ئەزموون

نەژاد عەزیز سورمێ – قەسیدە

نەژاد عەزیز سورمێ
281

ئەزموون

نەژاد عزیز سورمێ

( ئەم ھۆنراوانە دەگونجێ لەگەڵ تاقیکردنەوەی دی وەک (پۆستەرە شیعر) و شێوازی وەک (ھایکۆ– HAIKU)ـەوە پێڵوز بکرێن ..

من بۆ ڕوونکردنەوە دەڵێم : ھیچ کامیان نین ، بەقەد ئەوەی ھەوڵدانێکە لە کێشانی چەند تابلۆیێک  بەھۆیه‌کی

دیکەی دەربڕین..)

 

 

 

ھێلانە

شەباقەی برینە
یا چاڵە خوێنە
یادەمی بورکان .

 

 

(….)

کڵاوڕۆژنەیەکی شیشبەند
چەند تاڵە تیشکێ
مرۆڤێ دەستی بە قاچییەوە گرتووە
سەری بە دیوار ھەڵپەساردووە .

 

 

نەژاد عزیز سورمێ – کۆلاج

ئاواز

پۆلێ گەڵای سەوز

بە ھەوادا دەفڕن
باران نم نم دەبارێ
دنیا بەرگی سپێدەی لەبەردایە .

 

 

 

ستیڵ لایف    

کەلاوەی خانوو
باوڵێ تەنەکە و
لێفەی شڕی لەبیرکراو ..
ئاژاڕی چەند چرۆیەک
بەسەریانەوە بایەقۆش
گۆرانی شێوێندراوی
چاخی تیخبەند ده‌چڕێ .

 درەختێ ڕاقەناو

 

(….)

چاوی سەرسام
چاوی زەق
چاوی نوقاو
چاوی نەرم
چاوی تیژ

نەژاد عزیز سورمێ – کاری شیعری و کۆلاژەکان

کۆمەڵێ چاو
کۆتکێ لەسەری ڕژاوە …

 

 

 

برسیەتی

گوڵەگەنمێ
پەیژەیەکی پێوەنراوه‌
گورگێکی پێ ھەڵدەگەرێ .

 

 

شەوق

نیشانەی پرسیار
بەدەوری دڵێ خوێنی لێ دەتکێ .
ئاسمان گەشە
دەستێ ڕەگی دەرکردووە…

سووتان

دووکەڵێکە
چاو چاو نابینێ
کەویە بەفرێک دەسووتێ.

 

 

ڕوانین

(1)
کۆڵکەدارێکی قەراخ ڕووبار
ژنێکی ڕاکشاوە .

(2)
ئاگرێ دێ
ئاگرێ دەڕوا
بەدوو ئاگر
دنیا تاریک داھاتووە .

(3)
مێزێک
چایەک
پاکەتێ بەغدا
ھەندێ شوێن پێی بچووک و
ھەندێکی دی زەبەللاح …

 

 

دڵنەوایی

کچێ ڕەشپۆش
لەسەر پانیژە وەستاوە
تریفەی مانگ و
ورشەی ئەستێرەی ئاوابوو
کۆ دەکاتەوە.

دیوار

دیوارێ.. دوو دیوار.. دە دیوار
چیمەنتۆبەندەکان ڕووخان
تەنیا دیوارێ قور ماوە

نەڕووخاوە .

 

 

نەژاد عزیز سورمێ – کۆلاج

ئێش

ئاسمان دڕکی لێ دەبارێ
زەوی دڕکی لێ شین دەبێ
خۆرێ دڕکاوی ھەڵاتووە
دڕک.. دڕک
لەھەر چوار لاوە دڕک .

 

 

(….)

لەناو ئەو ھەموو قەڵشت و بۆشاییەدا
کە دەگونجێ بوومەلەرزەیێ
پێکی ھێنابێ
پنتێ سەرەنجت ڕادەکێشێ .

 

 

بروسکە

دوو دەرگا
دەرگایێ داخراو
یەکێ کراوە
تارمایی مرۆڤێکی سەرگەردان .

 

گومان

سێبەری ئەژدیھا
پەڵه‌یەکە ، ڕەش و ناڕێک
بەسەر چەقی دووڕیانەوە .

 

 

سەنگەر

بانێک

بێ کۆڵەگە ، بێ دیوار
بانێک ئاسمانیشی بەسەرەوە نییە .

 

 

زەنگ

ڕەوە مەلێکی بەرزەفڕ
لەشکارتەیێکی ژەنگگرتووی
ئاسمان دەکا .

 

 

(….)

چیایێک خەریکە دەڕمێ
چەند دەستێ سنگی خۆیان داوەتەبەر و
ناھێڵن ..
چەند دەستێ ناھێڵن چیایەک بڕمێ .

 

 

نەژاد عزیز سورمێ – کۆلاج

تونێڵ

چوار بازنەی بچووک
بەدەمی گورگەوە .
چوار بازنەی بچووکی
نێو بازنەیێکی گەورە.
زریزەیێکی ژەنگاوی
لەو ناوە لوولی خواردووە…

 

 

ڕوانین

ھێڵێک ئاسۆی لەباوەشی خۆی گرتووە.
ڕووبارێکە
دەشێ ڕەگی درەختێ بێ
یا ھەر سەراب و ھیچی تر .

 

 

پۆرترێت

کۆمەڵێ جۆگە
دوو کانیی وشک
تیشە بەردێک
سیمایێ ماندوو ،

  دوو باڵی
لەڕاست و چەپدا ڕواوە .

 

 

مانەوە

کۆخێکی بە پێوە ماوی
نێو دڕاڵەی شاخ
شوورەیێکی گڵکۆیینی
بەدەوردا کێشراوە.

 

 

(….)
تەرمێک لەسەر دەم کەوتووە
چرایێک کوژاوەتەوە
درەختێک بەلادا ھاتووە
زەوی و ئاسمان لەیەک نزیک بوونەتەوە.
بارانێ سوور دای کردووە.

1985 – 1986

ئەم قەسیدەیە کاتی خۆی ساڵی 1986 بۆ یەکەمین جار لە گۆڤاری (ڕۆژی کوردستان) كه‌ له‌ به‌غدا له‌ لایه‌ن كۆمه‌ڵه‌ی ڕۆشنبیری كوردی ده‌رده‌چوو بڵاوکراوەتەوە .

 

تایبه‌ت به‌ كولتور مه‌گه‌زین – بیروڕاكانی بابه‌ت و ڕێنوس خاڵبه‌ندی تایبه‌ته‌ به‌نوسه‌ر خۆی. كولتور مه‌گه‌زین. ته‌نها دانانی لینكی بابه‌ت ڕێگه‌پێدراوه‌. هه‌موو په‌ره‌گرافێك و پۆستكردنێك بێ دانانی لینك و ناوی نوسه‌ر و گۆڤاره‌كه‌ دژی یاسای كۆپی ڕایته‌ و لێپێچینه‌وه‌ی یاسایی له‌ دوایه‌. ‌
هاوپۆلی بابه‌ت
error: Content is protected !!