هیرۆ ئیبراهیم ئه‌حمه‌د له‌گه‌ڵ نه‌وشیرواندا له په‌یمانێكی نه‌نوسراودا (ناوه‌ڕاست حاكم قادر - ئه‌ندامی م.س یه‌كێتی)!

ڕزگار عه‌لی؛ چەند جیاوازێکى نێوان بزوتنەوەى گۆڕان و پارتى – به‌شی سێهه‌م


Loading

سەرەکیترین ئیشى پارتى ئەوەیە (پرسیار) لاى خەڵک بکوژێت،  سیاسەت چییە؟ ئەرکى حوکمڕان چییە؟ داهاتى ئەم وڵاتە بۆ کوێ چوو؟  چۆن سەرفکرا؟ پارتى ئیشى لەسەر کوشتنى ئەم پرسیارانە و هەزارانى تر دەکرد.

 هەرچى گۆڕانە لەسەرەتادا ئیشى لەسەر زیندووبوونەوەى ئەم پرسیارانە دەکرد، گۆڕان لەسەرەتا سەرکەوتبوو، بەڵام هێزى سیاسی نابێت سەرکەوتنى بچوک و گەورە ڕازیبکات و بەرەو نەزانیی ببات. گۆڕان سەرکەوتبوو لەوەى پرسیار لاى خەڵک دروستبکات، خەڵک وەڵامی پرسیارەکانیشیان دۆزیەوە، بەڵام گۆڕان پرسیارەکانی خۆشی لێ ونبوو!

 لەبەرانبەردا پارتى شکستى هێنا لەوەى پرسیار لاى خەڵک بکوژێت، بۆیە ئیشى لەسەر ئەوە کرد چۆن پرسیار و وەڵامیش بێ بەها بکات. ئێستا هەموو لایەک هەموو شتێک لەسەر حوکمڕانی کردن دەزانین، بەڵام زانینەکەمان بێ بەهایە، چونکە بێ تێکۆشانە، سیاسەت لەچۆنییەتى تێکۆشان دەکۆڵێتەوە، تێکۆشانیش بەس تێکۆشانى پەرڵەمانى نییە، بەڵکو هەزاران ڕێگەیە: (هاندانە، شێوازى جیاوازە، دابەشکردنى کارە، ڕێخكستنى گەل و پەیوەندییە بۆ چالاکردن و ئازادکردنى خەڵک و چینەکان و نوخبەى ڕۆشنبیرى و مامۆستایان و مامۆستایانى ئاینى و زانکۆکانە…) بۆ ڕووبەڕووبوونەوەى (نادادپه‌روه‌ری و نایەکسانی و نادیموکراسى)،  ئێ لە جیاتى گۆڕان ئەمانە بخاتە ناو تێکۆشان و ناڕازیبوونەوە پارتى ئەمانە ڕێک دەخات و دەیانخاتە حاڵەتى ڕازیبوونەوە و تێکۆشانیان دەکوژێت.

ئەوەى واى لە گۆڕان کردووە بچێتە دۆخێکى لەو شێوازەوە؛

 یەکەم)  لاى وایە خەباتى پەرڵەمانى دەکات.

دووەم) لاى وایە ئەوان هێزێکى لیبڕاڵن و نابێت دەستبخەنە ناو ئەو چینانەوە.

 بۆ هەردوو خاڵەکە گۆڕان وادەزانێت لە( پاریس و لەندەن) ئۆپۆزسیونە، لەوێ سیاسەت دەکات.

ئەم دوو خاڵە بۆ دونیاى مۆدێرن و دیموکراسى ڕاستە، لەوێ چینەکان و ناوەندەکان دەیان ساڵە شوێنى خۆیانیان گرتووە، لەوێ بە پەرلەمان دەیان حوکومەت گۆڕاون، بەڵام لێرە پارتى دەیان ساڵە سیاسىەتى خۆى لەسەر ئەمانە دەچەسپێنێت، گۆڕانیش دەبێت ئەو چەسپاندنە لاببات، بەڵام نەک لاینابات بەڵکو (هیوادارە) ئەم چینانە حوکومەت بڕوخێنن و ئەمیش خۆشحاڵ بێت و بێتە سەر حازرى!

 ئەوە نییە دەڵێت خەڵک بۆ ئەم دۆخە قبوڵ دەکات؟ ئێ پارتى ( قبوڵکردنى) بە هەزاران ڕێگە لەناو چاندوون، وایکردووە خەڵک دژى خۆی بێت، ئەمە قودرەتى ئیشکردن و گەورەیی پارتییە. فەرموو تۆش (قبوڵنەکردن) بچێنە، وابکە خەڵک دژى خۆى نەبێت؟ گۆڕان دەکرا بۆ جڤاتەکەمان دۆخى ڕزگارى داڕێژێت، دەکرا زیندوویەتى و هۆشیاریگەلێکى جیاوازیان پێ ببەخشیت، دەکرا لە دۆخى جڤاتەکەمانى لەدۆخى ئیفلیجى ئازادى بکردایە، کاتێک ئەوە کرا جڤاتەکەمان یەک پارچە دەبوونە هەڵوێست و کردە و گووتە.  فەرموو ڕێگەکانى تێکۆشانیان پیشانبدە، ئیشکردنى تۆ زۆر لە هی پارتى ئاسانترە، بەڵام کە نایکەیت هێزى تر پیچەوانەکەى دەکات.

گۆڕان هەموو ڕێگاکانى گۆڕانکارى بە پەرلەمان و چوونە ناو حوکومەتی بەستۆتەوە، ئێ.. کیشەکە ئەوەیە دەسەڵات لەوێ نییە، تاوه‌كو بتوانیت وەریبگریت! دەسەڵات و هەژموونى دەسەڵات لەم هەرێمە لە شوێنێکى ترە. دیاره‌ ئێمە ناڵیین مەڕۆ پەرلەمان، بەڵام خەباتى پەرلەمانی یەکسان مەکە بەخۆت، کاتێک یەکسانى دەکەیت بە خۆت پەرلەمان دادەخرێت تۆش ئیفلیج دەبیت، بەڵام کاتێ پەرلەمان لەم هەرێمە بە دڵۆپێک ئاو لە دەریاى خەبات و تێکۆشان و زیندوویەتى بزانرێت هەزار جار پەرلەمان دابخرێت لە هەزار شوێنی تر کانی گۆڕانخواز و تیکۆشان سەرهەڵدەدات.

پارتی لاشەیەکى هەزار سەرەیە *، (مەڵێ پارتى  حوکمەتى لایە) لە هەموو کونج و کەلەبەرێکى ئەم گەردونەیە، قاچێکى لە ئەمریکا و قاچەکەى تری لە ئەوروپایە، دەستێکى لە ئەنقەرە و دەستەکەى ترى لە تارانە، بیرى لاى بەغدایە، لەگەڵ ڕۆژئاوایە و لەگەڵى نییە…

 هەموو ئەمانەی بۆ ئەوەى وەکوحزبێکى ساخلەم و بەهێز لە کوردستان مەوجود بێت، بەڵام گۆڕان هەموو گیانى و ڕۆحى لە گردەکەیە، پارچەکانیشى مانگی جارێک لە کۆبوونەوەدایە (کۆبوونەوەى جڤات) دواتر ئەم پارچانە بڕیاڕ نادەن بڕیار بدەن، واتە گۆڕان لە سلێمانییە لە سڵێمانیش لە گەڕەکى زەرگەتەیە لەوێش لە گردى زەرگەتەیە.

 هێزى پارتى لە شاخێکى دابڕاوی کوردستانە (سەرى ڕەش) لەوێوە بڕیاردەدرێت، لە میلیگەرا و لۆکاڵى دەربچن و دەبنە هێزێکى بەهێزى سەرتاپاى ناوچەکە، بەڵام گۆڕان لەناو دڵى خەڵکى هەموو ناوچەکە و ئەوروپایە، بەڵام هەمووی دێتەوە گردەکە و دەبێتە میللیگەرا و لۆکاڵى و لەوێش بەنگدەخوات و دەمرێت.

پارتى چاوەڕێ ی هیچ هیزێکى (ناوخۆیی، ئیقلیمى، نێودەوڵەتى) ناکات بۆ ئەوەى ئیش بکات، بۆ ئەوەى بڕیار دەربکات، بۆ ئەوەى کاریگەرى هەبێت. هەرچى گۆڕانە وەکو گوتمان چاوەڕێی خەڵکە حوکمەتى بۆ بڕوخینێت، چاوەڕێى  ئەمریکایە، چاوەڕێی ئەوروپایە، چاوەڕێ ی هەڵگەڕانەوەى تورکیایە لە پارتى، چاوەڕێ ی ئێرانە، چاوەڕێ ی پەکەکەیە، چاوەڕێی کۆتایهاتنى داعشە، چاوەڕێیە بزانم سوریا چى لێ دێت، ئەى موسڵ، ئەى ڕەقە، گۆڕان هێزێکى چاوەڕوانە.  چاوەڕوانى لەبەر ئەوەى ناقسى هەیە و دەیەوێت بیشارێتەوە.

ته‌واو

تایبه‌ت به‌كولتور مه‌گه‌زین

 

*  تێبینی:  كۆمه‌ڵگه‌ ئاژه‌ڵێكی ترسناكی ملیۆن سه‌ره‌ : ناونیشانی  – به‌شی یه‌كه‌می –  فشار و ئازادی –  ئیسماعیل حه‌مه‌ئه‌مین – یاخود : كتێبی یه‌كه‌می –  سلۆته‌ردایك له‌نێزیكه‌وه‌  – چاپی سه‌رده‌م -ل٢٣٣-٣٢٢

فشار و ئازادی ١ ؛ كۆمه‌ڵگه‌ ئاژه‌ڵێكی ترسناكی ملیۆن سه‌ره‌