕۆژ دواتر چەندینیانم بەسەر دراوسێكاندا بەخشییەوە. لە وڵاتەكەماندا فرۆشتنی پلە و پایە لە چركەساتدایە، بۆیە منیش ترس و نیگەرانیی فرۆشتنەوەم و دەركێشانم لە لیستەكەدا، هەناوی هەڵكۆڵیبووم و خەو و خۆراكم ببووە بیركردنەوە و ڕاڕایی و مەرگەمووش، ئەگەرچی شتێكیشم لە كارگێڕی و قانوون نەدەزانی، بەڵام بیرمدەكردەوە و تەماشای ناوی كاندیدكراوان و وەزیرەكانی پێشووم دەكرد، خۆمم لا بە ئەفڵاتون دەهاتە بەر چاو، بڕواتان هەبێ خەڵكی وایان تێدا بوو توانای بە پێشەخۆدانی دوو سەر مەڕ و بزنێكیشی نەبوو.
دیسانەوە بەختەكەم هێنای و ڕۆژی پێنجشەممە ئاگادار كرامەوە كە سبەینەی یەكشەممە بۆ سوێند خواردن لە پەرلەمان بۆ ڕاگەیاندنی كابینەی تازە ئامادەبم كە تیایدا بەندە پۆستی وەزارەتی دادی دەدرێتێ. خۆم و قۆندەرەی زرۆقی و قاتی بە باقوبریقی شەو ئوتووكراوم و بۆینباخی مارۆنیم، بە پیكابەكەم بەرەو پەرلەمان ڕۆیشتم و لەوێ پۆلیسەكان ڕێگرییان لە چوونە ژوورەوەم كرد، هەوڵمدا تێیان بگەیەنم كە من كاندیدی حیزبم بۆ بوونە وەزیر، كەچی هەر گوێیشیان پێ نەدام و تێیانگەیاندم كە بردنە ژوورەوەی پیكابەكەم كارێكی ڕێگە پێ نەدراوە، تەنیا ڕێگەی چوونە ژوورەوەی خۆمیان دا، بەڵام ناسنامەكەشیان لێ گێڕامەوە. دوای ڕێوڕەسمی سوێند خواردن بە قورئانی پیرۆز كە یەكەمجارم بوو لە ژیانمدا دەستم بەر قورئان بكەوێ، نیوەڕۆكەی دەعوەتی شاهانەی نانخواردنی سەرەك وەزیران بووین و دوای تەواو بوون، تەلەفۆنێكم بۆ سمكۆی ئامۆزام كرد كە بە دوومدا بێت, دواتریش هەر خۆی، پیكابەكە و ناسنامەكەی بۆ هێنامەوە.
ڕۆژی پێنجشەممە بوو سمكۆ گەیاندمیە وەزارەتەكە و حەشاماتێكی زۆر لەبەر دەرگا لە پێشوازیمدا بوون، تەوقەم لەگەڵ یەكە یەكەیان كرد و بەرەو نهۆمی سەرەوە ڕێنیشانیان كردم و ئەو ڕۆژە بەهۆی زۆریی میوانانەوە تا دەوام تەواو بوو هیچم بۆ نەكرا، هەفتەی دواتر سەرۆكی حكومەت چوار ئۆتۆمبیلی بەرزی تازە مۆدیل و دوو شوفێر و شەش پاسەوانیشی بۆ ناردم و هەموویان بە كڕنووش و دەستەوەستانەوە لە خزمەتمدا بوون و مانگێك دواتریش كلیلی خانوویه‌كی نوێی دوو دۆنمیی پڕ لە كەلوپەلی گەڕەكی وەزیراوایان بۆ ناردم كە شوێن و ماڵوحاڵی سەرجەم وەزیران و بەرپرسە نەقۆڵاكانی حیزبەكان بوو، منداڵەكانیشمیان لە قوتابخانەی شووەیفاتی نێودەوڵەتی دانا بەر خوێندن. ژیانم كەوتە ڕەوتێكی تازەوە كە بە خەونیش بیرم بۆ ئەوە نەدەچوو ئەوە من بم!
یازدە مانگ بوو ببوومە وەزیر كە ڕۆژێكیان بەرپرسی كارگێڕیی ئەنجومەنی وەزیران، زەنگی بۆ لێدام و پێی ڕاگەیاندم كە بە هۆی گەشتێكی یەك مانگی جەنابی وەزیری خوێندنی باڵاوە بۆ وڵاتانی دەرەوە، بە بڕیاری جەنابی سەرەكوەزیران، ئێوە ئەو مانگە كاروبارەكانی وەزارەتەكە دەگرنە ئەستۆ. ڕۆژی پاشتر بەڕێوەبەری نوسینگەكەم نووسراوەكەی بۆ هێنام:( بە هۆی سەفەركردنی ڕێزدار مەغدید حەوێز سمایلاوە وەزیری خوێندنی باڵا، بڕیارماندا بەڕێز دوكتۆر كاكۆ حووجان ترپەسپیان وەزیری داد، بە شێوەیەكی كاتی و بە وەكالەت پۆستی وەزیری خوێندنی باڵاش وەربگرێت. ئیمزا: س. وەزیران)
ئەوەم زۆر بە دڵ بوو و ڕۆژی دواتر لە خوێندنی باڵا دەست بە كار بووم و تەواوی ڕۆژەكەم لەوێ بەسەر برد و كۆبوونەوەیەكم بە سەرجەم فەرمانبەرانی كرد و تێمگەیاندن كە ئەركی ئەم وەزارەتە لە بەڕێوەبردن و پێشخستنی وڵاتەكەمان لە ڕووی زانست و تەكنۆلۆجیا و هەموو ئەو هۆكارانەی كە ڕاستەوخۆ و ناڕاستەوخۆ پێوەندییان بە ژیانی تاكەكان و كۆمەڵگاكەمانەوە هەیە، زۆر پیرۆزە، بۆیێ پێویستە هەر یەكەمان لای خۆیەوە بەوپەڕی لێبووردەیی و دڵسۆزی و ڕاستگۆیییه‌وه، ماندوونەناسانە كار بكات، تكایە بەردەوام دژی دزێوی و گەندەڵكاری بوەستنەوە و ئێمەش وەكوو سەرۆكایەتیی حكومەتە ساواكەمان سەربەرزین بە یەكە یەكەتان.. ئیتر بۆ پێشەوە.
ڕۆژێكیان بەڕێوەبەری گشتیی بڕوانامەكانم هاتە لا كە بڕیار بوو خۆم بە دوایدا بنێرم، دوای بەخێرهێنانی، بەر لەوەی قسە بكات و داواكاری و ئیشەكەیم بۆ باس بكات، شوفێرەكەمم تێگەیاند كە جانتا دیبلۆماسییەكەم بۆ بێنێ و تێزە بیست لاپەڕەییەكەم و بڕوانامەكەمم لێ دەرهانی و بە سۆفتە سەوزەكەم ئەم پەراوێزەم نووسی: (بەڕێوەبەری گشتیی بڕوانامەكان.. تكایە بە پەلە و بێ دواخستن ئەم بڕوانامەیە هاوتا بكەن.. ئیمزا: و. خ. باڵا)
شوكور بۆ خوا بۆ بەیانیەكەی بێئەوەی بیداتە لیژنە و میژنە، بڕوانامەكەی بە نوسراوی هاوتاكراوەوە دایەوە دەستم.
ڕێنوس و خاڵبه‌ندی تایبه‌ته به نوسه‌ر خۆی.