عبدالرحمن بامەرنی: كەشتییا مرنێ‌!

Loading

چیرۆكنوس ؛ عه‌بدولڕه‌حمان بامه‌ڕنی
چیرۆكنوس ؛ عه‌بدولڕه‌حمان بامه‌ڕنی

بیست و پێنج هزار دولار، هەر كەسەك دێ‌ بیست و پێنج هزار دولاران دەت، ئەڤە من چەند جار دوبارە كر! ئەڤ دوبارەكرنا وی ژ بەر وێ‌ ژنا گەنج بو، ئەوا برایێ‌ وێ‌ دگەل دا و هەر داخاز دكر، چەند سەد دولارەكان بۆ برایێ‌ من بهێلە، دا بشێت تا سنۆرێ‌ وەلاتی ڤەگەریت و چ دی داخازا كێمكرنا پارێ‌ سیاربۆنا كەشتیێ‌ ژێنەكەت. ژ بەریكا خوە، من دوو سەد دولار كرنە ددەستێ‌ برایێ‌ وێ‌ دا و من گۆتە قەچاخچی، درەنگە مە برێ‌ بێخە؟ ئەڤە ژی نە ژبەركو ئەو ژن یا جوان و جەحێل بۆ و دێ‌ دڤێ‌ سەفەرێ‌ دا، خوە نزیكی من كەت یان دلێ‌ من مابیتە ب برایێ‌ وێڤە، كۆ ل كۆلانێن ڤی وەلاتێ‌ بیانی، نە كەڤیتە سەرجاددان. بتنێ‌ هەر ڕۆژەكا گیرۆبونا مە و تا قەچاخچیەكێ‌ دی بدەست دكەڤیت، ئەم گەلەك پاران ل هوتێل و خارنگەهان دمەزێخین و ئەڤە ژبلی خوە ڤەشارتنا مە ژ پۆلیسان.

ئەم ل كەشتیێ‌ سیاربوین و مە دا بەحرێ‌. سێ‌ جاران ئەم نزیكی سنورێن یونانێ‌ دبوین و قەچاخچی بهێجەتا پولیسێن زێرەڤانیا سنۆری دكەن، ئەم دڤەگەراندینە نیڤا  بەحرێ‌ ڤە. دوماهی جار، ئەڤێن دنیڤا كەشتیێ‌ دا، دەست بقیژییا كرن و نیڤا كەشتیا مە تژی ئاڤ بۆ. هندا دەست ب لاڤاكرن و هیڤیێن خوە گەهاندنە بەر پەرێن عەسمانی و هندان دەست بهەوارهاتنێ‌ كرن  و هندان ژی ب چ تشتێ‌ ل بەر دەست، بهەمی هێزا خوە ئاڤ ژ كەشتیێ‌ ڤالا دكرن. بتنێ‌ قاچاخچی نەبیت، چۆخكێ‌ سەرئاڤ بونێ‌ ب سەر ملێن خوە داگرت و عەسلی ل پشتا خوە شداند و خوە سەرنشیڤی ئاڤێ‌ كر.

كەشتی نقومی ئاڤێ‌ دبۆ و هەر كەسێ‌ چۆخك ل پشتێ‌، ب سەر ئاڤێ‌ كەت و یێن وەك من بێ‌ چۆخك و ئەڤێن دانعەمر و زارۆك، كەتنە لاڤەلاڤێ‌ و من ئەو هێلان و خوە هاڤێتە چۆخكێ‌ قەچاخچی، من ملێن وی گرتن و ئەز و ئەو پێكڤە بن ئاڤ بوین. ژبلی بزاڤا سەرئاڤ بونێ‌، ئەوی ب پێهنا و هەر هێزا د لەشی دا هەی، ئەز ژ خوە ددامە پاش.  ژ من و ژ وی! من چۆخكێ‌ وی بەرنەدا و من نەهێلا سەرێ‌ وی سەرئاڤ بیت و چپكا هەوای بگەهیتە ناڤ سیهێن وی. تا ژ بێهنێ‌ مالق بویی و وەكی ئاڤا دەریایی لێ‌ هاتی و تەزیتر. من چۆخكێ‌ وی دسەردا ئیناخارێ‌ و ل سەر ئاڤ بونێ‌، رەخ و دۆرێن من هەمی یێن بوینە كەلەخ و وەكی مریشكێن مرار، سەرێن وان یێن كەتینە سەر ملێن وان. مانا مە دوێ‌ ئاڤا تەزی و وێ‌ شەڤ تاریێ‌ دا، زێدەتر ژ چەند سەعەتان ڤەكێشا و كەشتیەكا رزگاركرنێ‌، ئەم یێن ساخ و نیڤ ساخ و كەلەخێن مری ژ ئاڤێ‌ دەرئێخستین.

هێشتا قەچاخچی یێ‌ دبێژیت، هەر كەسێ‌ سەفەرێ‌ بكەت، چ مەزن چ  زاروك بیت، دڤێت بیست و پێنج هزار دولاران بدەت و ئەو ژنا گەنجا جەحێل یا بدەڤ و لێڤێن وی ڤە بویە میچرك، بەلكویە، كێمتر پارەی ژوێ‌ وەرگبریت، دا برایێ‌ وێ‌ ڤەگەریت وەلاتی ڤە. ژ بەریكا خوە من دوو سەد دولار كرنە ددەستێ‌ برایێ‌ وێ‌ دا و من گوتە قەچاخچی، درەنگە، كەشتیێ‌ ب رێ‌ بێخە؟ ئەڤە ژی، نە ژبەركو ئەو ژن یا جوان و جەحێل بو و دێ‌ دڤێ‌ سەفەرێ‌ دا، خوە نزیكی من كەت یان دلێ‌ من مابیتە ب برایێ‌ وێڤە، كو ل كولانێن ڤی وەلاتێ‌ بیانی نە كەڤیتە سەرجاددان. بتنێ‌ ئەز دزانم ئەڤە سەفەرا مریانە و ئەڤێن لدوورێن ڤێ‌ كەشتیێ‌ خرڤەبوین، ساخ و نیڤ ساخ و مری دهاتنە بەرچاڤێن من.

ته‌واو

هیرۆنیمۆ بوش ؛ كه‌شتی گه‌مژه‌كان - كاری زه‌یت له‌سه‌ر ته‌خته‌ ساڵی ١٤٩٠-١٥٠٠- مۆزه‌خانه‌ی لۆڤه‌ر له‌پاریس Hieronymus Bosch
هیرۆنیمۆ بوش ؛ كه‌شتی گه‌مژه‌كان – كاری زه‌یت له‌سه‌ر ته‌خته‌ ساڵی ١٤٩٠-١٥٠٠- مۆزه‌خانه‌ی لۆڤه‌ر له‌پاریس Hieronymus Bosch
 تایبه‌ت به‌كولتور مه‌گه‌زین ڕێنوس و خاڵبه‌ندی تایبه‌ته‌ به‌نوسه‌ر خۆی
تایبه‌ت به‌كولتور مه‌گه‌زین
ڕێنوس و خاڵبه‌ندی تایبه‌ته‌ به‌نوسه‌ر خۆی