ژنەک، دژوورا جوانکاریێ ڤە!

Loading

ژدەرڤە شەڤەک بالکێش بوو.. دەنگێ مەزیقەیەکا نزم ژ ژوورا جوانکاریێ دھات، ئەو مەزیقەیا کۆ وێ حەزکرنەکا مەزن بۆ ھەی و بیرا وێ دھاتە تەمەنێ وێ یێ جوانیێ، یان ژی وی تاکە زەلامێ کۆ روحا وێ داگیرکری ب نەرینێن خوە یێن ئەفسونی.تەماشەی وان ھەموو مرۆڤان کر یێن کۆ ژدەرڤە دھاتن و دچوون، ھەست پێکر کۆ ھەر ئێکێ بێھنا کەسەک دی پێڤە بیت، ھەر یەک ژوان دێ وەک وێ ل قولاچەکێ روینیت و خوەلیا ھەموو یادگارێن خوە یێن جوان ب سەرێ خوە وەرکەت. ل وێ دوماھیا شەڤێ، پشتی کۆ ئەو ب تەنێ مای، ھێدی ھێدی ماسکارا خوە ژێبر، سوراڤا خوە ژێبر، گوھارێن خوە ئێخستن و دلەک ل دلێ خوە ددا.. “زەلامێ شارەزا ماچا خوە ددانیت بن گوھێ ژنێ” ب نازداری دەستێ خوە دپۆرا خوەیا زەر دا ئینا و ھەروەکی کۆ دەنگەک جودا گۆە لێ ببیت، کو بۆ یەکەم جارە ژ رۆحا وێ یا تژی مێیاتی بھێت، وێ دزانی ژبەر کەنیا رۆژێن خوە یێن سەربەردای، وێ جارەکێ ئاگەە ژ دەنگێ ناخێ خوە نەببوو، ژبەرھندێ ئەڤ شەڤە تێرا ھەموو سالێن دەربازبووی یا گۆھداریا دلێ خوە دکەت …

رزگار سوبحی
رزگار سوبحی

” من ژی نەشیا بۆ خوە چ بکەم، خوە من نەکاری زەلامەکی ب تەنێ ژی بھێلم باوەشا خوە، زەلامەک کۆ وەک ژنەک ھەست ب من بکەت!” دزانیت کۆ ئەو پتریا تەمەنێ خوە ھەڤالا خوەدیکێ بوو، مینا کۆ ھەموو تەمەنێ خوە دابیت نازداریێن خوە یێن بچووک. ژوورا وێ یا جوانکاریێ ھەموو نھێنیێن وێ یێن روویس ھەلگرت بوون، ب تایبەت شەڤێن سۆرێن کۆ وێ ب تەنێ دەربارەی وان دزانین. تەماشەی دێمێ خوە یێ خەمگین کر.. دەستێ خوە ب تشتێن سەر مێزێ دا ئینا، دەستێ وێ ئێک ژوان نەگرت..

” ئێدی شە و خوەدیک و ھەموو دەرمانێن جوانکاریێ ژی نکارن ھندەک ژ جوانی و نازکیا من بزڤڕینن ڤە.. خوە خودێ ژی ڕێ نەدایە تشتەک بزڤڕیتەڤە!..”

وی دەمی خەریبی ژ چاڤێن وێ درژیت، مینا باژێرەکێ کەڤن یێ کۆ کەس لێ نە، یێ کۆ ھەموو ب دفنبلندی تێدا ژیاین و چووین، لێ شوون تبلێن ھزارەھا یادگاران لێ بوون، ھەر جارەکا تبلا خوە نێزی تشتەکی کربا روحێ وێ ل ھەموو ژوورێ دکرە کەنی. یێ کۆ ل چاڤێن وێ تەماشەکر با، دا زانیت وێ گەلەک ژدەستدایە. وێ ھزارەھا دەست گرتینە دا کۆ بتەنێ نەبن، لێ ئیرو دەستەک نینە، دەستێ وێ بگریت دا کۆ ب تەنێ نەبیت.

دوو سێ جار پرچا خوە ئینا و بر، نەکاری شێوەیەکێ ب دلێ خوە بۆ پرچاخوە دانیت. وێ دزانی دگەل بورینا دەمی، دگەل نەزڤڕینا مرۆڤان بۆ باوەشا وێ ڤە، دێ پر تشتان ژ دەست دەت، بۆ نموونە ژدەستدانا چێژێ، چێژا ھەستپێنەکرنا ھەموو تشتێن دەردورا خوە، ھەستپێنەکرنا ئەو داوی رۆناھیا رەنگدارا ل ئاڤابوونێ دمینیت، ئاخ .. ئێڤار چەند دمەک تایبەت بوو بۆ وێ.. ب چاڤان دبیرەھی یێن خوە دا چوو..

” ئەز ژنەک بووم، دەمەکی ھەموو زەلام بۆ من دکەتن سەر چووکان، ئەز ھەموو چێژ و خوەشیا وان بووم!..

بۆچی ئەز ب ڤی رەنگی ھەست ب سووتنا ناخێ خوە بکەم؟ بۆچی ئەز ب ڤی رەنگی ھەست ب نەبوونێ بکەم؟”

وی دەمی وێ تەماشەی قورمچینا دێمێ خوە یێ تژی بیرەوەری دکر، دەمەکی کەربەکا ژنانە گرت و دەستێ خوە ل وێنەیێ یەکێ خوە یێ ل سەر مێزێ دا و ل عەردی دا، دوێنەی دا دناڤ کومەکا زەلامێن ماقوویل دا مینا ژنەک بوھا گران دکەنی، وی چاخی مینا ژنەک شکەستی دھەموو ھەڤرکیێن ژیانێ دا سەرێ خوە دانا سەر لێڤا مێزێ و ب دلەکێ خەمگین..

” ماقەی وێنە تەنێ بۆ ھندێ نە، رۆژەکێ بێژنە مرۆڤی تو چ نینی!”

ھەر تشتێ دەردوورا وێ ھەست ب ڤێ ئێشانا وێ یا ژنانەکر، ھەر تشتێ وەختەکی رۆل دجوانی و بالکێشیا وێ دا ھەبووی، لێ ئێدی ئەو یا نەفرەتان ل وان ھەموو تشتان دکەت، ھەروەکی وان تشتان دەست دخاپاندنا وێ دا ھەبیت، ئەو ئەگەربووینە کۆ تا ڤی تەمەنی وێ ھەست ب بێنا زەلامەکێ راستەقینە نەکریە، وێ ھەست ب بێنا زارۆیەکی ژ گیانێ خوە ل ناڤ دەستێن خوە یێن نەرم نەکریە!.. “ئاخ.. کەس نزانیت بۆ ژنێ ئەڤ ھەستە یێ چەوایە”.. ھینا سەرێ وێ لسەر مێزێ بوو و ب دلەکێ تژی تێدا تشتێن نەگۆتی، سەرێ خوە بلندکر و ب ھێسر ل خوەدیکێ تەماشەکر: ” تە یاریێن خوە ب من کرن یان ژی من یاری ب خوە کرن؟ بێژەمن کیژان ژمە حەقیقەت بوو؟ ئەزیان ژی تو؟ یان ژی ئەم ھەردوو خەیالێن خوەش بووین؟”

ھێژ پرچا وێ چێژا رۆژێن جارا پێڤەبوو، ھێژ رۆحەکا نەپەن ددێمێ یێ قورمچی دا مابوو، لێ وێ دزانی چ جھان ناگریت. ھێدی ھێدی کومەکا رۆندکان کلێ چاڤێن وێ ب رۆیێ وێ دائینا، ب دەنگەکێ تژی گری..

” ھندە سال بوو سۆراڤامن ھەموو تشتێن کۆ دڤیابا من گۆت بان دبن خوەڤە دھلگرتن، ئێدی کەس نینە دەمەکی بدەتە گۆتنێن دلێ من یێن بچوویک !..ھەموو یان حەز ژ گۆتنێن من یێن بیست سالیێ دکر، چونکی حەز ژ لەشێ من یێ بیست سالی دکر.. لێ ئێدی کەس حەز ژ گۆتنێن من یێن پێنجی سالی ناکەت، چونکی حەز ژ لەشێ من یێ پێنجی سالی ناکەن!..مرۆڤ چەندێ بێ بوھایە.. ئەو دەمێ کۆ تێدگەھیت بۆھا چی یە؟ ”

دخوەدیکێ ڕا، چاڤێ وێ ب وان جووتێن کورسی یێن سۆر کەڤت، ئەوێن ل پشت وێ ددیار، لەرزینەکا عاشقانە لەش و لارێ وێ گرت، سینگێ وێ تژی دووراتی بوو و ددلێ خوەداچوو:

” چەنداخوەش بوو، ھەکو وی تاکە زەلامێ ئەز ب راستی لێ عاشق بوویم، چاڤێن من گرتین و ئەز ددەرگەھی ڕا ئینایم ژوورێ و گوتیە من روونە سەر کورسیێ و پاش گۆتی چاڤێن خوەڤەکە و من جووتەکێ شەمالان لسەر مێزێ دیتی و کێکەک کۆ ناڤێ من و رۆژبوونا من ل سەر بوو و تاکە ماچا نھێنی یا جوان ھێلایە بەر لێڤامن یا کۆ جھێ ھزارەھا لێڤا لێ، لێ وێ شەڤێ وێ ماچێ ھەموو میژوویا من یا بێ بوھا یا بەری ھینگێ شوویشت. وێ شەڤێ ئەز چەند ژنەکا دلخوەش بووم، نەخێر.. دراستی دا ئەز دلخوەشترین ژنا دونیایێ بووم.. لێ من ئەو زەلامێ راستەقینە ژی کرە گوری دلچوونێن خوە یێن بێ بوھا، غرورا جوانیێ یا دڕندە ئەز خوارم..! نھا کەس ژمن تاکەنەتر نینە، ھەتا من کەرب ژ ھەموو تشتێن جووت ڤەدبن و ئەو خوەدایێ دبێژیت خوە تاکەنە و من چ جار حەزکرن بوو وی نەبوویی، نھا تەنھا تشتەکە کۆ جھێ خوە ل ناخێ من دکەت، تەنێ چونکی وەک من یێ بتەنێ یە!”

دخوەدیکێ ڕا، ب ھەموو ڕامانان خوە وەک ژنەکا ھەموو مێیاتیا خوە دا بیت یێن دی، دیت. ھەروەکی خوە بۆ زەلامەکی ژی نەمابیت یادگارەک، ھەروەکی ل ناڤ تاریاتیەکێ ل پشت خوە بزڤڕیت و تشتەک ژی ل پشت وێ مینا ستێرەکێ نەبرسقیت. ژبلی وێ ھەر تشتێ دەردورا وێ ھەست پێدکر، کۆ ئەڤ شەڤە ئەو یا بریارەکا بێ دلۆڤانی ددەت. وەختەکی ژوورا جوانکاریێ تاری بوو، دەنگێ مەزیقێ قوت بوو، دەنگێ شکەستنا ھندەک تشتان ھات. پشتی چەند خولەکەکان، رۆناھی زڤڕی ژوورێ ڤە،دیسان دەنگێ مەزیقێ ژی. خوەدیک پرت پرت ببوو، سۆراڤ و ئالاڤێن جوانکاریێ ھەموو ل عەردی بوون.پرچەکا زەر بژالە ببوو وێرێ، چەند دەنگێ مەزیقێ بلندتر لێدھات، دەنگێ بیرەوەریێن چەند سالا یێن وێ ژوورێ ڤەددا، دەنگێ وێ ھەموو کەنیا دبەر خوەجوانکرنێ ڕا، دەنگێ وان ھەموو پستەپست و سوحبەتێن بەر گۆھا یێن دەربارەی چاڤ حیزیێن وان ھەموو زەلامێن جوانێن ل وێ دنێڕی..دوێ ژوورێ دا تەنێ تشتەک مابوو..بیرەوەری..ئەرێ ب تنێ بیرەوەری..!

 

رزگار سوبحی 

بھارا ٢٠١٦ دھوک

 

تایبه‌ت به‌ كولتور مه‌گه‌زین ڕێنوس و خاڵبه‌ندی تایبه‌ته‌ به‌نوسه‌ر خۆی - مافی بڵاوكردنه‌وه‌ بۆ نوسه‌ر و كولتور مه‌گه‌زین پارێزراوه‌
تایبه‌ت به‌ كولتور مه‌گه‌زین
ڕێنوس و خاڵبه‌ندی تایبه‌ته‌ به‌نوسه‌ر خۆی – مافی بڵاوكردنه‌وه‌ بۆ نوسه‌ر و كولتور مه‌گه‌زین پارێزراوه‌