چنار چیایی؛ گەلەک تشتێن ژ ھەڤ جودا د ناڤ ئێک دانە

Loading

چنار چیایی
چنار چیایی

وەکی ھەر جار پەرتوکا من د دەستێن من دا بوو، خواندنا وێ تامەکا تایبەت ھەبوو بوو، حەزێن و ھەستێن من تێر دکرن، د وێ ئێڤارێ دا من و پەرتوکێ ھەست ب ھەڤدو دکر وەکی چاوان لەش و گیان ھەست ب ھەڤدو دکەن، ب دیتنا من روح و کەلەخ ژ ھەڤدو جودانە، ژ بەرکو ب نێرینێن فەلسەفی روح ب وی رەنگی ل سەر لەشانێن مرۆڤان دابەشبوویە واتە ھە کەلەخەکی روحا خوە ھەیە ئانکو ژ ھەڤ جودانە، لێ ب پیڤەرێ مرۆڤایەتی، وژدانی و بیردانکی ڤە، د شانێن مرۆڤی دایە کۆنترۆلێ ل سەر کار و رەفتارێن خوە بکەت ھۆسا مرۆڤ یان ژی مرۆڤبوون درست دبیت، ئەڤ جوداھیە ژی دھێتە بەراورد کرن د گەل گەلەک بارێن دی دا، بۆ نمونە: د وێ روونشتنا من دگەل خوە کری ئەز پێدڤی کەسەکی بووم د ببۆچوونێن من بگەھیت، دیسان شرۆڤەکرنا خوە بدانیتە ل سەر ھندەک دیتنێن تایبەت ژ بۆ ژ ھەڤجودا کرنا تشتێن د ناڤ ئێک دا، لەورا ب پەیوەندییەکا تەلەفۆنێ من خوە گەھاندە کسەکێ شارەزا د بیاڤێ ھۆنەری دا، ئێکسەر و بێ سلاڤ چوومە د بابەتی دا و من پرسی، چاوا شیوەکارێ داھێنەر و وێنەکێشێ ئاسایی دھێنە ژیکجودا کرن؟ ب گەرمی ئاختنا من ڤەبری و ب ھەستەکێ ھۆنەری چوو شرۆڤەکرنێ و گوتی: تابلۆیێن ھۆنەری، ھەست پێکرنەکە، ژ بەرکو “ئەز رەنگم و ژیان رەنگینە” وێنەکێشێ ئاسایی ھەما دڤێت ب وێنەی پێناسا خۆ یان تشتەکی بکەت چ دبینیت وی ڤەدگۆھێزیت، لێ شێوەکار ئانکۆ داھێنەر پتر ژ دورھێلی خەیالا خوە بکاردئینیت و ھندی کو خەیالێن شێوەکاری بەرتەنگ بیت دھێتە دورھێلی، داھێنەر ھەر تشتەکێ ھەی دەگەل خەیالا خوە تێکەل دکەت و ب فرچە و تبلێن دەستێ خوە وەک خوە وێنە دکەت، براستی شرۆڤەکرنەکا گەلەک جوان بوو، د گەل رۆژئاڤابوونێ من خاترا خوە ژ ھەڤالێ خوە خواست، پەرتوکا خوە ژی یا کو ژ بەر تاریبوونا دنیایێ نەشیم ۆەیڤێن وێ بینم من ل بەر سینگێ خوە گڤاشت، پێن من ژی بەرەڤ مال ڤە برم، لێ برێکێ ڤە من ئێکسەر ھزر د رۆژنامێ دا کر تاکو خواندەڤان ژی بێبەھر نەبن ژ ئەڤ چەندا چێبووی …

 

مافی بڵاوکردنەوە بۆ نوسەر و کولتور مەگەزین پارێزراوە! ڕێنوس و خاڵبەندی تایبەتە بەنوسەر خۆی.
مافی بڵاوکردنەوە بۆ نوسەر و کولتور مەگەزین پارێزراوە!
ڕێنوس و خاڵبەندی تایبەتە بەنوسەر خۆی.