بێدەنگبوون و هەڵوێستەنەکردن لە مەڕ ئەو هەموو کارەساتانەی لەم دواییەدا ڕوودەدات، بە تایبەتی وێرانکردنی شوێنەوارە دێرینەکانی ئەم ناوچەیە و ڕۆژهەلاتی ناوەڕاست بە گشتی، بەرەو کوێماندەبات؟
بەبڕوای من، تەشەنەبوون و زۆربوونی شێوەیەک لە کاراکتەری مرۆڤەکان کە لەم ناوچەیەدا پەیوەندیەکی ڕاستەوخۆی بە ڕووداوەکانەوە هەیە. ئەم کارەکتەرەی کە هیچ لە مێژووی ڕابوردووی خۆی نازانێت وە هیچ خەمی داهاتووی نییە، هەڵگری هیچ کلتورێک نابێت و هیچ کلتورێک بە هی خۆی نازانێت، کاراکتەرێکە بەتاڵە لە ڕابووردو لە داهاتوو، تەنها کارەکتەرێکی موشەخۆری بێ ناوەڕۆکە.
گەر تەماشای چواردەوری خۆمان بکەین لەم چۆرە کاراکتەرە ڕۆژانە دەیبینین و بەریدەکەوین لە هەموو شوێنێک و جێگەیەکدا، ئەوەی جێگەی سەرسوڕمانە ئەمجۆرە کاراکتەرە بە ڕوونی لە (ڕۆشنبیران) و (هونەرمەندان)دا دەبینرێت لەچوارچێوەی بیرکردنەوەیان و هەڵوێستیان لە مەڕ ڕووداوەکان و پەرچەکرداری ئەم ڕۆشنبیرانە. نمونەیەکی سادە و زیندوو، داخستنی گەلەری سەردەم لە شاری سلێمانی، دەزگایەک بەڕێوەی دەبات کە زۆربەیان ڕۆشنبیر و هونەرمەندن.
نموونەی زۆرمان هەیە لەم شێوەیە لە زانکۆ و پەیمانگەکان و دەزگا حوکومیەکان کە هەڵگری ئەم جۆرە کاراکتەرەن. وێرانکردنی شوێنەوارە دێرینەکان بەم شێوە زەقە لەبەر دەم میدیای جیهانیدا لە ژێر هەرچی بیر و باوەرێکدا و بەهەر بیانوێکدا بێت جێگەی قبوڵ نییە، چونکە ئەم شوێنەوارانە موڵکی ملیۆنها ساڵی مرۆڤایەتیە .
ئەم جۆرە وێرانکارییە ڕەگ و ڕیشەی درێژی هەیە بۆ ئێستا ناگەڕێتەوە بەڵکو بۆ مێژوویەکی دوور و درێژ دەگەرێتەوە، ئەوەی ئێستا دەگوزەرێت لە ڕۆژو شەوێکدا روی نەداوە بەڵکو بەرهەمی ئەو زەمینە سازیەیە کە جەندین ساڵە بەزانینەوە بێت یان نەزانی ئامادەدەکرێت .
ئەوەی لە ئێستادادەیبینن ( بەرهەمە ) لێرەوە پرسیارێکی گرنگ دێتە پێشمان ئەوەیە؛ لەدوای راپەرینەوە دەبوایە چی بکرێت و نەکرا؟ گرنگە مێژووی خۆمان بخەینە ژێر پرسیارەوە بە چاوێکی گوماناوییەوە تەماشای بکەین، دژایەتی کردنی ئەمجۆرە ڕفتارە وێرانکاریە ئەرکی سەر شانی هەموومانە و بە تایبەتی چینی ڕۆشنبیران و هونەرمەندان.