دەبینم تەنها دوو ڕۆژ نابێت پێشمەرگە پیشڕەوی کردووە، دەیان گەنجانمان لەم شەڕەدا کەوتن، کەچی سەرکردەی ناسەرکردەی کوردی خەریکە دەمانفرۆشن بەحکومەتی مەرکەزی ئێراقی! وەها هەستدەکەم دووبارە فرۆشراین بەگەمەیەکی ناشرین لەپێناو زامنکردنی بەرژەوەندی سامانی کۆمەڵیک سەرکردەی ناسەرکردەی فاشیلی ئەم دەڤەرە… پڕبەدڵ هیوام وەهایە هەڵەبم !
سەیرە (سوپای ئیراقی تائیفی) یەک شەڕ چییە نەیکردووە، یەک پێشڕەوی چییە نەیکردووە، یەک سەرکەوتنی دیاری نییە بەعەمەلی لەسەر گۆرەپانەکە. ئەوەی لەجیاتی ئەوان شەڕدەکات و بۆ سوپاکەی ئێراق هەژماردەکریت پیشمەرگەیە. کامە گۆڤاری ئینگلیزی یان ئەڵمانی تەنانەت عەرەبی دەخوێنمەوە هێزی پیشمەرگە وەک فیرقەیەکی لاکەوتەی سوپای ئێراقی ناودەبریت، بەمانای ناونابرێت، ناو تەنها ناوی سوپای ئێراقە یان حەشدی شەعبیە . تەنانەت دکتۆرە زمانزانە، کوردە، پارەخۆرە، خاوەن بڕوانامەکانی ئینگلتەراو ئەمریکا و ئەوروپا، لەتیڤیە بیانیەکان خۆیان لەناوی پێشمەرگە گێلدەکەن. ئاوەها ئەم سەرکەوتنە تا ئەمڕۆ چۆتە گیرفانی عەبادی و حکومەتە تائیفیەکەیەوە.
بەداخەوە دووڕۆژە دەیان گەنجانمان لەم شەڕەدا دەکەون یان بەسەختی برینداردەبن، ئەوانە بێگومان وەک مرۆڤیکی ئازاد کەوتن* و مێژووی میللەتی ئێمە جودایان دەکاتەوە لەقەرەقۆزە ناشرینەکان، کەبەناوی ئەوانەوە مەدالیا دەکەن بەسنگیاندا، مێژووی دونیا ئەم ڕاستیە سادەیە لێکجودا دەکاتەوە .
ئاوەها، پێدەچیت دەستکەوتەکان لەلایەن سەرۆک و بەناو سەکردەکانەوە بخریتە سەر سینیەک بۆ عەبادی و سوپاکەی بەرامبەر ڕێکەوتنی تازە بۆ خۆیان و خیزانەکانیان. دیارە بێ مووچەیی و نەگبەتی بۆ مامۆستا و پێشمەرگە و خانەنشین و کەمئەندامان دەمێنیتەوە. هەروەها نۆ هەزار داعش بەتازەترین ئۆتۆمبیل بەرەو سوریا موسڵ جێدێڵن بۆ کوشتنی براکانمان لە ڕۆژئاوا.
بۆچی کورد وەها لەخۆی دەکات؟ هەستیکی تاڵە یاران دووبارە مێژوو ببینیتەوە، نەک گاڵتەجاڕانە، بەڵام ئاوەها سووک و چروکانە لەمیرەکانی کوردا خۆی دووبارە بکاتەوە …هەستیکی ئێجگار تاڵە و هەناومان دەخوات …
تەواو
- تێبینی؛ وشەی (کەوتن) لەجیاتی (شەهید ) بەکاردێنم کەمۆرکێکی ئاینی هەیە. لەزۆر کولتوری وڵاتاندا وەک ئەڵمان و تەنانەت ئینگلیز لەزۆرشویندا وشەی (کەوتن لەشەڕدا) بەکاردێنن و لەزۆر شوینی وەهادا کەمرۆڤ تێدەکەویت ، تەنانەت ئینگلیز ناڵیت ئاشق بوو ، دەڵیت کەوتە نێو ئەشقەوە ، لەزمانی عەرەبیشدا کەوتن لەشەڕدا یان لە خۆشەویستیدا بەکاردێت، بەڵام عەرەب ناوە ئیسلامیە قورئانیەکەی وەک شوناس پێ باشترە. لەکوردیشدا کاتیک دەڵین فڵان کەوت لەشەڕدا هەمان مانا قووڵەکەی دەپێکیت.