مۆدلیانی ؛ پۆرترێتی خۆی جین هاوژینی - ١٩١٩ Amedeo-Modigliani Portrait-of-Jeanne-Hebuterne-sitting-and Self -Portrait

مۆنیۆمێنتێك بۆ له‌بیرچوونه‌وه‌


Loading

Amedeo Modigliani – Léopold Zborowski -1911/1920 تابلۆی مۆدلیانی؛ مۆدێل – لیۆپۆلد زابرۆڤسكی –

سێبه‌ر و سێبه‌ر

به‌ دوای نیگار

به‌ دوای چاودێرانی ئاگر ..

هه‌وری ئاسندار ..

ژنانی گوێ قوڵاخ

به‌ جه‌وهه‌ری كوێری ڕاهێنراو

به‌ دوای ده‌نگی پێی

ڕه‌خشی به‌جێماو

له‌و ڕێیانه‌ی ،

شارستانه‌تی شه‌ڕ و

شه‌ڕی شارستانه‌تی

تیا به‌رپایه‌ …

         *

ئاده‌میگه‌لی

ده‌ست به‌ به‌ردی ئه‌شكه‌وتان گوراو ..

چاو به‌ به‌فری كوێستان ڕشتوو ..

ئاسمان

بارانی لێ گرتنه‌وه‌

خۆیان له‌ سره‌وتنی كلۆرایی

دره‌خته‌ ڕووته‌كان و

كه‌ناری

چۆم و ڕووباره‌ نه‌قشبه‌ستووه‌كان

بینییه‌وه‌ ..

 

Portrait of his lover Jeanne Hébuterne -1919
مۆدلیانی؛ پۆرترێتی جینی ئه‌شیقی -١٩١٩

ئه‌نكیدۆ

هێشتا له‌ جه‌نگه‌ڵستانه‌ ..

ته‌خت هه‌ڵنه‌نراوه‌

گه‌لگامشی له‌سه‌ر دانیشێ ..

مه‌یخانه‌ ئاوا نه‌كراون

له‌ كونجه‌ تاره‌كانیاندا

بچێته‌ خه‌ڵوه‌تی ئاره‌زووه‌كانی ،

له‌ ناو شكارته‌ هه‌ڵچووه‌كان

ڕێ له‌ پاكیزان ده‌گرێ ..

 

*

بوارێكی سه‌خت

چۆله‌كه‌ شه‌كه‌ت

وه‌ك ئه‌و عاریفانه‌ی

دڕك به‌ گوڵ ده‌بینن ،

به‌ گۆڕاییه‌ به‌ردینه‌كانه‌وه‌ وه‌ربوون

به‌روبوومی ئاسمان

ببه‌نه‌وه‌ هێللانه‌ ،

وێرانه‌یێ جێنیگای

هه‌موومانی پێوه‌یه‌ ..

له‌ یاده‌وه‌ریماندا

به‌ ئێشی ئه‌شكه‌نجه‌دان ده‌چێ

له‌ ڕۆژێكی سڕه‌دا ..

له‌ گه‌ڕانه‌وه‌ بۆ خود

هه‌نگاوی یه‌كه‌می لێ هاوێشترا

یه‌كه‌مین بزه‌ی تیا پشكووت

چاوشاركێ ،

بۆ سێوێك

ژیانی هێنا و

ژیانی برد ..

سترانێكی ته‌واو نه‌كراو ..

ئه‌فسوونێكی باڵ كراوه‌ ..

به‌سه‌ر ڕه‌هایی

كاته‌ پسۆكه‌ وه‌ڕسه‌كاندا

ده‌فڕێ .. ناگه‌ڕێته‌وه‌ ..

*

هه‌ڵه‌مان كرد                                                    

له‌ نانمان زیاتر ویست

هه‌ڵه‌مان كرد پێمان گوتن   

نه‌تانهێشت خۆشمان بوێن ..

هه‌ڵه‌مان كرد

بۆ مه‌وسیمی

چاوغایه‌نیی ، بێ چاندیی ، ژه‌هراوی

نووشتاینه‌وه‌ ..

هه‌ڵه‌مان كرد

نوێژمان ،

به‌ كه‌بارێكی ناوه‌خت  دا ..

Amedeo Modigliani, Reclining Nude, 1919, oil on canvas.
MUSEUM OF MODERN ART, NEW YORK

شه‌پۆلی نوور

قژی كیژه‌ گۆشه‌گیره‌كانی

مه‌ستتر ده‌رده‌خست

سێبه‌ری ژیارێكی به‌ره‌واژ بوو

شه‌به‌نگی به‌ ژاوه‌ژاو به‌خشی ..

ده‌نگی له‌ بێده‌نگی خواست ..

هه‌ڵه‌مان كرد

وه‌نه‌وشه‌ی ته‌لانانمان ڕاوه‌شاند ..

له‌ ئاوی لێڵمان دا ،

له‌ بڕه‌ ڕازاوه‌كان نه‌په‌ڕینه‌وه‌ ..

هه‌ڵه‌مان كرد

هه‌وڵمان دا ،

نووزه‌ی گجووله‌ به‌ره‌ڵڵاكان

تێكه‌ڵ به‌ چینكه‌ و پرووشه‌ی

چۆله‌كان بكه‌ین ..

هه‌ڵه‌مان كرد ..

 

        *

مۆدیلیانی؛ پۆرترێتی جێنی هیبوتێرن- پاریس ١٩١٧- زه‌یتی.
Jeanne Hebuterne with a
necklace, 1917 (oil on canvas), Modigliani, Amedeo (1884-1920)

مۆنیومێنتێك

بۆ هه‌وری ئاسندار

بۆ ژنانی گوێ قوڵاخ

بۆ خۆخواردنه‌وه‌

بۆ باران ،

له‌ پاشماوه‌ی

پێكه‌ به‌ دزی خوراوه‌كان هه‌ڵده‌نێین ..

سه‌مفۆنیای شێتایه‌تییه‌ ،

پرچی پیرۆزگریی ڕاده‌كێشین

نووزه‌ی

تووتكه‌ هه‌تیوكه‌وتووه‌كانمان

 دێته‌ ده‌ست ..

ئاوریشم ،

پۆڵای پێ خوار ده‌كرێته‌وه‌ ..

ئێواره‌ به‌ شه‌تاوێكی تۆزاوی دووگیانه‌

ئاگر جه‌نازه‌ی به‌فری له‌ كۆڵ ناوه‌ ..

ڕووباره‌ كێویه‌كان

ڕێیان ،

له‌ چاوی كوژاوه‌مان گرتووه‌ ..

خوانی شه‌و

سرووتیی ڕه‌هێڵه‌ و گه‌رده‌لووله‌ ..

شه‌هدی مێژوو

به‌ ئاوێنه‌ تڵخه‌كاندا دێته‌ خوارێ

چۆله‌كه‌

گۆڕاییه‌ به‌ردینه‌كان  به‌رناده‌ن !

خاكی پیر

كه‌ جه‌سته‌ی درزبردووی خوێناوی

له‌ خۆرێكی بریندار ده‌چێ

به‌ ئامێزی له‌رزۆكی

ڕه‌شه‌بای له‌ باوه‌ش گرتووه‌ ..

چۆله‌كه‌

گۆڕاییه‌ به‌ردینه‌كان جێناهێڵن!

 

               *

مۆدلیانی ؛ پۆرترێتی خۆی جین هاوژینی – ١٩١٩
Amedeo-Modigliani Portrait-of-Jeanne-Hebuterne-sitting-and Self -Portrait

ئای گۆلی نه‌دیتراو و نه‌بیستراو!

هه‌واری غه‌ریبی !

بانیژه‌ی ئه‌ستێران !

چاوت لێیه‌ .. ؟

به‌دنیهادی   ده‌بینی،                                             

دره‌خشان

دوور له‌ دڵ

نزیك له‌ خوێنی به‌فیڕۆدراو

له‌ودمی ونبوون

له‌ چ سره‌وتنێكی ئارامدایه‌ ؟

كۆخه‌كانی ئومێد

چۆن هه‌ڵده‌درێنه‌ خه‌ره‌نده‌كانی

نۆستالیژیا؟

ڕووتتر ده‌بنه‌وه‌ گوڵه‌گه‌نم

چۆلتر ده‌بنه‌وه‌ خه‌رمان ؟

په‌راوێزێك ،

بۆ خۆدزینه‌وه‌ له‌ ئێش

خۆدزینه‌وه‌ له‌و فرمێسكانه‌ی

شێوه‌ی شه‌ونم ده‌ده‌ن .. نامێنێ ؟

              *

به‌ پێشبینییه‌ك ،

ته‌نیا عاشقان

په‌ی پێ ده‌به‌ن

بێده‌نگی ،

به‌ به‌نگكێشی و

خه‌وی زڕاو و

سۆزانییه‌ سه‌ربڕاوه‌كانی

كووچه‌ و شه‌قامان ده‌شكێنرێ ..

نووزه‌یه‌كی مه‌ست

به‌سه‌ر لمی كه‌ناردا كه‌وتووه‌ ..

باران

كه‌ له‌ شه‌ڕی ئاژاوه‌دا كشاوه‌ته‌وه ،‌

مۆسیقای خه‌مباری

به‌سه‌ر هه‌واری دێرین و

ئه‌و چۆله‌كانه‌ په‌خش ئه‌كا

له‌ گۆڕاییه‌ به‌ردینه‌كان

پرووشه‌ ده‌كه‌ن .       

كانوونی یه‌كه‌م  2017    

 

تایبه‌ت به‌كولتور مه‌گه‌زین –
ڕێنوس و خاڵبه‌ندی تایبه‌ته‌ به‌ نوسه‌ر خۆی.

 

تابلۆكان؛ ئامادیۆ مۆدیلیانی   Amedeo-Modigliani  – ١٨٨٤ لیڤیرینۆ – ١٩٢٠ پاریس.