زانا واحید: تێكهەلەك…

Loading

 ڤەجنقى، هندى ل دوورێن خۆ نێڕى،ن ەزانى ئەو دەنگە ژ کیڤە هات… ڕوحەک بوو تێکهەل ژ هەمی تشتێن هەڤدژ، هندەک جاران مرۆڤان هزردکر میوزیکەکە و هندەک جاران وەها دهاتە بەرچاڤ کو جەنگەکە ژبۆ کۆشتنا میوزیکێ. دەما من ئێکەم جار دیتی تێکهەلەک بوو ژ ئاگری و ئاڤێ، ئاگری لەشێ وێ دسۆت و ئاڤێ روحا وێ زیندی دکر. گۆتە من: مرۆڤ حەزدکەن گوهـ ل تشتێن سەیر ببن، لێ دەما تشتێن سەیر دبینن دین دبن، تو دبێژی مرۆڤ هند یێ سەیر بیت دەما خۆ ببینیت دین ببیت و دەما گوهـ ل خۆ ببیت کەیف خوش ببیت!؟

من هزردکر ئەڤە داوی شەڤە ژیان بژیت، هەرتشت یێ سەیر بوو: ستێر ل ئاسمانان مینا شەمالکان لێ دهاتن و هێدی هێدی ڤەدمرین، هەیڤ مینا فریشتەیەکی یا ب پەر بوو و دفڕی، من هزردکر هەیڤێ دڤێت بڕەڤیت، دگەل ڤان هزران من دگەل خۆ گۆت: هەیڤ ژ چ دڕەڤیت؟ دەنگێ کەنی و کزگریۆکا وێ تێکهەلەیە، روحا ل بەرامبەر من تێکهەلی یەک بوو و گۆت: ژ کۆشتنا ستێران ژ وێ تاوانا وێ کری، من بەرسڤا پرسیارا تە دا، لێ تا نها تە بەرسڤا من نەدایە تو دبێژی مرۆڤ هند یێ سەیر بیت!؟

دگەل هندێ بەرزەبوو، مینا وێ دووکێلا بەر ب ئاسمانان دچیت، ئەز بۆ دەمەکێ زۆر چاڤەڕێی وێ بووم لێ من بتنێ مینا سەرابەکێ ددیت، هندەک جاران ل بازاری ب جلێن رەش ب پێش چاڤێن من دکەت و بەرزەدبوو،هندەک جاران ئەز لدیڤ خۆ دوور دبرم، لێ ل داویێ دەردکەت تارماییەک و نەزێدەتر. هندەک شەڤان ژی ب وان جلێن خۆ یێن رەش دهاتە د خەوا من دا و دگۆت: تە بەرسڤا پرسیارا من نەدایە “تو دبێژی مرۆڤ هند یێ سەیر بیت؟”

ئەڤێ پرسیارێ دگوهێن مندا دەنگ ڤەددا، چەندین رۆژا ل جهێ هزرکرنا خۆ من هزر د بەرسڤا وێ پرسیارێ دا دکر، لێ رۆژەکێ بایەکێ دژوار بەر ب باژاری هات و دگەل خۆ توزا بیابانێ ئینا، ل دەف من ئەو توز تێکهەلی بای بوو و روخسارێ وێ دروستکر، ئەڤجارە تێکەلەک بوو ژ توزێ و بای ئێکسەر ل تەنشت من روونشت و گۆت: لەشێ من هەمی توزە و یێ د بن پێن هەمی مرۆڤان دا و روحا من بایە و ل چ جهان ناراوەستیت، لەو بەری روحا من ژڤێرە بچیت و لەشێ من دبن پێن مرۆڤەکی ڤە پیس ببیت بەرسڤا پرسیارا من بدە: “تو بێژی مرۆڤ هند یێ سەیر بیت؟”

 Artist; Saman Dartash Kareem
Artist; Saman Dartash Kareem

ئەز دترسیام جارەکا دی بەرزە ببیت لەو ئێکسەر من گۆت: ئەڤە چەندین شەڤە ئەز هزرێن خۆ د وێ پرسیارێ دا دکەم لێ نها بەرسڤا من بەلێ یە، ئەرێ بەلێ، ئەز هزردکەم مرۆڤ ب درێژاهییا ژیێ خۆ هەمی تشتان دبینیت بتنێ خۆ نابینیت لەو دەما خۆ دبینیت دین دبیت، لێ دەما گوهـ ل خۆ دبیت کەیف خۆش دبیت چونکە دژیانێ دا گوهـ ل هەرتشتی دبیت بتنێ گوهـ ل خۆ نابیت. رەنگە ئەڤە سەیرترین تشت بیت ل ژیانێ روی بدەت، یان سەیرترین تشت ئەو بیت دەما رۆژەکێ مرۆڤ مینا هەیڤا وێ شەڤێ ژ تاوانێن خۆ برەڤیت و نەراوەستیت، هەر بچیت و نەگەهیتە چ داویان تا ماندی دبیت و خۆ دناڤ دەستێن تاوانێن خۆدا دبینیت. پشتی ڤێ بەرسڤێ، خۆ درێژکرە سەر ئەردی لەشێ وێ یێ توز تێکهەلی توزا ئەردی بوو و دەنگەک ژێ دەرکەڤت، گۆت: نەخێر مرۆڤ چ جاران مینا هەیڤا وێ شەڤێ ژ تاوانێن خۆ نارەڤیت، چونکە هەمی مرۆڤ دبێ گونەهن لێ یێن دناڤ دەستێن هەمی گونەهان دا، لەو هندک جاران دلۆڤانیا وان ژبیرا وان دچیت و دبنە مرۆڤێن شەرانگێز، تاوانان دکەن، خوینێ درژن، جوانیێ پیس دکەن، لێ تە پشت راست دکەم دەما تو ل دویڤ بچی دێ بینی هەرتشت ژ دەرڤەی خواستنا وی یێ روو دای و وی ئاگەهـ ژێ نینە، لەوما هەمی مرۆڤ پشتی ئەنجامدانا تاوانێن خۆ پووشمان دبن.

ئەز گەلەک دترسیام، جار ژ خۆ، جار ژ بەرزەبونا وێ، لەشێ من دلەرزی، هندەک جاران من ساردبوو و هندەک جاران گەرم. بەرسڤێن وێ نەگۆتنێن مرۆڤێن ئاسایی بوون، لەو من دڤیا بزانم ئەو کیە؟ چەوان تێکهەلەکە ژ هەرتشتی؟ بۆچی ل دوور من دزڤڕیت و پرسیارێن سەیر ژمن دکەت؟ دگەل وێ ترسا دژوار و ڤان پرسیارێن گرنگ من گۆتێ: تۆ کی؟ بەری هەمی پرسیارێن دی ژێ بکەم تۆزا لەشێ وێ ژناڤ ئەردی دەرکەڤت و ب رەخەکی چوو و بایێ روحا وێ ب رەخەکێ دی، دیسان بەرزەبوو… پشتی بەرزەبونا ئەز ل نەخۆشخانەیا دینان هوشیاربووم هەردەم من بەرسڤا پرسیارێن “وێ تێکهەلەیا روحا بەرزە” دگەل خۆ دگۆتن، جار ژی دەما ئەزێ نڤستی من گۆتنێن وێ دوبارە دکرن.

لێ ئەڤرۆ من دڤیا بێژمە هەوە ئەز نەیێ دین بووم لێ ئەڤا روودای راستیەکە، چونکی شەڤا دی ئەو تێکهەلەیا روحا بەرزە ژ ناڤ من دەرکەڤت، ئەڤ جارە تێکهەلەیەک بوو ژ مرۆڤ و فریشتەیان، گۆتە من: چونکی مرۆڤ خۆ ژبیر دکەن ئەو پارچەیێن روحا وان یێن بەرزە ژ بەر بتەنێبوونا خۆ تۆرەدبن و دەردکەڤن، و دەما مرۆڤ وان پارچەیێن بەرزە دبینیت دین دبیت، ئەز ژی ئەو پارچەیا روحا تە یا ڤەشارتی بووم و ژ بەر وێ بێزاریا من دناڤ ناخێ تە دا دیتی ئەز دەرکەڤتم و دەما من خۆ نیشا تەدای تۆ دین بوی، لێ باش بزانە تۆ تێکهەلەکی ژ هەر تشتی، تێکهەلەکی ژ ئاگری و ئاڤێ، جار تێکەلهەکی ژ فریشتەیان، جار ژی نیڤەکا تە تۆزە و نیڤا دی ژی بااااااا… کەیفا من گەلەک ب داوی رستەیێن وێ هاتن، چونکی من زانی بۆچی دەما مرۆڤ خۆ دبینن دین دبن، و دەما گوهـ ل خۆ دبن کەیف خۆش دبن. ئەڤە چەندین جارە ئەز ڤێ راستیێ بو نۆشدارێ خۆ یێ دەروونی دبێژم لێ باوەر ژ من ناکەت چونکە ئەز نەشێم بەرسڤا پرسیارەکا وی بدەم، هەردەم نۆشدارێ من دبێژیت: تو دبێژی مرۆڤ هوسا د سەیر بن؟