ب ھەناسەیێن ڕۆژێ ل بۆشاییا ئاسمانی بنێرە!
ترسەک ب سپێدەھیانڤە خویس دبیت، ل سەر بلنداھییا کیژان چیای دەستێ یەزدانی بگرم؟
ل بەر زکرێ تێھنا ئاگرێ شەڤێن مەستبوویی دنڤم، ژیانێ و ھەبوونێ دگەل تەرزێ ڤیانێ خوە ل ناڤ ھەناسێن تەیەکێ خودایێ عەشقێ نخاڤتینە.
خەمێن پیرەکێ خودان سەربۆر خوە ل پشت جوانییا وەڵاتەکێ بێ خودا بەرزەکرینە!
ئەز ڕوناھییا ڕۆژێ دگەل وێرەکییێ د بەرخوەدانا ئاسمانی دا ژ بۆ پەرستنا عەشقەکێ دھنێرم!
وەرە دا د ھەمبێزا تە دا ل خودایێ مرۆڤان بگەڕم!
ئەڤ ژوورا تاری و تژی ژ میۆزیک و شەمالک و ھزرێن یاخی یا داگیرکرییە ژ لێگەڕیانا ل دەربارەی بەرسڤا پرسیارێن حەرامکری، دویڤچوونا ل ڕاستیا بەرزەبوویی، ئەڤ ژوورە یا تژییە ژ حەزکرن و ژیانێ و ژ ھەر تشتەکێ ئایینان حەرام کری.
وەرە دا ب ماچەکا ھەردو لێڤێن تە ژیانەکا ڤالا ژ ئاینان بپەرژینم!
وەرە دا ل ناڤ ڤێ جیھانا ڤەشارتی ل چ خودایێن دی نەگەڕم!
ژبلی تەیەکێ خوداوەندێ عەشقێ!
تو تشتەکێ ژ ڕامانا پەیڤا خودا دزانی؟!
ئەو خودایێ دویڤچوویێن وی ل سەردەمێ کەڤن ب (زیوس، ھۆبەل، ئەنلیل، … ) ناڤ کری.
ل وی دەمی دویڤچوویێن وی ئەو ددیت و پەرستنا وی دکر، جاران مرۆڤ دکرنە قۆربان بۆ وی!
تو تشتەکی ژ ڕامانا پەرستن و قۆربانیدانێ دزانی؟!
ئەو تشتەکە مینا منا بەرماییا تیشکێن تەیەکێ خودا و تژی ژ ستەمێ.
وەرە دابھاتنا تە بەرەڤ ئاسمانێ خودایێ مرۆڤان بلند ببم!
وەرە دا دحەزرەتا تە دا دەستێ خوە ل ملێ یەزدانی بدەم و ژێرا بێژم، ب سادەییا وان ھزر و بیرێن کەڤن دەما ل چاخ و جھێن جودا جودا و ئوولیکرنێن جیاواز تو دھاتییە ناسکرن، ئاھا ب قاسی وێ سادەییێ ئەز و میۆزیک…
ئەز و سەما…
ئەز و عەشق ل ھەڤ دگەڕین.
بەلێ ل نھا ب تێگەھێن فەلسەفەیەکا سۆفیگەری ئەو ھەمی سادەییە ڕاکرینە و تویەکێ دی ئینای و ب زمان و بیروباوەرێن جوداتر ب (اللە) ناڤ کری و دان ب ھەمی ھەبوون و ناڤێن تە یێن کەڤنار ناکەن.
ئەڤرو ھندەکێن دی دویڤچوویێن تەنە، نە باوەردارێن زیۆس و ھوبەلینە، منەکا ژن، منەکا عاشق، منەکا سەماکار، دکەنە ئەورەت!
تە ب خودایەکێ گەلەک مەزن و خودان شیان و بھێز و زانا و دادپەروەر پێناسە دکەن!!!
ژبو تە سەران دبڕن دا تەیەکێ بھێز بپەرێسن!
ژ بو تە خوینێ دڕێژن دا تەیەکێ دادپەروەر نیشا من بدەن!
ئاھا ب قاسی وێ توندڕەویێ ئەزەکا یاخی یا بوویمە عاشق، تەڤلی عەشقا ھەستێن زەڵامەکی و بێ خوەدانیا وەڵاتەکی بوویمە.
وەرە دا ژ یەزدانی رابێژم کو من ئەو نەدیتە و نوزانم کا ب چ ڕەنگ بوویمە باوەردارا بیروباوەرێن وی! ڕەنگە ب زۆری بیت، ڕەنگە ل بن (سورەتا فتح) وەلاتێ من کاڤڵ کربیت!
گرنگ نوکە د سەرێ من دا ب ( اللە) ھاتییە چاندن، چێکەرێ گەردوونی، چ خودایێن دی نینن ژبلی وی!
ئەی خودایێ اللە!
ئەزم کچا وەلاتێ ڕۆژێ…
نەڤیا میدیان…
ژ نفشێ سۆباریان…
ژ توخمێ زەردەشتییان…
عاشقا زەڵامەکی مە ژ نفشێ خوداوەندانێ عەشقێ…
نە من مرۆڤ کرینە قوربان ژ پێخەمەت خودایێ خوە.
نە من سەر بڕی بوون بۆ ڤەکرنا چ وەلاتان ل بن فەرمانا وی.
نە من خواستییە ل ژێر ئالایێ وی ماڵێن کەسێ وێران بکەم.
ئەز مریدا ڕێبازا عەشقێمە…
دویڤچوویا ئاگری و ڕۆژێمە…
عەشقا یەزدانی د نێرینا عاشقان دا دبینم…
پەرستنا وی د گڕنژینا زاڕۆکان و بشکڤینا گولان دا دبینم!
ھەمبێزەکا نەرما ڤیانێ و ماچەکا تامدای ب ژیانێ تێرا من ھەنە باوەر ژ دلێ خوە یێ باوەردار بکەم.
چاوا ڤیان و ئاینێ خودایەکی د کاڤڵکرن و سۆتن و تاڵانکرنا وەلاتێ خوەدا ببینم؟
چەوا پەرستنا وی د ھەمبێزکرن و ماچکرنا خوەشتڤییێ خوەدا نەبینم؟
ئەزم کچا وەڵاتێ خەجێ و زینێ و شرینێ.. بانگێ مە بەرخوەدان و عەشقە، ئەز یەزدانی د ھەمی ھەلاتنێن ڕۆژێ دا، د ھەمی ڕەنگێن گولان دا، د دەنگێ میۆزیکێ دا، د دیتنا خوەشتڤیێ خوە دا دبینم…
Culture Project