( كورته چيرِوک)
ئەحمەد جاسم
دین دبم، دەما هندەک تشتان دبینم جهێ پرسیارکرنێ نە و ژبیردکەم دەربارەى وان تشتان بپرسم، ئەو خانیکێ
کاڤل یێ دکەڤیتە ئالیێ رۆژهەلاتا باژارى هەردەم بۆ من بوویە جهێ راوەستانێ کانێ بۆچى کەس د وى خانیکى ڤە ناژیت؟ ئەگەر خوەدان ژدەرڤەى ولاتى یە بۆچیبۆ خوە نادەتە ب کرێ ومفاى ژێ وەربگریت؟ ئەگەر خەلکێ ڤێرێ یە ژخوە جهێ ڤى خانى جهەکێ زێدە ئیستراتیجى یە و ئەردێ وى بەرفرەهە. چ جار خانیێن ب ڤى شێوەى ل ڤى باژارێ تێر شوقە بدەست ناکەڤن. هەڤالەکێ من خەلکێ وى تاخى یە پشتى من دەربارەى ڤى خانى پرسیار ژێکرین، دەڤێ وى تێک ئالوزى؛ دەما گۆتییە من :
– برا بخودێ نزا چ بێژم… ماتو بۆ چی دبێژیە من؟
– ئەو خانى یێ ل تاخێ وە قەت بەرعەقل نینە تو چ ژێ نەزانى؟
نزا بۆچی من هەست کر ئەو تشتەکى دزانیت. لێڤا وى دلەرزى، دێمێ وى زەر بوو، چاڤێن وى دکرنە هەوار کو ئەو تشتەکى دزانیت، لێ نهێنینە ونەڤێت بۆ کەسێ ببێژیت، پاشی بەرێ خوە دا من و وەکى هەر جار هەکو دڤێت سوحبەتەکێ تێببەت گۆت: برا سوبە ئێڤارییەکا درەنگ دێ هەر هێیە دەڤمن و پێکڤە چینە چایخانێ، پاشی دێ بۆ تە سوحبەتێ کەم .
وى هزرکر هەگەر ئەز هاتم وەکى سوحبەتێن دى، دێ ڤێ سوحبەتێ ژبیرکەم.
هێش بدروستى نەببوو ئێڤار؛ من بەرێ خوە دا تاخێ رۆژهەلاتا باژارى، هەر چەندە من نەڤیا خوە نێزیکى مالێ بکەم دا چ گۆمان بۆ خەلکى چێنەبن، لێ ئەز نەشیامە خوە و من خوە نێزیک کر. ژبەرکو دەرگەهێ نزم بوو؛ ئەز دشیام ب سەرێ تبلێن پیا پیچەکێ خوە بلند کەم و سەحکەمە ژ ناڤدا، روخسارێ ڤى خانى ژناڤدا گەلەک یێ بترس بوو، من هزرکر کومارا تەڤەنپیرکا ل ڤێرە یا هاتیە راگەهاندن، ژبلى کو شینکاتى د بەر پەنجەرا را شین ببوو و مێوا ناڤ حەوشێ تایێن خوە ل دوورماندوورى پەنجەرێن مالێ ئالاندبوون. بڤى دیمەنى بیرا من ل فلمێن ترسێ دهات و من د دلێ خوە دا گۆت: هەگەر دەرهێنەرەکێ هولیوودێ بڤێت فلمەکێ ترسێ چێبکەت ئەڤ خانیە دێ دیکورى ژ وى ڤەکەت و دێ جوانتر بیت ژ دیکورەکێ دەستکار ژبەرکو ئەڤە حەقیقەتە.
دڤان دالغە وهزر وبیران دا زڤڕیم و من دیت پیرەمێرەک یێ ل بەر دەرێ مالا خوە و رک و رک یێ سەحدکەتە من، چ جار هوسا یێ زڕ شەرم نەبوویمە لێ نزا وێ رۆژێ چ ل من هاتبوو، هەر زوى، بێ شەرم چوومە دەڤ وى و پرسا خانی ژێکر، ئەوى هزردکر من بۆ کرێیێ دڤیا، لێ پشتى پرسیارا من،ئێکسەر وى زانى من چ دڤێت و هەچکو دڤیا سوحبەتەکێ بکەت خوە هەگەر ل سەر چ بیت .
– مامو خولام ئەجنە یێ دڤى خانیڤە و چ جار هوسا خوە نێزیک نەکە.
من نەڤیا هەر زوو باوەریێ پێ نەئینم، ژبەرکو گەلەک جاران پشتراستییا من ژ زانستى بوویە ئەگەرێ ڤێ چەندێ چ ژ جیهانا ئەجنان نەزانم و خوە ژ سوحبەتێن وان دوورکەم، من ژى مامو دابەر ئاخفتنێ
- مام ئەجنە چەوا هاتنە ڤێرێ؟
تسبیێن خوە ئینانەدەر و پەرخاندن، من ژى نەکرە نە مەردى و روونشتمە ل سەر بلوکێ برەخ بەردەرگەهێ مالا وى و دەستهاڤێتە سوحبەتێ.
– مام بەرى نوکە پیرەژنەک وپیرمێرەک دڤى خانیکى ڤە د ژیان، پشتى مرین نزا برازاییەکێ پیرەژنێ ژ کیڤە دەرکەت و گۆت ئەڤ خانیکە بۆ من یێ ماى، هەیامەکى مابووڤالا، د وى هەیامى دا ژنێن تاخى دگۆت ب شەڤێ دەنگێ بچیکان ژ ڤى خانى دهێت و تو دزانى ئخبارێت ژنان زووتر ژ یێن تێلەڤزیونێ دەنگڤەددەن، پاشى برازایێ وێ ڕەحمەتیێ ڤیا خانى بدەتە ب کرێ، چەند ئێک هاتبا دا هەر زووى رۆژا پاشتر خەلکێ تاخى وى ئاگەهدارکەن کو ئەجنە یێن تێڤە، رۆژەکێ ئێکى ئەو خانى گرت و گوهـ نەدا گۆتنێن خەلکى، کابرا شوفێرێ ترۆمبێلەکا بارهەلگر بوو، سپێدێ گەلەک زوى هندەک تشت و مشتێت مالێ ڤەگوهاستن و پاش ئەم ئاگەهدارکرین کو دێ حەفتیەکا دى هێتە دخانیڤە و بیتە جیرانێ مە. دەمێ ڤەگوهاستنا تشتێن مالا وى بداوى هاتى و خێزانا خوە ئیناى دا ل وى خانیکى بژین، بچیکێن وى علکەکێ مەزن بجهەکێ دیارێ تەختێ نڤستنێ ڤە دیت، هەر زوو بچیکێن وى گۆتێ: ئەم نامینینە ل ڤى خانى، ئەجنە یێن د ڤی خانیڤە.
نزا بۆ چی سوحبەتا ماموى هند نەچوود مێشکێ من دا، ددەمەکى دا دزانم مرۆڤەکێ دانعەمرە و بزەحمەتە بۆ ئێکێ تەمەت وى موبالغێ دسوحبەتان دا بکەت. هەر زوو من خاترا خوە ژ ماموى خواست و چوومە دەڤ دەستە برایێ خوە ، گه‌له‌ك ما حێبه‌تى ده‌ما زانى من بابه‌تێ دوهى ژبيرنه‌كريه ، من نەچار کر ب چ بوهایێ هەبیت وێ سوحبەتێ بۆ من بکەت، وى ژى چ پێنەما و تیرکێ خوە ڤال کر .
– برا پشتى پیرەژن و پیرەمێر مرین ، ئەڤ خانیە بو جهێ ژڤانێن من وکچەکا جیرانامە، دیوارێ بانێ وان و یێ وى خانیێ چول پێکڤە دنوسیاینە. گەلەک درێژ ناکەم، نەشەڤەک ودو و سێ، ماوێ چەند هەیڤەکان هەگەر هەر شەڤ نەچووباینە د وى خانیکى ڤە هەر شەڤەکێ نە ئێکى دچووین، جارەکێ چوومە وێرێ ل دویڤ ژڤانێ خوە سەحکەمێ دوستا من نەهاتیە، ئەز چوومە سەربانى من دیت یا ل بەر دیوارى ل هیڤییا من و دترسیت، گۆتە من: تشتەکێ سەیر یێ ل ڤى جهى چێبووى، تەخت وتشت یێن تێڤە و ئەز نەوێرم بهێم، دترسم ئەجنە بهێنە مە. پاش ئەم چوین من سەحکرێ ئەوا وێ گۆتى دروستبوو، لێ ئەز دکەلەکا شەهوەتێ دا بووم، من ب چ ڤە وەرنە گرت، برایێ تە نەکرە نەمەردى و درێژکرە سەر وى تەختێ ئەجنا و بۆ حنگێن و دنگێن… پشتى هینگى دوستا من رازى نەبو جارەکا دى بچینە د وى خانیڤە، و گەلەک نەما پاشى شى ب کەنکەنەکێ رەخێ روژئاڤا یێ باژارى کر .
پشتى سوحبەتا دەستەبرایێ من بدوماهى هاتى، من زانى ئەو تەخت و تشتێن مالێ یێن وى شوفێرێ تڕۆمبێلا بارهلەگر بوون، لێ دیارە وان نەدزانى یێن وى نە. دا تشتەکى بێژمێ، هێش من نەگۆتى وى بەرى من راکر و گۆت :
برا تشتەکێ دى ژى؛ من علکێ خوە هێلا بۆ ب ئەنیا تەختى ڤە!
تەواو