ڕەحمەتی ل وەزارەتا ڕەوشەنبیری – پشکا پەیوەندییان
ئەحمەد جاسم
*
پشتی مەلای تەرقینا خوە بدۆماھی ئینای ، بەرپرسەکێ پلە بلند گۆتارەک خۆاند : ئیسفێ کەرەم ئاغای
مرۆڤەکێ مێرخواز بوو ، ھەردەم پشتەڤانێ گەل و نەتەوەییا خوە بوو ، چ جار سەرێ خوە بو کەسێ شوڕ نە دکر ، مروڤەکێ نەفس مەزن نەبویە دگەل ھەڤالا ، ھەردەم بەرژەوەندییا گشتی ۆ ئاسایشا نەتەوەیی بەرچاڤ وەردگرت.
پشتی گوتار ھاتیە خواندن ، ھەمی مرۆڤێن حازر ، خوە ب رێزکرن ، چوونە دەستێ برایێ ڕەحمەتی ۆ داخوازا ژێبرنا گۆنەھان ۆ خوە شکرنا جھی وی ل ئاخرەتێ کرن . وی بەرپرسێ پلە بلند دەستێ سیروانی گرت ۆ برە ڕەخەکی :
ـــ دڤێت پەرتۆکەکێ ل سەر ژیانا وی چێکەی ، ئەڤە فەرمانە ژ سەری ۆ من تو یێ ژێگرتی .
پاشی گەلەک نەما و ل سەر زێدەکر : بوتە ژی باشە دێ دو فلسەک گەھنە تە .
فەرمانا وی بەرپرسی دلێ وی نەخوش نەکر ، بەلکو ب شانازی ڤە زانی ئەۆ ببیتە جھێ باوەریێ و بڤی ئەرکی ڕاببیت ، ژبلی کۆ دێ ھندەک پارا وەرگریت ، وەکی چەوا گوتیێ (دوفلس) ! . ( ل جەم ڤان بەرپرسان دوفلس تشتەکێ مەزنە ، ژ بەرکو خوەدی ھێز و سامانەکێ بێ سەر و بنن ئێدی پارێن مەزن ل جەم وان بچویک بوینە ، ڕەنگە دو فلس ئانکو دوملیون ۆ نەشەرتە پتر ژی ماکی دزانیت ؟)
**
پشتی بورینا حەفتیەکێ ژ تازیێ ، ب مەرەما چێکرنا کتێبی ل سەر ژیانا ڕەحمەتی بەرێ خوە دا گوندی ، پشتی پرسیارکرنێ دیاربوو کو ژ مالا وی تەک کەسەکێ مای ئەو ژی برایێ وی یە ئەوێ ل ڕێورەسمێن ڤەشارتنا وی حازر بوی .
دەما چویە دیدارا برایێ وی ، ھەر زوی ژ بخێر ھاتن و وە رگرتنا سلاڤێ وسوحبەتێن وی زانی ، برایێ ڕەحمەتی مروڤێ خوەدێ یە و نەخواندەڤایە ، ژبلی ڤێ گەلەک یێ دێم بێ گونەھە و کانێ چ ددلی دایە یێ ل سەر دەڤی ، نەڤیا گەلەک دەمی ببەت ؛ شێوازێ خوە یێ دیالوکێ بکارئینا کو ب رێکەکێ بشێت ھەمی ھیر و مێرا ژ برایێ وی بزانیت و پروژێ کتێبێ بو وی دیارنەکەت . وەکی چەوا کەسەکێ ٢٠ سالان مروڤی دوستینیی دگەل ھەبیت ؛ ژێ پرسێ کانێ بەرپرسێ پشکا پەیوەندییا ل وەزارەتا ڕەوشەنبیری د زاروکینی و سنێلە ییا خوە دا یێ چەوا بو . برایێ وی دەستدا چێکرنا جگارەکا توتنێ و چو سوحبەتێ …
ـــ بابێ مە ئاغایێ گوندی بو ، حالێ مە گەلەک یێ خوەشبو ؛ کەسێ چ گازندە سەر مەنە بون ، بەس ڕەحمەتیێ برایێ من ئیشنەلا خودێ ژێ ڕازی ببیت تەبیعەتەکێ کرێت ل دەڤ بو ، دێکلێت خەلکێ گوندی ددزین ، ھندەک جارا ھێڤنێ قنینێت غازێ بو گوندیییا نەدھێلان ، مە قوتا ژ خوە بو ، بابێ من ل چلێ زڤستانێ
دحەمامێ ڤە گرێدا چ فایدە نەکر ، ل دوماھیێ برە باژێرێ ل دەڤ دختورەکێ نەفسانی ، پاش برە دەڤ ھەڤالەکێ خوە ل وی حینی مەسئولەکێ مەزن بو ، دا بو وی سەحکەتە شولەکی ، ل تە ناڤەشێرم دەمێ بابێ من بریە باژێری و وی بڕیاڕ دای بمینتە ل وێرێ ؛ سەرێ مە ژێ رەحەت بو و ئێدی ئەم شیاین ل دیوانا خەلکی بڕوینینە خوار! .
***
پشتی کو ژ دەڤ برایێ ڕەحمەتی ھاتیەڤە ؛ ھزار و ئێک پرس دسەرێ وی دا دزڤرین ( چەوا بەرپرسێ پشکا پەیوەندییا ل وەزارەتا ڕەوشەنبیری دزیکەربو ، ئەو چ نەخوشییا دەڕونی یە مروڤی دگەھینتە ئاستێن ھوسا بلند ، ل دەسپێکێ بەرپرسێ سەنتەرەکێ ڕەوشەنبیری و پاشی چالاکڤانێ رێکخراوەکا نە حکومی ، شنی بگەھیتە وەزارەتێ ! .. براستی تشتەکێ نەیێ بەرعاقلە )
د ڤیا بزانیت چ نە خوەشی ل جەم بەرپرسێ پشکا پەیوەندییا ل وەزارەتا ڕەوشەنبیری ھەبو . بەرەڤ نەخوشخانێ ل بەشێ ئامار و ئەرشیفی چوو ، پڕوفایلێ وی ڤەکر ؛ دەستدا خواندنا ڕاپورتێ ، ل رێزێن ئێکێ بێھنا وی چک بو ؛ مروڤ ھزردکەت یێ ماڕاسونێ دگەل خواندنێ دکەت و چاڤێن یێ ل سەر بەرپەڕی زیق بوین ، بەردەوامی دا خواندنێ ؛ ھێدێ ھێدی خوە وەکی کەسەکێ تاوانبار ل ھیڤییا بریارا جێبەجێکرنا حوکمێ سێدارەدانێ ب ناڤ چاڤێن وی دا ھاتە خوار ، بەری ب داوی بینیت ڤەجنقی و بنیڤ تۆڕەیی ڤە گازی بەرپرسێ پشکا ئەرشیفی کر :
– برا ھوون دخەلەتن ، قەت چێنابیت ئەڤ نەخوشیە ل وی بیت .
بەرپرسێ پشکێ دەستدا ڕاپۆرتێ و ب ھۆوربینی خواند ، پاشی بدێمێ مروڤەکێ حێبەتی بەرسڤ دا :
– چ خەلەتی دڤێ ڕاپورتێ دا نینن ، ل ١٩ ئەیارێ ل سالا ١٩٩٢یێ ئەڤ ڕاپورتە یاھاتیە دڕوستکرن و ھەمی داتا یێن ھاتینە دوپاتکرن و ناڤێ وی … نەھێلا ئاخفتنا خوە تمام کەت و بڕی :
– ئەز دزانم بخوینم ، لێ قەت نابیت ئەڤە نەخوشییا وی بیت
ئینا وی فەرمانبەری ب شێوازەکێ ڕەق بەرسڤا وی دا :
– تو نیشا مە نادەی ، ئەڤە ھەمی تشت یێ ھاتیە نڤێسان ، ڤی مروڤی نەخوشیەکا دەرونی ھەبو ، تاکو دوماھی چرکە ژ ھەناسێ پەیوەندی دگەل خوە نەبون !
تەواو
کولتور مەگەزین: ئەزمونە نوێیەکان ئەو نوسەرانە کە تاوەکو ئێستا بەربڵاونین لەبڵاوکردنەوەدا، بێگومان بەختەوەردەبین ئەم ڕووبەڕە بکەن بۆ شوێێنیکی جیدی بۆ بڵاوکردنەوەی بەرهەمەکانیان .