بیرا من دهێت هەر ژ زاروکینیێ وەرە، دەما دایکا من دەستێ من دگرت و ئەز ل کولانێن باژێری د گێراندم. هەمی دەمان بو من بەحسا جوانیا پەنجەران دکر. تاوی رادەیی پەنجەرەیەک ل کولانا مە نەمابوو من خەون پێڤە نەدیتین و من هیڤی نەخواستی روژەک ژ روژان من خو د وێ پەنجەرەیێ دا دیتبا.
دایکا من ئەز فێرکربووم، دهەر دەرگەهەکی دا بوخو پەنجەرەیەکێ دروست بکەم، پەنجەرەیێن بچویک …بچویک. هەمی دەمان دگوتە من پەنجەرێن بچویک هەمی دەمان د پرن. کیژ جارێ تە دەرگەهەکێ تژی دیتیە؟ لێ کێم جارا تە یا دیتی پەنجەرەک یا ڤالا ژ گولەکێ ژ پەلاتینکەکێ ژ گوسکەکی ژ زاروکەکێ رویس یێ دایکا وی نەهێلت بچیت کولانێ …
من ژی د وان دەرگەهان دا پەنجەرێن جوان د سەرێ خو دا دروست دکرن. هەر دەرگەهەکێ جارەکێ ژ جاران کەفتبا بەر سینگێ من من وێنەیێ پەنجەرەکێ تێدا دروست دکر. کا چەوان هەمی شەڤان دایکا من ل هنداڤ سەرێ من ب ڤەگێرانا چیروکەکێ پەنجەرەک ژ بو من دروست دکر.
زوربەیا وان چیروکێن دایکا من بومن دگوتن و ئەو پەنجەرێن وێ بومن دروست دکرن د پر بوون ژ چاڤەرێبوونێ، د پر بوون ژ وان ژنێن هەمی دەمان ل هیڤیا کەسەکی کو بهێت و نەهاتی. ل بەندا بایەکی کو ل پرچا وان بدەت و لێ نەدایی. گەلەک جاران دایکا من چیروکەک دوبارەدکر، چیروکا وی سەربازێ دەما ژ مال دەرکەفتی، هەڤژینا وی رستکەکا ب باهیڤان هاتیە دروست کرن ل ستویی کری و گوتیێ ئەڤە دێ بەختەوەریێ دەتە تە، لێ چ جاران من نەدزانی ئەو چیروک، چیروکا بابێ من بوو. چ جاران من نەدزانی ئەو ئێکەم دەرگەه بوو دایکا من نەدشیا چ پەنجەران تێدا دروست بکەت، کو ئەز ل پشت دەرگەهی نەبینم ….
دایکا من ئەز ب وی رەنگی تێگەهاند بووم، کو بابێ من یێ چوویی بومە مالەکا جوانتر دروست بکەت. بیرا من دهێت دەما ئێکەم باران ل پایزا دهات و من دگوتە دایکا خو، دادێ بێهنا ڤێ ئاخێ گەلەک یا خوشە، دگوتە من ئەو بێهنا مالا مەیە، بابێ تە یێ نێزیک بویی و مالا مە یا نویی یا د گەل خو ئینایی.
چ ژ ڤان پەنجەرەییان دبێ ئازار نینن، لێ نزانم بوچی هەر جارەکا دایکا من بومن بەحسا ڤان پەنجەرەییان دکر. من هەست ب جوانی و روحا وان دکر…
مروڤ نەشێت د پەنجەرەییان دا جەنگێ پەیدا بکەت، لێ دشێت دهەر پەنجەرەیەکێ دا جەنگەکێ ببینیت، کاچەوان من دهەر پەنجەرەکێ دا ل کولانا مە جەنگەک ددیت ….