لە خەونـمدا بە بەردەمی منداڵیـکـدا تێـــپەڕیم
قەسیدە – مای ٢٠٠١
ئیسماعیل حەمەئەمین
– بێگومان بە منداڵەکانم، کە بەردەوام بە بەردەمیاندا تێدەپەڕم…
١
لەوانەیە تەنها لەیادەوەری منداڵێکدا بمێنمەوە
خەونێکی تێپەڕیوو بم بەنێو سەرپۆشە فڕیوەکانی ئەندێشەی،
بەسەرپشتی کەروێشکێکی ڕەنگ پەمەییەوە بم و بڵێم؛ ئاها ڕۆژەکان لەقوڕی ڕەنگاوڕەنگ دروستدەکرێن…
بڵێم؛ خودایەک هەیە خۆی لەخەونەکانی ئێمە دەدزێتەوە و بەمەساسە شیرینەکان هەڵماندەخەڵەتێنێ،
بڵێم شتێک هەبوو لەنێو کێڵگەکاندا ڕووا و لەمنداڵیمدا پێی نەگەیشتم…
شتێک هەبوو دوور، لەکونی مشکەکوێرەکاندا خۆی شێردبووەو نەمدۆزیەوە.
شتێک هەبوو لەفریشتیەک دەچوو …
فریشتیەک هەبوو ڕۆژانە لەسەر ئەم شەقامانە جگەرەی دەکێشا و لەنێو پاسه‌كانی خەیاڵدا، لەودیوو پەنچەرەی تاکسیەکانی موحیبەتەوە سەیری وێنەکانی خۆی دەکرد و شەپۆلەکانی دەریای لە دڵیدا دەخەواند، شەپۆلی دەریای لەدڕکستانەکانی ڕۆح قوتار دەکرد و وەک حەشیش دەیکێشا…
فریشتەیەک هەبوو دوای هەموو دابەزینێک لەواگۆنەکانی هیواو بەختەوەری،
لەخەونە درۆزنەکانی ئەشق، لەوشە شیعرییە ڕۆمانسیەکانی نۆسەد و هەشتاو حەوت
لەشۆڕشی بێنەزاکەتی سەرکردە ئەبەدییەکان
لەڕاپەڕینی برسێتی گۆلاوەکانی سێكس
دوای هەموو ماڵئاوایەک لەباخچەی دڵداریەکی بەجێماو
دوای دزینی گوڵە نێرگز لە شەوەکانی هاویندا
دوای هەموو پێناسەکانی بوون
دوای مردنی خواکان لە نێوخۆرەکانی جەنگدا
دوای خوێندنەوەی ئەو هەموو ڕۆژنامانەی بەختەوەریە نەشیمیلەکانی ژیان قێزەوەن دەکەن
دوای بەجێهێشتنی گورگە هەڵگەڕاوەکان لە وجود
دوای هەموو شکانی پەنجەرەکان لەبەرەبەیانێکی کۆچکردنی ڕیشۆلەکان بەرەو باشوور…
دوای هەموو سەرمەدییەکانی جەستە،
دوای نوستنی سی ساڵەی میهرەبانی خودایەکی سەرخۆش،
خۆی دەکرد بەباڕێكدا و لەوێ، لەنێو شه‌رابدا خۆی دەکوشت.
دوای خۆکوشتنیش بۆ نوستن خۆی دەکرد بەخەونی منداڵێکدا…
منداڵێکیش دڵی بەگۆلاوەکانی قەراغ شار خۆش بوو، بۆئەوەی چادرەکانی خەونی لەسەر هەڵدا، بۆ ئەوەی ئەفسانەی خۆی لەسەر دیوارەگەچینەی گەورە پیاوان بنوسێتەوە. پێویستی بەهەناسەی فریشتیەکی سەرکێش بوو، پێویستی بەشوێن بوو، بۆئەوەی بوونی خۆی فانی بکات.
پێویستی بەشوێن بوو بۆ ئەوەی جەستەیەک لەخەون
بەهارێک لەنەبوون
دنیایەک کۆلارەی ڕەنگاو ڕەنگ
مەیمونی سەرخۆشی نێو دارستانەکانی شەفەق
فیلی جۆراوجۆری کەنارەکانی کیشوەرێک لەیاری هەرزان
توتی چەنەبازی شین وسوور
شەڕی کارتۆنی دوژمنە مقەباکان
مرۆڤەکانی قوڕەسەناعە
گشت ڕیزە درەختی بەسلەبۆیە نەخشێنراو،
نیشتمانێک لەمقەبا و زەویەک لەڕەنگ و ئاسمانێک لەتەپوتۆزی باریو بەسەر وەنەوشە و نێوەندێک لەهەڵمی ئاڵتونی و کاروانێک لەئەستێرە ئازاد کات.
شوێنێک، تێدا پەراوێزێکی خەون بێت، خۆحەشاردان بێت لە بێزاری دایکان، لەو چۆلەکانەی تۆوی کەرەوزی باخچەیلەکانیان بەدەنووک هەڵدەگرنەوە، لەنەڕەی باوکان لەتاو خاولیەپیسەکانی حەمامەکانی شار و شەڕە ئەبەدیەکانی نەتەوە.
شوێنێک بێت بۆ خۆحەشێردان لەو فەقیهە خۆڵەمێشیانەی نێوەڕوانی گەلاوێژ خەون بە حۆریە ڕووتەکانی بەهەشتەوە دەبینین و نایەڵن منداڵان لەوسڵخانەکاندا مەلەبکەن،
نێوەندێک بێت لەهەڵمی سۆزە بەجێماوەکانی پاڵەوانی نێو حیکایەتان، چادرێک بێت بۆ نوستنی نەرمی فریشتیەک دوای چاوەڕوانکردنی خودایەکی خومار و سەرخۆش .
شوێنێک بێت بۆ خودایەکی بێزار له گه‌ردوون، بۆ فریشتیەک بێزار لەبەهەشت
شوێنێک بێت بۆ لێرەبوونی منداڵێک لەڕەنگی وەرزەکان.
شوێنێک بێت بۆ شەڕی پیاوەکان لەسەر خاکێکی پڕ کرم، پڕلەئەژدیها، شوێنێک بێت بۆجەنگی شاراوەی نێو گەردیلەی خۆڵ.
شوێنێک بێت بۆ هەبوونی سادەیی منداڵێک لەحکایەتێکی تێپەڕیوو بەسەر زەمەندا.
منداڵێکیش هەبوو.. ئای لەو منداڵە .. لەشوێنێک زەویەکانی وەک فەڕشی سووکەڵەی عەسران بەدووی خۆیدا ڕادەکێشاو یاریەکانی لەسەر بڵاودەکردەوە؛ نیشتمان یاریەکانمە،
نیشتمان ئەو پوشکەبەقونانەن بۆ تێرکردنی چێژی شەڕانیمان، پووشکە دەکەین بەقونیاندا و بەنێو ئازادیدا دەیانفڕێنین،
نیشتمان ئەو پیشلانەن شەوانە بە کەڵکەبەرد ڕاویان دەنێین،
ئەو گوڵە ئەستێرانەن شەوانە لە شوشەی دۆشاوی تەماتەی ئێراقی بەندمان دەکردن و بەیانیانیش لە بێزاریدا لەناومان دەبردن.
نیشتمان فەڕشێکی دڕاوی منداڵێکە لەسەری دەخەوێ، نیشتمان بووکە شوشەیەکی بێقاچ و مەیمونێکی پەڕۆی بێسەر و دەمانچەیەکی ئاویی مانگی نیسانە،
نیشتمان لەبیرکردنی منداڵێکە لەئێوارەیەکی بەفرانباردا…
لەبیرچوونەوەی منداڵێکە دوای ئەم هەموو ئۆقیانووسانە دێت و بڵێت؛ کوا پیاوەکارتۆنەکانی گزنگ؟
بڵێت؛ نەگبەتیە دوای ئەم هەموو سەرەگرتنە لەبەردەم هێڵی سنوورەکاندا بڕوامان بەفریشتیەک هەبێت،
بڕوامان بەخودایەک هەبێت نەنەتەوەی هەیە و نەنیشتمان.
دوای ئیشکبونەوەی وەرزەکان بڕوامان بەخۆرێک هەبێت حەسرەتەکانمان بڕەنجێنێ،
بڕوامان بەتێپەڕبوونی منداڵێک هەبێت لەئاوابوونێکی دووری دەستەسڕە بابردووەکانی ئاشقانەوە هاتبێت، لەبەفری حەزێکەوە هاتبێت ڕووتبوونەوەیەک بێت لەمانا.
٢
من بەبەردەمی فریشتیەکی بێمانادا تێپەڕیم و بوونی منداڵێکم لەنێو نەبوونیدا دۆزیەوە، بوونی خودایەک لەنێو سپێنەی چاوەکاندا ڕاکشاوەوە بەهێمنی دەمرێت و دەڵێت؛ ئەی زەوی، ئەی سۆزانی پیری کۆڵانەکانی جەنگ، ئەی جیهان ، ئەی لێرەبوونم، کەی منداڵێک بەبەردەمتدا تێدەپەڕێت؟!
ئەی ژەنگ، کەی وەک ڕەشەبا هەڵدەکەیت و لەدڵان دەبیەوە.
ئەی ئەو بۆن گۆرەویەی لەنێو سییەکانمدا پەنگیخواردووە کەی لەچارەنوسم دەبییەوە.
ئەی فریشتە، کەی دەگەڕێتەوە بۆ نێو باخچەکانی ڕاستی،
ئەی منداڵ کەی بە بەردەم مرۆیەکدا تێپەڕدەبیت کە تەنها بیر لەکۆچکردنی شەپۆل و هەورەکانی خەزەڵوەربکاتەوە،
تەنها بیر لەئاوابوونێک بکاتەوە، بیر لەوە بکاتەوە ساتێکی ونبوون دێت جەستەی خوداوه‌ندی خوداکانی تێدا ببینێت ، بۆ هیچ نا، تەنها بۆ ئەوەی بەمنداڵێکی نیشاندات ، پێی بڵێت؛ ئەها خودا ڕەنگی ئاوی گرتووە و لەشەفەقدا بەتەنێ یاری بەتۆپی ڕەنگاڵە دەکات…
بڵێت؛ خودایەک هەیە لەنێو باخچەکانی تەنهایی خۆیدا یاری لەگەڵ ئەو گوڵە نایلۆنانەدا دەکات کە فریشتە ڕیاکارەکانی بۆیان هەڵفڕاندووە… خودایەک زێدە پێغمبەرە ڕیاکارەکانی خۆشتردەوێ وەک لە ڕاستیەکانی وجود، خودایەک حەزناکات ئەم منداڵە لەنێو گەڵا زەردەکاندا بێتەدەرێ…
منداڵێکیش خەون لەنێو گەڵاکاندا دەبینێت بۆئەوەی خواوەند لە گرێی گوناهە قوتارکات، گوناهه‌ی خه‌لقكردنی گه‌ردوون…
1963 Portrait of Henrietta Moraes- Bacon’s Female
Portrait
فریشتیەکیش لەنێوان گوناهەکانی خودا و خەونەکانی منداڵێک بەدۆزینەوەی جیهانێک لەنێو کوونی مشکەکوێرەکان، لە نێوان هەڵبژاردنی گوناهە ڕاستەقینەیەکان و درێژبوونەوەی ڕەنگەکان بەنێو ڕۆحدا ، خومارە بە ئەشقی سۆزانیەکی ئێوارەیەکی تەنهایی…
خودایەک حەزی لەمرۆکانە ، پێستی وان و ڕەنگی ئەوان دەپۆشێ بۆئەوەی لە ئێوارەیەکی تەنهایدا خۆی بۆ سۆزانییەکی پیر ڕووتبکاتەوەو بڵێت؛ وەرە تێرمکە بەچێژێکی ڕاکردو لەتەنهاییەکانی خۆم، وەرە و جەستەم بکەبە توێژاڵی ئاوێک ، بەبێڕەنگەیەکی ئاو ، بۆ ئەوەی تێکەڵی بیزاری منداڵێک بێت.
مندالێک ەنێو گەڵازەردەکانی ئەندێشەی خواوەندو فریشتیەکی خوماردا ڕادەکات. لەسەر شەقامێکی مەنفادا بەپیرێژنێکی گوێ گران دەڵێت : دوێنێ ئێوارە ویستم خۆم بکوژم و ئەمڕۆش پەشیمان بوومەوە…
٣
مندالێک بەپیری لەدایکبوو، حیکمەتی سپی لەوشەکانی شێردۆتەوە،
دوور لەهەموو شەفەقەکان یاری بەجەستەی پێغمبەرێکی خەڵەفاو دەکات. لەنێو کۆڵانەکانی تاریکیدا بووزی پێوەدەکات و لەنێو تاریکی ئێوارەدا میزدەکات…
دەڵێت : گوێت لەدەنگی پێی فریشتەکانی خودایە ئەی پەیامبەری خەڵەفاو؟ گوێت لەدەنگیانە کەلەخوڕەی میزێکی ئێوارەیەکی ڕەنگ پەڕیوو دەچن. گوێت لەو هەناسانەیە کەبۆ ن سیر وڤۆدگای مۆدێرنەی لێدێت. گوێت لەدەنگی بەربوونەوەی ئەو فریشتانەیە بۆ نێو ژیان، بۆ نێو درزی مەمکی ژنه میهره‌بانه‌كان…
گوێت لەفیکەی بێهودەیی ئەوانەیه کە ئاسمانیان جێهێشتووە و لەکۆڵانە بۆنچڕوکاویەکاندا خۆیان بۆ هەوەسه‌کانیان شلدەکەن.
گوێت لێیە ئەی خەوبینەر بەزەمەنەکانی ئه‌به‌دیه‌ت،
زەمەنی پێغمبەر وشوڕشگێڕ وفەیلەسوفەکان دەمێکە لەنێو جڕتێکی ساردا گیانەڵای داوە…
گوێت لەم دنیایە کەتەنها خوڕەی میزێکی بۆگەنبووی شەڕەکانی خودایه‌كی ته‌نیایه ، ئێستا لە تاکوتەرایی خۆیدا ئەشقی قەیرەکیژێکی چل و پێنج ساڵەبووه و هەموو ئێوارەیەک لەسەر ئەم شەقامانە بەقاتێکی سپی و گوڵێکی سپی، بەچاکەت و پێڵاوێکی بریقەرداری سپیەوە حەسرەتی ئاشقانە بۆ چاوەڕوانیەکانی هەڵدەکێشێ.
گوێت لەوشەکانە ئەی ئاشق، ئه‌ی پێغمبەری خەڵەفاو، ئەی ئەوەی یــەکەم جار وشەت خۆش ویست، پاشانهەموو ئافرەتە بەئاڵۆشەکانی کەنداو…
یەکەمجار حەزت لەوشەکانی فریشتیەک بوو لەبێزاری خۆیدا، دوای خۆکوشتنی لەنێو په‌رستگایه‌كی دیۆنیسۆسدا، لەبەردەم تۆدا گریا، گریا بۆ ئەوەی گۆشەگیریەکانی بۆ کۆکەیتەوە، ڕێگەی شارە پڕ شەهوەتبازیە خۆشبەختیەکانی نیشاندەیت، گریا بۆئەوەی بۆ ساتێکی لەبیرکراوی تێپەڕیوویش بێت بەنێو پێکەنینی منداڵێکدا تێپەڕێ.
هات و تۆش ئەی خەڵەفاو بەنێو خەونێکی مندا تێتپـەڕاند، تێتـپەڕاند بۆئەوی من لەنێو بێزاریەکاندا دارە دارە بکەم، هات و خۆی لەنێو خەونەکانمدا بەندکرد…
گوێت لێیە ئەی خەڵەفاو، چۆن میهرەبانیەکان لەم شەقامە تاریکیەدا دەرپێی کورتیخۆیان بە هاتوچۆکارە غەمگینەکان دەفرۆشن، دەبینیت چۆن دوای بەندیەکانی فریشتە لەخەونمدا، جیهان خەڵەفاوی خۆی پەرشدەکاتەوە.
گوێبگرە ئەی پەیامبەر، خەڵەفاو ، هەتیوکەوتوو لەنێو وشەکاندا، من لنگەوقووچی شتەکان لەنێو شەفەقدا هەڵدەواسم، بۆئەوەی تا کۆتایی ئەم خەونە پووچیتی تۆ لەنێو گزنگەکاندا بخنکێنم، من یاری بە سەروەرییەکانت دەکەم…
منداڵێک پێش ئەوەی تێپەڕبێت دەڵێت؛ من دوێنێ خۆشبەختی منداڵیم بەخشی بەقورینەگەکانی خەزەڵوەر..
٤
وجود گەڕانەوەی تۆیە ئەی منداڵ لەنێو گـــــــۆرانیەکی ناتەواو،
وجود خەون بینینێکە ئەی منداڵ بەهەموو جوانیەکانی جیاوازی،
وجود توندوتیژیە لەنێو هەراکانی ئەشــــق…
ئەی منداڵ، ئەی ئەوەی زۆر زوو لە نێو جەنگی باوکەکاندا گەورەبوویت و بوویت بەحەکیمی زەمەنەکان، ڕەنگەکانی پێکەنین دەزانی؟!دەزانی کەی خۆشبەختی بەسەر تەنافە تەمەڵەکانی گەلاوێژدا هەڵدەگەڕێن؟ دەزانی کەی خۆر هەڵدێت بۆ ئەوەی هاوین لەقامچیەکانی خۆی قوتار بێت؟ دەزانیت کەی و لەچ ساتە وەختێکدا بەختەوەری خۆی بۆ وشە ڕووتدەکاتەوە…
وجود ساتی لەدایکبوونت و ساتی پیربوونی پاڵەوانی حکایەتەکانی نێو ئاگربوو، پیربوونی هەموو ئاسمانەکان بوو لەبەردەم ساتەوەختی کردنەوەی پەنچەرەکان لەسەر باخچەی گوڵە نێرگزە ناوەختەکانی بەرەبەیانی ژنێکی سی وپێنچ ساڵە بەگوڵەگانی گووت؛ ئەها ئەو منداڵەی نێوهەناوم تا بەرەبەیان یاری بە ئەستێرەکان دەکات، لەنێو شلەمەنی سکمەوە دەیەوێت هاوکێشەی غەمباریەکانی وشەژارکات. دەیەوێت بەم بەرەبەیانیە پەنچەرەکانی بۆ بکەمەوە، بۆئەوەی لەنێو ئێوەدا سەمای لەدایکـنەبوونی خۆی بکات… بۆنی ئێوەبکات کەهەمیشە بەپەلە بەنێو خەزەڵوەردا تێپە دەپەڕن. ئەو تۆزێک لەمەو بەر گووتی: دایێ، پاڵەوانی چیرۆکەکانی منداڵی دەمێکە لەخرفبوونی خۆیان بــێـــزارن، پەنجەرەکان بکەوە بۆ ئەوەی لەنێو باخچە نادیـــــــــارەکاندا بەبــۆنی تـــــێـــــپەڕبوونی زەمـــــــــەنە گەشە درۆزنەکان سەمای لێرەبوونی ئەم گوڵانە بکەم کە خۆیان لەنێو وشەدا ســـــــــەرمەدی کردووە…
وجود تێپەڕبوونی تۆیە ئەی منداڵ بەنێو مەملەکەتی خودایەکی خەڵەفاو…
٥
ژیــان کورتە ئەی منداڵ بۆ دەموچـــــاو شتنێـــک لەبەردەم ئاسۆگە،
ژیان کورتە بۆ وشکردنەوەی ڕابوردوو بەسەر تەنافەکانی ئێستا
ژیان کورتە بۆ ڕامان لە هەقیقەت، لەو پەڕەسێلکانەی ئێستا خۆمان لێ نەناس دەکەن. ژیان سەرگوزشتەی ڕاوچیەکی هیلاکی نێو دارستانەکانی ڕاستەقینەییە، ژیان دێڕێکی نوسراوە بەخەتێکی ناشرین، ڕۆمانێکە کەس نایخوێنێتەوە،
دەرگایەکە کەس نایەوێت پێدا هاتوچۆ بکات
خەڵقکراوێکە نایەوێت خوداوەندی خۆی بناسێ،
درۆیەکە لەنێو ڕاستیەکی ئەزەلیدا خۆی پاڵخستووە،
زیندەخەونێکی هەرزەکاریە بەکێژێک لەپۆشمینە، لەنێرگز،
لەبزەیەکی تێپەڕبوو…
ژیان کاتێک هەبوو کەمن بیرم لێدەکردەوە،
ژیان ئەو شەوانەیە خومار بووم و دەمگووت؛ ئەم کیشوەرانە چیرۆکێکی نەنوسراوی منن
ئەم پیاوانە پاڵـــەوانی ڕۆمانەکانی منن
ئەم دەشتە کاکی بەکاکیانە سنووری فانتازیاکانی منن.
ئەم هەناسانە ساتەکانی لەبــیرچوونەوەی منن لەنێو گوڵەشەوبۆدا
ئەم پێپلیکانە مەڕمەڕیانە بێدەنگی منن بەرەو ئیلهام…
ئەم پەیکەرە بێدەنگانە پیتی وشەکانمن لەدوای گوتنیان،
ئەم ڕستانەی ئێستا دەگوترێن بیست و حه‌وت ساڵ لەمەوبەر لەکاتی چایی خواردنەوەی چایخانەیەکی تەریکی ڕۆژهەڵات بۆ خۆشی گووتبووم…
ژیان شەڕێکی ئەبەدییە ئەی منداڵ لەگەڵ پێکەنین،
ژیان فریشتەیەکە، ئای تەنها فریشتەیەکە و هیچیتر، بێزارە لەمیتافیزیکای شتەکان، لەهەموو جیوەییەکانی کەوتنەخوارەوە،
لەهەموو خەوتنەکانی نێو وەردە گەنمەکانی هاوێنێک، تێدا، ئافرەتێکی کەزی ڕەشی، پێست گەنمی تێدا ناسی. ژنێک دڵی لەنێو بۆن ئارەقەی حەزە پەمەییەکانیدا جێهێشتبوو،
ژنێک نەعلەتی کرد لەتاعونەکانی خۆشەویستی،
خۆشەویستیەک وەک سۆزانیەک چەندەت پێدەبەخشێ ، ئەوەندە گوڵـە بەیبون لەڕۆحتـدا دەردەکێشێ…
ژیان فریشتەیەکە ئێستا بەهەموو ژنەکان دەڵێت؛ من دەمەوێت لەسەر پێخەفی ئەم گوڵــەنێرگزانەدا خەون بە ژنبوونەوە ببینن.
ژیان سوچێکی لەبیرکراوی دڵۆپەبارانێکی تەنهاکەوتووی خەزەڵوەرڵـێکی میهرەبانیە، ژیان خەونێکە بەمانگێکی خوازرا و لەڕەنگ، لەوشە، لەهەناسەی سەفەرێکی ڕۆژهەڵاتیانە.
ژیان خەونێکە بەمنداڵێک بەنێو ئاوێنەکانی خۆیدا بێت وبچێت و بڵێت؛ ئەم هەموو تاوانە لە وشەکانەوە دەستیان پێکرد تا گەیشتنە سەر مەدارەکانی ونبوون… بڵێت؛ ئەم هەموو ئاسمانە کاتێک هەبوون فریشتیەک لەنێو مندا خەونی دەبینی وئاگای لەخەڵقبوونی وشە نەبوو لەنێو جیهاندا.
فریشتیەک، ئای چ فریشتەیەک، ئاگای لەئەفراندنی تەنهاییەکان نەبوو لەنێو ئۆقیانووسەکان، ئاگای لەو هەموو فراوانبوونەوەی ڕق نەبوو لەنێو ئەشقدا جۆلانەدەکات..
ژیان ڕێکەوتێکی سەیرە دوای قیژەیەکی کەوتنەخوارەوە خۆیت پێدەناسێنێ و دەڵــێت؛ تۆ تازە تووشبووی، ئای چ تووش بوونێک بەو شتەی پێیدەڵێن؛ ژیان….
٦
خەونم بینی ئەی منداڵ بەسووچەکانی منداڵیم
خەونم بینی ئەی منداڵ بەئەشقێکی دێرینە.
لەخەونمدا ئەی منداڵ، باڵندەکان لەڕۆژهەڵاتەوە دەهاتن و لەنیوەشەوی شارەکاندا خۆیان بۆ سەمای چێژ دەپۆشی. باڵەکانیان بەڕەنگی شەوانی حەزی ڕۆژئاوایی، بە بۆیەی پلاستیکی ڕەنگاڵە کرد، ڕۆمانسیەتە ڕۆژهەڵاتی وئاهەکانیان لەنێو جانتاکانی نێوەڕۆیانی بەر خۆرەتاوی کێڵگەکانی بیرەوەری، جوان،جوان، قەد کردو گووتیان؛ ئیدی زەمەنی سۆزانییە پلاستیکیەکان دەستپێدەکات…
گوتیان؛ زەمەنی ئەو سۆزانیانە گوزەشت کە دڵی شاعیرەکانمان لەنێو جۆلانەی باخچەکاندا دەپێکا، گوزەشت زەمەنی ڕوانین لەمانگ، مانگی نێوەڕاستی شەوانی گەلاوێژ، پوشپەڕ، خەزەڵوەر…
گوزەشت زەمەنی ئاهاتەکانی نێو پێکە عەرەقی زەحلاوی ئەو ئاشقانەی قەرزاری ئەو پاقلەفرۆشانە و ئەو منداڵە بۆیاخچیانە بوون ، لەجیاتی قەرزدانەوە، بەکۆپلە شیعری دڵشکان ڕازیان دەکردن. قەرزاری ئەو پاکەت فرۆش و مەیگێڕانەبوون، نیوەشەوان دوای سەرخۆشی پێکەوە فرمێسکی گەرمیان هەڵــدەڕشت. گوزەشت شەوانی چێژ وەرگرتن لەعەبەسی نوستن لەسەر فەڕشی شەونمی چیمەنی باخچەکانی شار، گوزەشت تێڕامان لە پەڕەسێلکە باریووەکانی خۆرئاوا، گوزەشت هەموو مردنێک لەنێو عەزاباتی شیعر…
خەونم بینی ئەی منداڵ بە ونبونی ئەو باڵندانەی خەمە ڕۆژهەڵاتیەکانیان توڕهەڵدایە نێو تەنەکەخۆڵی میترۆکانه‌وه
خه‌ونم بینی ئه‌ی منداڵ به‌خۆمه‌وه،
من هه‌میشه خه‌ون به‌خۆمه‌وه. ده‌بینیم ئه‌ی منداڵ…
خه‌ونم دی بەو باڵندانە لەبەردەمی گڵۆپە تەنیاییە ئیرۆسیەکانی مۆدەدا شانازیان بەفڕێدانی خەمە ڕۆژهەڵاتیەکانیەوە دەکرد و بەبێزاریەوە پێیان گووتم؛ تۆ ئێمە غەمبار دەکەیت …
گووتیان؛ دڵداریەکان تەنها لەسەر ڕوووبەری سکرین و فلیمی ئەو کەناڵانە هەیە بەخۆڕایی بۆ سەرخۆش وهەژارەکانی شارەوانی و پەناهەندە ڕۆژهەڵاتی و ئاسیاویەکان پەخشدەکرێن، ئەوانەی لەبەردەم ئاگرەکانی مەنفادا بەدیار چیرۆکەکانەوە حەسرەتی گەرمی ڕەشەباکانی باکووریان هەڵدەکێشا. ئۆی غەمبار بەخەونەکانی شیعر، دڵداریەکان کاتێک هەبوون جەنگی سارد ڕۆژهەڵات و ڕۆژئاوای لەوەهمی کێڵگە هەتەر بە هەتەرەکانی حەشیشی ئازادیدا خومارکردبوو. ئه‌شق کاتێک هەبوو حۆریەکان سەرەیان نەدەگرت بۆ ئەوەی لەپلاکاتێکی میترۆیەکی لەبیرکرودا ، بەڕووتی پەنیرە سویسیریەکان لەسەر ناوکیان دانێن بڵێن؛ جوانی ئێمە لەخواردنی ئەم پەنیرانەی ڕۆحە…
دڵداریەکان کاتێک هەبوون تۆ بەلای هەموو درەختێکی شاردا تێپەڕ دەبوویت و سڵاوت لەهەموو کیژێکی ئێوارانت دەکرد و دەتگووت؛ ئەم خۆرە گەرمە ، خۆری ئەشقێکە لەنێو وشەدا گەورە دەبێت …
دەتگووت؛ ئەم دونیایه ساتێکی منە لەنێو شەفەقێکی سەرکێشی ئەو گوڵانه‌ی بۆ یەکەمجار ماچیان دامێ، لەشەوانی خوماریمدا مەمکەکانیان لە نێو ئاوریشمی شەرم دەپێچا و لەنێو ئاگرە جەهەنەمیەکانی ماچەکانمدا ئازادیاندەکردن و ماچیاندەکردم دەیانگووت؛ ئێرە ئێوارە و نیشتمان و مەنفاکانی ڕۆحتە… دەیانگوت؛ ئێرە هەموو لەبیرچوونەوەیەکە لەنێو نادیاریەکانی ئەشق و خۆشبەختی خه‌مه ڕۆژهەڵاتیەکان.
Francis Bacon Reclining Woman 1961 Oil on canvas x Tate – bacon
گووتیان؛ دڵداریەکان کاتێک هەبوون، جوانی، بێ پێناسە شەڕانیەکانی ئەقڵانیەت، وەکی خۆی بەڕووتی ، بێ بڕگەکانی زمانی حونجەتباز لەساتەکانتدا خۆیان پێناسە دەکرد.
گووتیان؛ دڵــداریەکان کاتێک هەبوون کە لەڕۆژهەڵاتەوە ، لە ڕۆژە گەرمەکانی منەوەرەکانەوە خواداوەندێک هەبوو بەقاتێکی سپی و چاکەتێکی ئوتوکراوی سپی و خەونێکی سپیەوە دەیگووت؛ من ئادەم و حەوام دەرکرد، چونکە شەرمیان دەکرد بەڕووتی بەنێو بەهەشتەکانمدا بێن وبچن، کاتێک دەرمکردن فریشتە باڵەسپیەکانیان لەژێر پاڵتۆ ڕەشەکاندا دەشێردەوە و ڕستەکانیان ئەقڵانی دەکرد. کاتێک دەرمکردن کە سێوەکانی زانین بەدزی منەوە کۆپی دەکران و ئابڕووی نهێنیەکانی ئەبەدیەتیان دەتکاند.
دڵـداریەکان کاتێک هەبوون من، خوای ئه‌م گه‌ردوونه، لەسەروو ئەشقەوە ئەشقم دەپاراست. کاتێک هەبوون، ئەفیونی سۆزانیەکی عەیار هەموو ڕۆژێک لەبەردەم ئاوێنەکاندا ڕای نەدەگرتم، وای لێ نەکردبووم بەدزی هەموو مەخلوقات سەر و ڕیشم بۆیە بکەم و بەمقەستی تیژ فێرە کورتکرەوەنەوەی ئەو تاڵە مووانە بم بەسپێتیان چەندەها کیشوەری زەمەنی گەمەیی خوواەندییان شکۆدار کردبوو… ئەشق کاتێک هەبوو، من خواوه‌ندی هه‌موو خواوه‌نده‌كان، مەجبوور نەبوم لەبەردەمی سۆزانیکی چل و پێنچ ساڵەدا دەستی لەزیوو لەسەر دڵم دانێم و بڵێم من پارەی کاتژمێرێکی چێژمداوە و هاتووم بۆئەوەی لەسەر ئەم کورسیە تەنیایە لەجەستەی ڕووتت بڕوانم و هیچیتر. بۆ هیچ نا، تەنها بۆئەوەی ئەو زەمەنە وەنەوشەیانەم بیربێتەوە کە گه‌ردوونم خه‌ڵقكرد به‌و ناشرینیه.من وه‌هام خه‌ڵقكردن شەرمیان لەڕووتبونەوە نه‌كه‌ن، هاتووم بۆ ئەوەی جلەکانی پیرۆزی بوون داکەنم و پێتبڵێم وەرەوە و چیرۆكی ناشرینی مرۆڤ و خوام بۆ بگێڕه‌وه…
خەونم بینی ئەی منداڵ بەئەشقی وشەیەک بەڕووتی بەنێو گوڵەکانی ئاگردا دەهاتن ودەچوون… خەونم بینی ئەی منداڵ بەو گوڵانه‌ی لەمەنفا مەمکەکانیان سیس بۆوە، لەخەونێکی بەرەبەیاندا لەنێو زەمبیلەیەکی ڕۆژهەڵاتیانەدا، لەبەردەم قەسیدەیەکی ناتەواومدا دایان ناو گوتیان؛ ئاها، چۆن لەحەسرەتی شەوانی ئەشقی گەرمی پەنچەکانتدا سیس بووین.
خەونم بینی ئەی منداڵ بەمەمکەکانی ڕۆژهەڵات…
٧
گریان سەرەتای پێکەنینی تۆ بوو ئەی منداڵ بە هەموو ئەم ئەسپە سپیانەی بەنێو کێڵگەی ئاگردا تێپەڕین.
پێکەنین سەرەتای گریانی تۆ بوو بەپیرۆزیەک، جیهانی لەسەر سینیە زیوییەکانی کوشتندا ئازادکردبوو، سێوەکانی ڕۆشنایی لەنێو گالیسکەکانی گوماندا کرمەڕێزکردبوو، وشەکانیان لەنێو بێمانایی ڕووداودا تۆمارکردبوو…
ئەی منداڵ سەرەتای پێکەنینی تۆ بوو، هەموو دڵدارەکان خۆیان لەبازاڕی مسڕێژاندا بینیەوە و گووتیان؛ وەرن سپیمان کەنەوە ئەی مسڕێژانی جەنگ، ئەی باوکانی نەتەوە، وەرن لەنێو هەمووجوانیەکدا سەمابکەن، ئەی ئەوانەی مانگی خەزەڵوەری دڵی ئێمەتان بەخەنجەری خیانەت کردە قاشە کاڵەکی هاوینان و لەدیوو سنوورەکانەوە بە سەربازەکانتان فرۆشتەوە.
وەرن ئەی ئەوانەی وەک ئێمە سڵاو لەپەلەوەر و لەقلەق وقەلمراوەکانی زستانان ناکەن، ئەوانەی ناتانەوێ لەم گەرودنەدا لەچێژەکانی بەدگومانی تێبگەن. ئەوانەی ناتانەوێ بەسەر پەیژە بەهەیبەتەکانی شەڕەکانی وشە و گریانەکانی ئەشقی قەسیدەیەکی بەر خۆرەتاو دا سەرکەون و بڵـێن؛ ئەم جیهانە پڕێتی لەهەناری نێو ڕەشابەیەکی حەزی ئەم ساتانەی تەنهایی…
گریان سەرەتای کردنەوەی پەنچەرەیەکە ئەی منداڵ بەڕووی کێڵگەیەکی پڕحەشیش کەنێوی ژیانە.
٨
حەشیش سەرەتای ڕاکردن بوو لەخەونەکانی خوماری، خەونێک بەسەر هەموو لاسکە سەوزێکی بیرکردنەوەدا هەڵدەگەڕێ و دوور لەهەموو عارفەکانی سەردەم لەنێو شەوەکانی کەوتنەخوارەوەدا دەگەشێتەوە..
کەوتنە خوارەوە لەزەتی سەردەمی فریشتیەک بوو لەنێو کیشوەری دونیادا
کەوتنە خوارەوە دەرپەڕین بوو لەڕەحمی بەهەشتە نایلۆنەکانی پیرۆزی…
کەوتنە خوارەوە قیژەی فریشتیەک بوو لەهەراجاخانەی مەعریفەدا گووتی؛ من ڕزگارم بوو لەو گرێ مۆرانەی، خوداوەند لەنێومدا کوێری کردبوون…
من قوتاربووم لەخەمی منەوەر و ئەو موجاهیدانەی لەبەهەشتە نایلۆنیەکاندا ، بەدشداشەی سپیەوە بەنێو دەستەسڕەکانی خواوەندا دەهاتن ودەچوون ودەیانگووت؛ ئەی فریشتە کوا پەیمانەکانت بەئەبەدیەت، کەتۆ خۆت بونەوەرێکی غەمبار بیت؟
دەیانگووت؛ کێ گووتی لەودیوو دنیای فانی خەون نییە بە دواڕۆژ؟
کێ گووتی وەک ساوا بێخەم سەردەخەیەنە سەربالیف ؟
کێ گووتی ئەم هەموو کێڵگانه گوڵی بەهەشتەکانی ئەبەدیەتن؟
کێ گووتی درۆ لەمەملەکەتی ئەو دیوو شوشە دڵسافەکانی ئەشقی عارفێکەوە دەبینرێ؟
کێ بوو ئەوانەی پێیگووتیت؛ ئەی فریشتە ئەی خومار بەکێشانی حەشیش، جیهان له‌بیربكه؟
فریشتەیەک دوای بەربوونەوەی گووتی؛ ماڵـــئاوا ئینجانەکانی ئەبەدیەت، ماڵئاوا موجاهیدە بێدارەکان بەبێداری کێڵگە ڕاکشاوەکانی حەشیشی خوایه‌ك ده‌مێكه ئاسمانی جێهێشتووه و به‌قاتێكی سپی و جووته پێڵاوێكی سپی و چه‌پكێك گوڵه‌وه به‌دووی ئه‌شقدا ده‌گه‌ڕێت…
ماڵئاوا ئه‌ی کێڵگه‌كان، ئه‌ی ئێوه‌ی به‌دووی خوادا ده‌گه‌ڕێن، خودا ده‌مێكه وه‌ك من ئالووده بووه به‌حه‌شیش، به‌ژن، به‌جاز و ونبوون لەنێو خۆیدا…
Francis Bacon, ‘Three
Studies for a Portrait of John Edwards’ (1984), Oil on canvas.
٩
کێلگەکان لەنێو بێزاریمدا درێژ دەبنەوە، دەچنە نێو هەناوی ئەو گوڵــە نێرگزانەی بەرەبەیانێک لەخەونێک ڕایانچڵــەکاندم، خەونێک بەهیچەوە،خەونێک بوو بەڕەنگێک لەهەمو ڕەنگێک دەچوو، لەهەموو پەنچەرەیەکی کراوەی سەرباخچە و شەقامەکانی منداڵی و گوڵە مۆرەکانی چێژی هەرزەکاری و ڕەنگە گەرمەکانی هەڵچونی ساتەکانی پێگەیشتن و ڕەونەقەیەکانی کامڵبوون و داتەپینەکانی جەستەی پەنچاساڵی و چرچبوونەکانی شەست ساڵی و زەردی مردنە چاوەڕوانکراوەکان، دەچوو. لەمانە هەمووی دەچوو، بەڵام پێشئەوەی بەنێو ئەم نێرگزانەی تەمەندا تێپەڕم هەمووان لەهەموو شتێک دەچوون و لەهیچیش نەدەچوون.
خەونم بینی ئەی منداڵ بەهیچبوونێکی ئەبەدی،
خەونم بینی ئەی منداڵ بەڕەنگی بێزاریەکانم …
خەونم بینی بەنێو ڕەنگ و بێڕەنگی هیچدا تێپەڕبووم .
ڕاچڵەکیم ئەی منداڵ لەخەونەکانی هیچبوونێک لەودیوو ڕووناکییەوە تاوەکو ئەو سەری ساراکانی ڕەشێتی خۆیان درێژ دەکردەوە.
ڕاچڵەکیم لەو هەمووو دڵــداریەی بەتــــۆبزی بەنێو ژوورەکەمدا دەهاتن ودەچوون، بەتۆبزی گوڵە نێرگزیان لەگەڵ خۆدا هێنابوو،
بەناسکی وێنەی دڵـدارێکی ڕۆمانسیان لەنێو ئاوینەی دۆڵابە ڕۆژئاواییەکانمدا نەخشاند، لەهەموو شتێکی دەکرد تەنها دڵدار نەبێت…
لەهەموو دڵـدارێکی دەکرد تەنها خۆم نەبێت،
لەهەموو منێکی دەکرد تەنها ئاشق نەبێت
لەهەموو ئاشقێکی دەکرد تەنها من نەبێت
لەهەموو خەونێکی جوانی گوڵەکانی ڕۆژهەڵاتــــی دەکــــرد، تەنها گوڵــەکانی من نەبێت،
لە گەرمایی خۆرە پڕئەفیـــونەکانی ئەو کیــــــژانـەی دەکرد لەنێو گەمەیی ئەشقی هەموو شاعیرێکدا دەسووتێن
هەموو شاعیرێک… تەنها من نەبێت…
لەهەموو خەونێکی دەکرد چەندەها سەدەی بێڕەنگ لەم مەنفایەی ڕۆحدا دەیبینم، لەهەموو خەونێکی تاڕاوگە دەچێت تەنها خەونی من نەبێت.
ئەی منداڵ بۆ گوڵە نێرگزەکان دێنە خەونم، کەمن ڕۆژانە خەونەکانم لەنێو ڕۆتینی ڕۆژائاوادا دەخنکێنم، ڕۆژانە بەهەموو پیرێژنـــەکان دەڵـــێم؛ بەیانیتان باش، ئەی ئەو پیرێژنانەی فراوێن لەقاوەخانەکانی شاردا دەکەن و بەقێزەوە لەڕەنگی ڕەش وئەسمەر دەڕوانن و منیش پێیان دەڵێم؛ هەقیقەت لای ئێوەیە، بەیانتان باش پیرێژنە سپیەکانی ئەقڵانیەت…
ئەی منداڵ بۆ گوڵە نێرگزەکان دێنە خەونم کە من بەهەموو پۆلیسێک بڵــــێم: گوێ مەدەرە قسەی شاعرێکی وەک (مایاکۆفسکی) کەشیعری (تسی ناو پانتۆل) نووسی، گوێ مەدرێ، مۆدێرنە لەبن پـێیەکانی تۆوە خۆی دەپارێزێت…پێیدەڵێم؛ گەر تۆ نەبی هەموو تیۆرەکانی ڕۆژئاوا دەبن جڕتێکی نێو قەڕەباڵــــغیەکی لەپڕ…
گەر تۆ نەبی هەموو بیریارە گەورەکان ناتوانن ئەو ڕاستیانە بۆ ڕۆژهەڵات بنێرن، ناتوانن پێش خواردنەوەی جەمە نانێکی دبلۆماسی، شەرابی فەرەنسی هەڵبدەن و بە پۆستی خێرا کێشەکانی پۆست مۆدێرن بۆ گیاکەڵە فیوداڵەکانی ڕۆژهەڵات ڕەوانەبکەن، بۆئەوەی لەوێ دوور زۆر دوور، لەنێو گەوڕەکانی سیاسەتی نیشتمانە خۆڵەمێشیەکان شەڕێک بکەن هی هەموو ڕۆژهەڵاتیەکە و هی ئەوان نییە…
ئەی منداڵ بۆ گوڵە نێرگزەکان ئەم هەموو دڵداریەم پێدەناسێنن کەمن ڕۆژانە بەو هەموو جوانیەی نێو پاکەتەپلاستیکیەکان بڵــێم؛ ئێوە جەوهەری جوانیەکن لە خواردنی ڤیتامینی ڕەچەتەکانەوە، لەمەمکی سلیكۆنی ژێر بنەکۆی مەمکە گۆشتیەکانتانەوە خۆتان بە هەموو ماناکانی ئیستاتیکا ڕاستەقینەیی کردووە… منێک کەڕۆژانە ئەو جوانیە بەجوانی ئەقڵ تێبگەم و بڵێم؛ دڵداری گەڕیدەیەکی ڕۆژهەڵاتیانەیە و بەخێربێت جوانیەکانی پۆست مۆدێرن…
منێک بەو هەمـــــوو دڵداریە بڵێم؛ ژوورەکەم تەنها جێگەی خۆم و کاتژمێک دەبێتەوە ، بەیانیان بۆ ڕۆتینی کار وەئاگام دەهێنێ. بڵێم؛ ئەم هەموو جوانیە کاتێک هەبوون، فریشتیەک لەنێومدا بەسەرمەدی ئەشقێکی ڕۆناکیەوە بەنێو شارەکانی غەزەلدا تێپەڕبوو، بەنێو موشەحاتی ئەندولسی و دیوانی شاعیرانی ڕۆژهه‌ڵاتدا دڵـی پڕ دەکرد لەغەزەل… کاتێک هەبوو من بەدیار مۆسیقاوە دەگریام و بەیانیانیش وەک تولە نەمامێک لەسەر ڕێگای شەرمنیم چاوەڕێی کیژێک بووم نەدەهات…
کیژێک ئەشقم بوو، ئەشقی کیژێک بووم ، تەنها لەخەونمدا هەبوو، تەنها لەخەونیدا هەبووم ، نەمن دەهاتم ونەئەویش ، کەچی ئەشقێک هەبوو لەو نێوەندەدا، ئەشقێک پڕی بوو لەنێرگزەجاڕی چاوەڕوانی ئاهەتاکانی غەزەل…
ئەی منداڵ بۆ ئەو نێرگزانە هاتن ومنیان لەخەونەکان وەئاگاهێنا.
هاتن و فریشتیەکی خوماریان لەنێو کێڵگەی حەشیش بێدارکرد، بۆ هیچ نا، بۆئەوەی نەخۆشم بکات بەپەتاکانی ئەشق، بە سووتانەکانی ئەو ئافرەتانەی لەسەر جێگەی ساردیان چاوەڕێم بوون، بۆ هیچ نا، بۆئەوەی بگەڕێمەوە بۆ لایان، بۆ هیچ نا بۆئەوەی خوماربم بەگەڕانەوەم بــــــۆ ساتە بەچێژەکانی ئەشق.
١٠
ساتەکانی ئەشقم بیرکەوتەوە ئەی منداڵ ،لەشەوێکی خوماری گەلاوێژ، لەنێو ژورەکانی مانگی چواردە بەڕووتی له‌نێو تیرۆژه تیشكدا ڕاکەڕاکەمان بوو. گوڵە نێرگزمان لەسەر جەستەی ڕووتی یەکتر دادەنا و چاوەڕێ بووین بۆ چەند چرکەساتێک حەسرەتە گەرمەکانمان بگەشێتەوە. ئەو گووتی؛ گیا لەسەر پشتت ڕواوە ئەی ئاگری هەموو ئەشقێکی وەرزێکی تێپەڕیووی ئەم زەمەنە مێینەیەم،
من گووتم؛ کێڵگەکانی گوڵ لەنێوان مەمکەکانت دەشنێنەوە، بێ سنوور لەنێو بەیبوون وخونچە و لالەزار وشەونمی لەپڕی ئەم هەموو جوانیه‌دا، خۆیان بەبۆنی ئاهاتی گەرم بۆندار دەکەن.
بۆنی یەکترمان کرد ئەی منداڵ،
بۆنی جیهانمان کرد لەنێو جەستەماندا بەڕاستەقینەیی خۆی پەخشدەکردەوە،
بۆنی زەوی تەڕ، بۆنی خۆڵ،
بۆنی خوێنی گەرم،
بۆنی هەناسەی ڕاکردوو لە قەوزەکانی موحیبەت،
بۆنی منداڵیمان کرد بەنێو ئازاردا جۆلانە دەکات،
بۆنی خۆرمان کرد لەنێو ژوورەکانی چەپاندا سەمادەکا،
بۆنی ئەستێرەیەکمان کرد تازە بەتازە فۆتۆی ئافرەتێکی کاڵی عەسرانی پێیە و لەنێو ئاگری حەسرەتی ئێمەدا بەدوویدا دەگەڕێ،
بۆنی خەونی دۆڕاوێکمان کرد بەنێو ژوورەکانی سەرکەوتنێک لەکاغەز،لەپەڕۆی سۆزانیەکی پیرەکدا بەدوویدا دەگەڕا،
بۆنی سێوێکمان کرد لەهیلاکیدا بەهەموو سروەبایەکی دەگووت؛ ڕۆژباش!
بۆنی سیرمان کرد بەنێو ئارەقەی ئەسپەپیاوینەیەکی شەکەت بەدەست خۆیه‌وه…
بۆنی کێلگەکانی یەکترمان کرد و ئەو گووتی؛ بۆنی جەنگێکی دێرینت لێدێت، پێمگووت؛ كه‌ی جه‌نگ دێرین بووه ئازیز، دونیا له‌گه‌ڵ جه‌نگدا خوڵقاوه… تۆ نازانیت بۆنی گوڵەکانت بۆنی مێینەیەکن لەنێو پەنچەرەکانی ڕەشەبادا گەشاونه‌ته‌وه، بۆنی خەونێکی تەڕبوون لەئێوارەیەکی پایزی شاردا لەگەڵ ڕیشۆڵــەیەکی هیلاکدا گەڕابێتنەوە… بۆنی باخچەکانی مانگت لێ دێت کە لەنێو ئەم ژوورانەدا تەنها بۆئەم ساتانە بژی و بەرەبەیان لەگەڵ هەڵهاتنی خۆری گەلاوێژ ماڵئاوایی لەهەموو لەمیهرەبانی بکات.
بۆنی حەشیشت لێدێت لەنێو نیرگزەجاڕی نێوان مەمـــکەكانت خۆیان نەمر دەکەن به‌بۆنی خۆر، بۆنی خۆری هەڵاتووی نێوەڕاستی مانگی بەفرانبارت لێدێت…
بۆنی سەر جێگا و چەرچەفەکانی هەوەسێکی لەپڕی نەمامێکت لێ دێت، نێوەڕۆیەک پێش ونبوونی، بەگڵی تەڕی مانگی ڕەشەمێ بڵێت؛ ئەم هەمووپڵنگانەی حەز لەبەفری ئەم وەرزەدا سرەوەت ناکرێن… بڵێت؛ پێش ئەوەی لەسەر جێگای ئەو ئافرەتانە سەوز بم خۆشیان ویستووم و لەپێچەکانی بەفردا لەبیرمکردوون، بەهەموو دڵـۆپە ئاوێکی ڕۆژچووی نێوگڵـی مێینە دەڵـێم؛ سەرفرازبن لەنێو ئاهاتی لەپڕدا، سەرمەد بن لەنێو ئاوازی ئەم هەموو خەزانەی فریشتیەک ته‌نیایه‌كانی له‌ئاسمان جێهێشتبوو بۆ دونیای هه‌بوو، بۆ دونیای میترۆ و جه‌نگ و كارگه و ئاره‌قه‌ی سه‌رجێگا و حه‌شیشی شاره‌كان. بۆ جێگای ئەو ئافرەتانەی لەگه‌ڵیدا بوون یان لەخۆڵی نیوەڕۆیەکی خوداوەندێکه‌وه هاتبوون بەقاتێکی سپیەوە، بەگوڵێکی هیلاکی نیوەڕۆیەکی مانگی خەزەڵـوەرەوە لەبەردەم ژووری ژنێكدا ڕاوەستاوە و دەستی لەسەر دڵی داناوە و خۆڵی نێوەڕوانی ئەشقی لێهەڵدەوەرێ…
ئەو ئافرەتانەی بەنێو ژوورەکانی مانگی هەڵاتووی شەوانی ڕۆمانسیەتی لەبیرکراوی سوارچاکەکانی ئەشقێکی کۆنینەی دۆزراوە لەبازاڕی كاپیتاڵدا هاتووچۆیان دەکرد و
وێنەی هەموو ئاشقێکیان پێبوو، تەنهامن نەبێت..
ئەی منداڵ هەموو بونەوەرەکانی ڕۆشنایی ناویان لە بێدەنگیەکانی ئەشقدا تۆمارکرا، تەنها من نەبێت. منێک لەنێو بەردەوامی فریشتیەکی خوماری نێو ڕۆحما نە ژنێک خۆشی ویستم و نە خواوەندێکش بستەجێیەکی لە نەمری پێبەخشیم…
ئاوه‌ها لەنێو ژوورە تەنهاکانی مانگیشدا تەنها خۆم حەشیشم دەکێشا، تەنها خۆم قەسیدەم دەنوسی، تەنها خۆم بەنێو ئاوێنە ڕەشەکانی ئەشقدا دەهاتم و دەچووم،تەنها خۆم ئاوازەکانم دادەنا و خۆشم چەلۆیەکم لەدەنگی ئاو لێدەدا، خۆشم کەمانچەیەکم لەگەڵای ئادەم قەرزدەکرد، خۆشم گوێم لەخۆم دەگرت و خۆشم باسی چیرۆکی ئەو ئەسپانەم بۆخۆم دەکرد شەوانە بەنێو دەشتە بێ سنوورە سپیەکانی خەونمدانەرمەغاریان دەکرد. خۆشم چیرۆکی وڵاتی کەروێشکە مۆرەکانم بۆخۆم دەگێڕایەو خۆشم لەژێر نەزمی ئەو چیرۆکەدا خەوم لێدەکەوت و خۆشم بەخۆمم دەگووت؛شەوباش ئەی خوداوەندی ئاشق ،
شەوباش ئەی فریشتەی خومار،
شەوباش و بەهیوای ئەوەی مندالێک لەخەوندا بەبەردەمتا تێپەڕێت…
ئەڵمانیا نورنبێرگ – مای ٢٠٠١
تابلۆکان؛ هونەرمەندی ئێرلەندی فرەنسیس بەیکن ١٩٠٩ – ١٩٩٥
